ମୁମ୍ବାଇ,୫।୧(ପି.ଟି.): ୧୯୭୪ ଏବଂ ୧୯୯୮ରେ ଭାରତର ଆଣବିକ ପରୀକ୍ଷାରେ ପ୍ରମୁଖ ଭୂମିକା ନେଇଥିବା ଖ୍ୟାତନାମା ପଦାର୍ଥ ବିଜ୍ଞାନୀ ରାଜଗୋପାଳ ଚିଦାମ୍ବରମ୍ଙ୍କ ଶନିବାର ପରଲୋକ ହୋଇଯାଇଛି। ତାଙ୍କୁ ୮୮ ବର୍ଷ ହୋଇଥିଲା। ଅଣୁଅସ୍ତ୍ର କାର୍ଯ୍ୟକ୍ରମରେ ସମ୍ପୃକ୍ତ ଥିବା ଚିଦାମ୍ବରମ୍ ମୁମ୍ବାଇର ଯଶଲୋକ ହସ୍ପିଟାଲରେ ଶେଷ ନିଃଶ୍ୱାସ ତ୍ୟାଗ କରିଛନ୍ତି। ତାଙ୍କ ଦେହାନ୍ତରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସମେତ ବହୁ ବିଶିଷ୍ଟ ବ୍ୟକ୍ତି ଗଭୀର
ରାଜଗୋପାଳ ଚିଦାମ୍ବରମ୍ଙ୍କ ଶୋକବ୍ୟକ୍ତ କରିଛନ୍ତି। ୧୯୩୬ରେ ଜନ୍ମିତ ରାଜଗୋପାଳ ଚିଦାମ୍ବରମ୍ ଚେନ୍ନାଇର ପ୍ରେସିଡେନ୍ସି କଲେଜ ଏବଂ ଆଇଆଇଟି ବେଙ୍ଗାଲୁରୁରୁ ଶିକ୍ଷା ଗ୍ରହଣ କରିଥିଲେ। ୧୯୭୪ର ପ୍ରଥମ ଆଣବିକ ପରୀକ୍ଷାରେ ତାଙ୍କର ସମନ୍ବିତ ଭୂମିକା ରହିଥିଲା। ୧୯୯୮ରେ ରାଜସ୍ଥାନର ପୋଖରାନ୍ଠାରେ ଦ୍ୱିତୀୟ ଆଣବିକ ପରୀକ୍ଷା ବେଳେ ସେ ଆଣବିକ ଶକ୍ତି ବିଭାଗ ଟିମ୍ର ନେତୃତ୍ୱ ନେଇଥିଲେ। ତାଙ୍କ ଅବଦାନ ଭାରତକୁ ବିଶ୍ୱସ୍ତରରେ ଏକ ଆଣବିକ ଶକ୍ତିରେ ପରିଣତ କରିଥିଲା। ଜଣେ ବିଶ୍ୱଶ୍ରେଣୀୟ ବୈଜ୍ଞାନିକ ଭାବେ ହାଇପ୍ରେସର ଫିଜିକ୍ସ, କ୍ରିଷ୍ଟାଲୋଗ୍ରାଫି ଏବଂ ମ୍ୟାଟେରିଆଲ୍ସ ସାଇନ୍ସରେ ତାଙ୍କ ଗବେଷଣା ବୈଜ୍ଞାନିକ ସମୁଦାୟଙ୍କୁ ଏହି କ୍ଷେତ୍ରଗୁଡ଼ିକ ବୁଝିବାରେ ଉଲ୍ଲେଖନୀୟ ଅଗ୍ରଗତି କରିଥିଲା। ଏହିସବୁ କ୍ଷେତ୍ରରେ ତାଙ୍କ କାର୍ଯ୍ୟ ଭାରତରେ ଆଧୁନିକ ମ୍ୟାଟେରିଆଲ୍ସ ସାଇନ୍ସର ଭିତ୍ତିପ୍ରସ୍ତର ପକାଇଥିଲା।
୬ ଦଶନ୍ଧିର କ୍ୟାରିୟର ମଧ୍ୟରେ ଚିଦାମ୍ବରମ୍ ବହୁ ସମ୍ମାନଜନକ ପଦବୀରେ ରହିଥିଲେ। ସେ ୨୦୦୧ରୁ ୨୦୧୮ ଭାରତ ସରକାରଙ୍କ ପ୍ରମୁଖ ବୈଜ୍ଞାନିକ ପରାମର୍ଶଦାତା ରହିଥିଲେ। ଏଥିସହ ସେ ୧୯୯୦ରୁ ୧୯୯୩ ଭାବା ଆଟମିକ୍ ରିସର୍ଚ୍ଚ ସେଣ୍ଟରର ନିର୍ଦ୍ଦେଶକ, ୧୯୯୩ରୁ ୨,୦୦୦ ଅଣୁଶକ୍ତି ଆୟୋଗର ଅଧ୍ୟକ୍ଷ ଏବଂ ଭାରତ ସରକାରଙ୍କ ସଚିବ ରହିଥିଲେ। ଏହା ବ୍ୟତୀତ ସେ ୧୯୯୪-୯୫ରେ ଅନ୍ତର୍ଜାତୀୟ ଅଣୁ ଶକ୍ତି ସଂସ୍ଥା (ଆଇଏଇଏ)ର ବୋର୍ଡ ଅଫ୍ ଗଭର୍ନର୍ସ ଅଧ୍ୟକ୍ଷ ଭାବେ କାର୍ଯ୍ୟ କରିଥିଲେ।
ତାଙ୍କ ପରଲୋକରେ ପ୍ରଧାନମନ୍ତ୍ରୀ ଶୋକବ୍ୟକ୍ତ କରି ଏକ୍ଦ’ରେ ଲେଖିଛନ୍ତି, ଚିଦାମ୍ବରମ୍ ଭାରତୀୟ ଆଣବିକ କାର୍ଯ୍ୟକ୍ରମର ମୁଖ୍ୟ ବିନ୍ଧାଣି ଥିଲେ ଏବଂ ଭାରତର ବିଜ୍ଞାନ ଓ ରଣନୀତି ସାମର୍ଥ୍ୟକୁ ସୁଦୃଢ଼ କରିବାରେ ତାଙ୍କର ଐତିହାସିକ ଅବଦାନ ରହିଥିଲା। ସାରା ଦେଶ ତାଙ୍କୁ କୃତଜ୍ଞତାର ସହ ମନେରଖିବ ଏବଂ ତାଙ୍କ ଉଦ୍ୟମଗୁଡ଼ିକ ଆଗାମୀ ପିଢ଼ିଙ୍କୁ ପ୍ରେରଣା ଦେବ ବୋଲି ପ୍ରଧାନମନ୍ତ୍ରୀ କହିଛନ୍ତି। ଭାରତ କରିଥିବା ୨ଟି ପରମାଣୁ ପରୀକ୍ଷା ପାଇଁ ଚିଦାମ୍ବରମ୍ ସ୍ମରଣୀୟ ହୋଇ ରହିବେ ବୋଲି କେନ୍ଦ୍ର ବିଜ୍ଞାନ ଓ ପ୍ରଯୁକ୍ତି ମନ୍ତ୍ରୀ ଜିତେନ୍ଦ୍ର ସିଂ କହିବା ସହ ତାଙ୍କ ପରିବାରକୁ ସମବେଦନା ଜଣାଇଛନ୍ତି। ଏହି ମେଧାବୀ ବୈଜ୍ଞାନିକଙ୍କ ପ୍ରତି ରାଷ୍ଟ୍ର ଋଣୀ। ତାଙ୍କ ମହାନ୍ ଅବଦାନ ସବୁଦିନ ପାଇଁ ଆମ ହୃଦୟରେ ରହିବ ବୋଲି କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେ କହିଛନ୍ତି।
