ଖୋର୍ଦ୍ଧାଅଫିସ,୧୦।୬ : ଡ୍ରଗ୍ସ ମାଫିଆ ସୋମନାଥ ଭୁଜବଳଙ୍କର ଚିକିତ୍ସାଧିନ ଅବସ୍ଥାରେ ଶୁକ୍ରବାର ବିଳମ୍ବିତ ରାତିରେ ମୃତ୍ୟୁ ଘଟିଛି। ପରିବାର ପରେ ପୋଲିସ ପକ୍ଷରୁ ସ୍ପଷ୍ଟ କରାଯାଇଛି। ଏହି ଘଟଣାରେ ଅନ୍ୟ ଜଣେ କୁଖ୍ୟାତ ଡ୍ରଗ୍ସ ମାଫିଆଙ୍କ ସଂପୃକ୍ତି ନେଇ ସୋମନାଥଙ୍କ ପରିବାର ଅଭିଯୋଗ ଆଣିଛନ୍ତି। ପୋଲିସ ଅଭିଯୋଗ କ୍ରମେ ହତ୍ୟା ମାମଲା ରୁଜୁ କରି ତନାଘନା ଚଳାଇଛି। ଏକାଧିକଙ୍କୁ ପୋଲିସ ଅଟକ ରଖି ପଚରାଉଚରା ଜାରି ରଖିଛି। ଗତ ୭ ତାରିଖ ରାତିରେ ସାମନ୍ତରାପୁର ଠେଙ୍ଗାହାଟ ଛକରେ ଏକାକି ଠିଆ ହୋଇଥିବା ବେଳେ ଏକ ପିକଅପ୍ ଭ୍ୟାନରେ କିଛି ଦୁର୍ବୃତ୍ତ ଆସି ଅତର୍କିତ ଭାବେ ସୋମନାଥଙ୍କୁ ଗୁଳିମାଡ କରିଥିଲେ। ଗୁଳି ତାଙ୍କ ହାତ, ଛାତି ଓ ପିଠିରେ ବାଜିଥିଲା। ତାଙ୍କୁ ଗୁରୁତର ଅବସ୍ଥାରେ ଖୋର୍ଦ୍ଧା ପରେ ଭୁବନେଶ୍ୱର ସ୍ଥାନାନ୍ତର କରାଯାଇଥିଲା। ସେଠାରେ ଚିକିତ୍ସାଧିନ ଅବସ୍ଥାରେ ଶୁକ୍ରବାର ରାତିରେ ମୃତ୍ୟୁ ଘଟିଛି। ତେବେ ଖୁବଶୀଘ୍ର ଘଟଣାର ପର୍ଦ୍ଦାଫାଶ କରାଯିବ ବୋଲି ଏସପି ସିଦ୍ଧାର୍ଥ କାଟ୍ଟାରିଆ କୁହିଛନ୍ତି। ଅଭିଯୁକ୍ତଙ୍କୁ ଗିରଫ ଲାଗି ପୋଲିସ ଚାରିପଟେ ଜାଲ ବିତାଇଥିବା ଜଣାପଡିଛି। ସେପଟେ ଅଭିଯୋଗ ପରେ ପୂର୍ବରୁ ଜେଲ ଯାଇ ଜାମିନରେ ଥିବା ସହରର ଅନ୍ୟତମ ଡ୍ରଗ୍ସ ମାଫିଆ ଫେରାର ହୋଇଯାଇଛି।
ପ୍ରକାଶ ଗତ ୨୦୧୪-୧୫ରେ ନିଶା କାରବାରରୁ ରାତାରାତି ବ୍ରାଉନସୁଗାର ମାଫିଆ ପାଲଟି ଯାଇଥିଲେ। ୨୦୧୯ରେ କମିଶନରେଟ ପୋଲିସ, ୨୦୨୦ରେ ପୁରୀ ବାସେଳୀ ସାହି ପୋଲିସ ସୋମନାଥ ଓ ବାପା କୃଷ୍ଣଚନ୍ଦ୍ରଙ୍କ ମୁଖ୍ୟ ବ୍ରାଉନସୁଗାର କାରବାରରେ ଗିରଫ ପରେ ଜେଲରେ ଥିଲେ। ୨୦୨୧ନଭେମ୍ବରରେ ବେଆଇନ ଭାବେ ନିଶା କାରବାରରେ ଲକ୍ଷାଧିକ ଟଙ୍କାର ସମ୍ପତ୍ତି ଗଚ୍ଛିତ ନେଇ ଖୋର୍ଦ୍ଧା ଆଦର୍ଶ ଥାନା ପୋଲିସ ଜବତ କରିଥିଲା। ତାଙ୍କ ନାଁରେ ବିଭିନ୍ନ ଥାନାରେ ୧୮ରୁ ଉଦ୍ଧର୍ବ ମାମଲା ରହିଛି। ନିକଟରେ ସେ ଜେଲରୁ ଜାମିନରୁ ଆସିବା ପରେ ମାଛ ବେପାର କରୁଥିଲେ। ପୂର୍ବ ଶତ୍ରୁତାରୁ ଗୁଳିକାଣ୍ଡ ଘଟିଥିବା ନେଇ ପୋଲିସ ସୂଚନା ଦେଇଛି।
