ମୁମ୍ବାଇ,୧୩।୧୨: ଏନ୍ସିପି ମୁଖ୍ୟ ଶରଦ ପାଓ୍ବାରଙ୍କୁ ଫୋନ୍ରେ ଜୀବନରୁ ମାରିଦେବାକୁ ଧମକ ମିଳିଛି। କଲ୍ କରିଥିବା ବ୍ୟକ୍ତି ପାଓ୍ବାରଙ୍କୁ ସିଲଭର ଓକ୍ରେ ଫୋନ୍ରେ ଧମକ ଦେଇଥିବା ଜଣାପଡ଼ିଛି। କଲ୍ କରିଥିବା ବ୍ୟକ୍ତି ହିନ୍ଦୀରେ କଥା ହେବା ସହ ମୁମ୍ବାଇ ଆସି ଦେଶୀ ବନ୍ଧୁକରେ ପାୱାରଙ୍କୁ ହତ୍ୟା କରିବେ ବୋଲି କହିଥିଲେ। ଏହି ଘଟଣା ପରେ ନିକଟସ୍ଥ ଗାମଦେବୀ ପୋଲିସ ଷ୍ଟେସନରେ ଜଣେ ଅଜ୍ଞାତ ବ୍ୟକ୍ତିଙ୍କ ବିରୋଧରେ ମାମଲା ରୁଜୁ କରାଯାଇଛି। ଅନ୍ୟପଟେ ପୋଲିସର ସୂଚନାନୁସାରେ, ଫୋନ୍ କରିଥିବା ବ୍ୟକ୍ତିଙ୍କୁ ଚିହ୍ନଟ କରାଯାଇଛି। ବିହାରରୁ ଏହି କଲ୍ ଆସିଥିଲା। ଉକ୍ତ ବ୍ୟକ୍ତି ଏହା ପୂର୍ବରୁ ମଧ୍ୟ ଫୋନ ମାଧ୍ୟମରେ ପାୱାରଙ୍କୁ ଧମକ ଦେଇସାରିଛି। ସେତେବେଳେ ପୋଲିସ ତାଙ୍କୁ ହେପାଜତରେ ନେଇ ପଚାରାଉଚରା କରିବା ସହ ବୁଝାସୁଝା କରି ପରେ ଛାଡି ଦେଇଥିଲା। ଏବେ ପୁଣି ଧମକ ଦେବାରୁ ପୋଲିସ ଏଫ୍ଆଇଆର୍ ରୁଜୁ କରିଛି। ତେବେ ଖୁବ୍ଶୀଘ୍ର ଧମକ ଦେଉଥିବା ବ୍ୟକ୍ତିଙ୍କୁ ଗିରଫ କରାଯିବ ବୋଲି ପୋଲିସ କହିଛି।
