ନୂଆଦିଲ୍ଲୀ, ୮।୮: କୋଜିକୋଡ଼େରେ ଏୟାର ଇଣ୍ଡିଆର ବିମାନ ଦୁର୍ଘଟଣାରେ ଗୋଲ୍ଡ ମେଡାଲିଷ୍ଟ ଫାଇଟର ପାଇଲଟ୍ ଭାସନ୍ତ ସାଥେଙ୍କର ମୃତ୍ୟୁ ଘଟିଛି। ଶେଷ ପର୍ଯ୍ୟନ୍ତ ବିମାନକୁ ସୁରକ୍ଷିତ ଲ୍ୟାଣ୍ଡି କରିବାକୁ ସେ ପ୍ରୟାସ କରିଥିଲେ। ମାତ୍ର ଅସଫଳ ରହିଥିଲେ। ସେ ପୂର୍ବରୁ ଫାଇଟର ବିମାନ ପାଇଲଟ ଭାବେ କାର୍ଯ୍ୟ କରୁଥିଲେ। ଭାରତୀୟ ବାୟୁସେନାରେ ଓ୍ବିଙ୍ଗ କମାଣ୍ଡର ଭାବେ ସେ ୧୯୮୧ ଜୁନ୍ ୧୧ରେ ଯୋଗଦେଇଥିଲେ। ୨୨ ବର୍ଷ କାର୍ଯ୍ୟ କରିବା ପରେ ୨୦୦୩ ଜୁନ୍ ୩୦ରେ ସେ ଅବସର ଗ୍ରହଣ କରିଥିଲେ। ବନ୍ଦେ ଭାରତ ମିଶନ ଅର୍ନ୍ତଗତ ଦୁବାଇରୁ କେରଳର କୋଜିକୋଡ଼େ ଆସୁଥିବା ବୋଇଂ ୭୩୭ର ବିମାନ ଏଏକ୍ସ୍ବି-୧୩୪୪ ତେବେ କ୍ରାସ୍ ଲ୍ୟାଣ୍ଡିଂ ଯୋଗୁ ବିମାନଟି ରନ୍ ଓ୍ବେରେ ଦୁଇଖଣ୍ଡ ହୋଇଯାଇଥିଲା। ଏଥିରେ ଭାସନ୍ତଙ୍କ ସହିତ ଅନ୍ୟ ଜଣେ ସାଥି ପାଇଲଟ୍ଙ୍କର ମଧ୍ୟ ମୃତ୍ୟୁ ଘଟିଛି। ବର୍ତ୍ତମାନ ମୃତକଙ୍କ ସଂଖ୍ୟା ୧୮ ଥିବାବେଳେ ୨୨୭ ଆହତଙ୍କ ଚିକିତ୍ସା ଜାରି ରହିଛି। ୧୫ ଜଣଙ୍କ ଅବସ୍ଥା ଗୁରୁତର ଥିବା ହସ୍ପିଟାଲ ପକ୍ଷରୁ କୁହାଯାଇଛି। ବିମାନରେ ୧୯୦ ଜଣ ଯାତ୍ରା କରୁଥିଲେ। ସେଥିମଧ୍ୟରୁ ୧୨୮ ଜଣ ପୁରୁଷ, ୪୬ ମହିଳା, ୧୦ ଛୋଟ ପିଲା ଏବଂ ୬ ଜଣ କ୍ରୁ ସଦସ୍ୟ ଥିଲେ। ଯାତ୍ରୀଙ୍କ ଘରେ ପହଞ୍ଚିବା ଆଶା କେବଳ ଆଶାରେ ରହିଯାଇଥିବା କୁହାଯାଉଛି।
