ହିଞ୍ଜିଳିକାଟୁ,୨୭।୯(ଦ୍ବିତୀକୃଷ୍ଣ ପଣ୍ଡା): ଗଞ୍ଜାମ ଜିଲା ହିଞ୍ଜିଳି ଥାନା ଖରିଡା ଗାଁ ନିକଟ ଋଷିକୂଲ୍ୟା ନଦୀ ନିକଟ କାଜୁ ତୋଟାରୁ ଶୁକ୍ରବାର ଖରିଡା ଗାଁର ଶ୍ରମିକ ଶ୍ରୀକାନ୍ତ ସେଠୀଙ୍କ ଗଳିତ ମୃତଦେହ ଜବତ ପରେ ମୃତ୍ୟୁର କାରଣ ଏଯାଏ ସ୍ପଷ୍ଟ ହୋଇ ପାରି ନାହିଁ। ପୋଲିସ ପ୍ରାରମ୍ଭିକ ତଦନ୍ତରୁ ଫସଲକୁ ବାରହା ଉପଦ୍ରବରୁ ରକ୍ଷା ପାଇଁ ବିଛା ଯାଇଥିବା ବିଦ୍ୟୁତ୍ ତାର ଲାଗି ଶ୍ରୀକାନ୍ତଙ୍କ ମୃତ୍ୟୁ ଘଟିଥିବା ସନ୍ଦେହ କରୁଛି।
ହେଲେ ଏହି ଘଟଣାରେ ଜମି ମାଲିକ ଓ ଅନ୍ୟ ଜଣକୁ ପୋଲିସ ପ୍ରମାଣ ନତ ଓ ମୃତଦେହକୁ ଉଠାଇ କାଜୁ ତୋଟାରେ ଫୋପାଡ଼ି ଦେବା ଆରୋପରେ ଶନିବାର ୨ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି। ସେମାନେ ହେଲେ ହିଞ୍ଜିଳିକାଟୁ ଥାନାତୋଟା ସାହିର ତଥା ଖରିଡା ଗାଁରେ ଇଟାଭାଟି କରିଥିବା ଦାମ ପାଣିଗ୍ରାହୀ ଓ ପୁରୁଷୋତ୍ତମପୁର ଥାନା ନରସିଂହପୁର ଗ୍ରାମର ତଥା ଇଟାଭାଟିରେ ରାତି ଜଗୁଆଳୀ ଥିବା ଡି. ସଞ୍ଜୟ ରେଡ୍ଡୀ ।
ପ୍ରକାଶ ଯେ, ସବୁଦିନ ପରି ୪ ଜଣ ଶ୍ରମିକଙ୍କୁ ନେଇ ଜଣେ ଟ୍ରାକ୍ଟର ଡ୍ରାଇଭର ବୁଧବାର ରାତିରେ ଋଷିକୂଲ୍ୟା ନଦୀକୁ ବାଲି ଉଠାଇବାକୁ ଯାଇଥିଲେ। ସେଠାରେ ଶ୍ରୀକାନ୍ତଙ୍କୁ ଛାଡି ଅନ୍ୟମାନେ ଗାଁକୁ ଫେରି ଆସିଥିଲେ। ଶ୍ରୀକାନ୍ତଙ୍କ ନିଖୋଜ ନେଇ ଫେରିଥିବା ଅନ୍ୟମାନେ ପରିବାର ଲୋକଙ୍କୁ ସ୍ପଷ୍ଟ କରି ନ ଥିଲେ। ଫଳରେ ବାଲି ମାଫିଆଙ୍କ ଆକ୍ରମଣ କିମ୍ବା ପୂର୍ବଶତ୍ରୁତାରୁ ସୁଚିନ୍ତିତ ଯୋଜନାରେ ଶ୍ରୀକାନ୍ତଙ୍କୁ ଆକ୍ରମଣ ନେଇ ସନ୍ଦେହ ଉପୁଜିଛି।
ଗୁରୁବାର ଶ୍ରୀକାନ୍ତଙ୍କ ବାପା ଦୀନବନ୍ଧୁ ସେଠୀ ପୁଅର ନିଖୋଜ ନେଇ ହିଞ୍ଜିଳି ଥାନାରେ ଅଭିଯୋଗ କରିଥିଲେ। ପୋଲିସ ନଂ. ୭୮୩/୨୫ରେ ଏକ ମାମଲା ରୁଜୁ କରି ନୀରବ ରହିଥିଲା। ତେବେ ଘଟଣାକୁ ପୋଲିସ ଗୁରୁତ୍ୱ ନ ଦେବାରୁ ଶୁକ୍ରବାର ଖରିଡା ଗାଁର ଶତାଧିକ ମହିଳା ପୁରୁଷଙ୍କ ସମେତ ପରିବାର ଲୋକେ ହିଞ୍ଜିଳି ଥାନା ଘେରାଉ କରିଥିଲେ। ପରେ ପୋଲିସ ଖରିଡା ନିକଟ ମଶାଣିକୁ ଲାଗିଥିବା କାଜୁ ବଗିଚାରୁ ଶ୍ରୀକାନ୍ତଙ୍କ ଗଳିତ ମୃତଦେହ ଜବତ କରିଥିଲା।
