ଭୁବନେଶ୍ୱର, ୫।୬ (କ୍ରୀଡ଼ା ପ୍ରତିନିଧି): ହରିୟାଣାର ଝଜାରଠାରେ ଅନୁଷ୍ଠିତ ୧୮ ବର୍ଷରୁ କମ୍ ବାଳକ ନ୍ୟାଶନାଲ ସିରିଜ ଟେନିସ ଚାମ୍ପିୟନଶିପ୍ରେ ଓଡ଼ିଶାର ଦେବାଶିଷ ସାହୁ ରନରଅପ୍ ହୋଇଛନ୍ତି। ପ୍ରଥମ ରାଉଣ୍ଡ ଓ ପ୍ରି-କ୍ୱାର୍ଟର ଫାଇନାଲକୁ ସହଜରେ ଜିତିଥିବା ଦେବାଶିଷ କ୍ୱାର୍ଟର ଫାଇନାଲଠାରୁ କଡ଼ା ଚ୍ୟାଲେଞ୍ଜର ସମ୍ମୁଖୀନ ହୋଇଥିଲେ। ତେବେ ସେ କ୍ୱାର୍ଟର ଫାଇନାଲରେ ତାମିଲନାଡ଼ୁର ରିଶି ବନ୍ଦନଙ୍କୁ ୨-୬, ୬-୩, ୬-୧ ସେଟ୍ରେ ଏବଂ ସେମିଫାଇନାଲରେ ମହାରାଷ୍ଟ୍ରର ପାର୍ଥ ଦେଓରୋଖରଙ୍କୁ ୬-୪, ୨-୬, ୬-୨ ସେଟ୍ରେ ହରାଇ ଫାଇନାଲରେ ପ୍ରବେଶ କରିଥିଲେ। ଆହତ ସମସ୍ୟା ଯୋଗୁ ସେ ଟାଇଟଲ ପର୍ଯ୍ୟାୟରେ ଦକ୍ଷତା ଅନୁସାରେ ପ୍ରଦର୍ଶନ କରିପାରି ନ ଥିଲେ। ଫଳରେ ହରିୟାଣାର ବଂଶ ନନ୍ଦଲଙ୍କଠାରୁ ୨-୬, ୦-୬ ସେଟ୍ରେ ହାରି ଯାଇଥିଲେ। ଅନୁକମ୍ପା ସାହୁ ଓ ଲକ୍ଷ୍ମୀକାନ୍ତ ସାହୁଙ୍କ ପୁତ୍ର ଦେବାଶିଷଙ୍କ ଘର ହେଉଛି। ଢେଙ୍କାନାଳ ଗଁଦିଆସ୍ଥିତ ଲହଡା। କୋଚ୍ ସୟଦ ଫରହାନ ଅଲୀଙ୍କଠାରୁ ପ୍ରଶିକ୍ଷଣ ନେଇ କ୍ୟାରିୟରକୁ ଆଗକୁ ବଢ଼ାଇଥିବା ଏହି ଉଦୀୟମାନ ଟେନିସ ପ୍ରତିଭା ଭାରତ ପକ୍ଷରୁ ଜୁନିୟର ଡେଭିସ କପ୍ରେ ପ୍ରତିନିଧିତ୍ୱ କରିଛନ୍ତି। କେବଳ ସେତିକି ନୁହେଁ ଭାରତକୁ ଡେଭିସ କପ୍ ବିଜୟୀ କରିବାରେ ଗୁରୁତ୍ୱପୂର୍ଣ୍ଣ ଯୋଗଦାନ ଦେଇ ନିଜ କ୍ୟାରିୟରକୁ ରୁଦ୍ଧିମନ୍ତ କରିଛନ୍ତି। ପୂର୍ବରୁ ସେ ପ୍ରଥମ ଓଡ଼ିଆ ଖେଳାଳିଭାବେ ୨୦୧୯ରେ ଓ୍ବିମ୍ବେଲଡନ ଗ୍ରାଣ୍ଡସ୍ଲାମ ଜୁନିୟର ଟେନିସ ଟ୍ରାଏଲ୍ ପାଇଁ ମନୋନୀତ ହୋଇଥିଲେ। ଇତିମଧ୍ୟରେ ଦେବାଶିଷ ଜାତୀୟ ଓ ଅନ୍ତର୍ଜାତୀୟ ସ୍ତରରେ ଡଜନେରୁ ଊର୍ଦ୍ଧ୍ୱ ଟାଇଟଲ ଜିତିବାର ସୌଭାଗ୍ୟ ଲାଭ କରିଛନ୍ତି।
