ଦିଗପହଣ୍ଡି,୧୦।୧୧(ଅଶେଷ ନାଥ ମିଶ୍ର): ଗଞ୍ଜାମ ଜିଲା ସାନଖେମୁଣ୍ଡି ବ୍ଲକ ଗଙ୍ଗାପୁର ପଞ୍ଚାୟତ ଯୋଗାଣ ସହାୟିକା ରାଜେଶ୍ୱରୀ ଗୌଡ଼ଙ୍କ ବିରୋଧରେ ସୋମବାର ଜନଜାତି ବହୁଳ ଅଶୋକ ନଗର, ସଅ ଢେପ, ରାଧା ନଗର ପ୍ରଭୃତି ଗ୍ରାମର ବହୁସଂଖ୍ୟକ ମହିଳା ପୁରୁଷ ବ୍ଲକ କାର୍ଯ୍ୟାଳୟରେ ପହଞ୍ଚି ବଡ଼ିଓଙ୍କ ଉଦ୍ଦେଶ୍ୟରେ ଦସ୍ତଖତ ସମ୍ବଳିତ ଦାବିପତ୍ର ପ୍ରଦାନ କରିଛନ୍ତି। ଯୋଗାଣ ସହାୟିକା ଜଣକ ଜନଜାତି ବହୁଳ ଗାଁ ଲୋକମାନଙ୍କୁ ଖାଦ୍ୟ ସୁରକ୍ଷା ଯୋଜନାରେ ନିୟମିତ ଚାଉଳ ପ୍ରଦାନ ନକରି ହିତାଧିକାରୀ ମାନଙ୍କ ଦସ୍ତଖତ , ନିସାଣୀ ନକଲ କରି ଚାଉଳ ହଡପ କରୁଥିବା ସହ ବିଭିନ୍ନ ସମୟରେ ମହିଳା ହିତାଧିକାରୀ ଙ୍କୁ ଆପତ୍ତି ଜନକ ଭାଷାରେ ଗାଳି ଗୁଲଜ କରି ଜାତିଆଣ ଆକ୍ଷେପ କରୁଥିବା ଦାବିପତ୍ରରେ ଉଲ୍ଲେଖ ରହିଛି। ଯୋଗାଣ ସହାୟିକାଙ୍କ ଭାଇ କାଳୁ ଗୌଡ଼ ବେଆଇନ ଭାବେ ଚାଉଳ ବଣ୍ଟନ ଦାୟିତ୍ୱ ନେଇ ମହିଳା ହିତାଧିକାରୀଙ୍କୁ ଚାଉଳ ନେବା ସମୟରେ ଅସଭ୍ୟ ଭାଷାରେ ଗାଳି କରୁଥିବା ନେଇ ଭୀମସେନ ମଣ୍ଡଳ, ବିପ୍ର ମଣ୍ଡଳ, ଶ୍ୟାମ ମଣ୍ଡଳ ,ରାମଚନ୍ଦ୍ର ମଲ୍ଲିକ,ସତ୍ୟ ଗମାଙ୍ଗ, ଯୁଧିଷ୍ଠିର ଗମାଙ୍ଗ, କମଳ ଲୋଚନ ଗମାଙ୍ଗ, ତବତିଆ ମଣ୍ଡଳ, ଶଙ୍କର ମଣ୍ଡଳ ପ୍ରମୁଖ ବହୁ ସଂଖ୍ୟକ ଗ୍ରାମବାସୀ ଅଭିଯୋଗ କରିଛନ୍ତି। ଯୋଗାଣ ସହାୟିକାଙ୍କୁ ଏ ନେଇ ପଚାରିବାରୁ ସମସ୍ତ ଅଭିଯୋଗ ମିଥ୍ୟା ଓ କପୋଳକଳ୍ପିତ ବୋଲି କହିଛନ୍ତି। ଏ ନେଇ ସେ ଦୁଃଖ ପ୍ରକାଶ କରିବା ସହ ପଞ୍ଚାୟତର କୌଣସି ହିତାଧିକାରୀଙ୍କୁ ସେ ଦୃର୍ବ୍ୟବହାର କରି ନ ଥିବା ଜଣାଇଛନ୍ତି। ବିଡିଓ ଜିତେନ୍ଦ୍ର ମିଶ୍ରଙ୍କୁ ଯୋଗାଯୋଗ କରିବାରୁ ଦାବିପତ୍ର ପାଇଛି। ଅଭିଯୋଗ କରିଥିବା ଗ୍ରାମବାସୀ ଏବଂ ଯୋଗାଣ ସହାୟିକାଙ୍କ ଉପସ୍ଥିତିରେ ସନ୍ଧ୍ୟାରେ ବ୍ଲକ କାର୍ଯ୍ୟାଳୟରେ ଆଲୋଚନା କରିଛି। ଯୋଗାଣ ସହାୟିକା ଗ୍ରାମବାସୀଙ୍କ ସମ୍ମୁଖରେ କ୍ଷମା ପ୍ରାର୍ଥନା କରିଛନ୍ତି। ସେ ନିଜେ ଉପସ୍ଥିତ ରହି ହିତାଧିକାରୀ ମାନଙ୍କୁ ର୍ନିଦ୍ଧାରିତ ଚାଉଳ ବଣ୍ଟନ କରିବେ ବୋଲି କହିଛନ୍ତି। ତାଙ୍କ ଭାଇ କାଳୁ ଚାଉଳ ବଣ୍ଟନ କାର୍ଯ୍ୟ କରିବେ ନାହିଁ ବୋଲି ନିଷ୍ପତ୍ତି ହୋଇଥିବା ଜଣାଇଛନ୍ତି।
Dharitri – Odisha’s No.1 Odia Daily
