କୋକସରା,୨୮ା୧୨(ଡି.ଏନ୍.ଏ.): କଳାହାଣ୍ଡି ଜିଲା କୋକସରା ବ୍ଲକ କାଉଡୋଳା ପଞ୍ଚାୟତ ବାଞ୍ଜିବାହାଲ ଗ୍ରାମର ଚମାର କୋଚିଆ (୫୨) ଆନ୍ଧ୍ରପ୍ରଦେଶ ରାଜ୍ୟ ବିଜୟଓ୍ବାଡା ନିକଟରେ ଥିବା ଏକ ଇଟାଭାଟିରେ କାମ କରୁଥିବା ବେଳେ ଅକସ୍ମାତ ଚେତାଶୂନ୍ୟ ହୋଇ ପଡ଼ିବାରୁ ତାଙ୍କୁ ନିକଟସ୍ଥ ଡାକ୍ତରଖାନାକୁ ନିଆ ଯାଇଥିବା ବେଳେ ମୃତ୍ୟୁ ହୋଇଥିବା ସୂଚନା ମିଳିଛି। ପେଟପାଟଣା ପାଇଁ ସ୍ତ୍ରୀ କୁନ୍ତି ମାଝି ଓ ଦୁଇ ପୁଅଙ୍କୁ ଧରି ଆନ୍ଧ୍ରର ଏକ ଇଟାଭାଟିକୁ ଗତ କିଛିମାସ ତଳେ ଯାଇଥିଲେ। ଇଟାଭାଟିରେ କାମ କରୁଥିବା ସମୟରେ ମଙ୍ଗଳବାର ଅକସ୍ମାତ ଚେତା ହରାଇ ଟଳି ପଡ଼ିଥିଲେ ଚମାର। ତାଙ୍କୁ ବିଜୟଓ୍ବାଡାର ଏକ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ସ୍ବାମୀଙ୍କୁ ହରାଇ ଅସହାୟ ସ୍ତ୍ରୀ ସ୍ବାମୀଙ୍କ ମୃତଦେହ ଭିଟାମାଟିକୁ ଆଣି ନ ପାରି ସେଠାରେ ହିଁ ଲୋକଙ୍କ ସହାୟତାରେ ଶବଦାହ କରିଥିବା ସମ୍ପର୍କୀୟଙ୍କ ଠାରୁ ଜଣାପଡ଼ିଛି।
ଅନ୍ୟପକ୍ଷରେ କୋକସରା ବ୍ଲକରେ ବିଗତ ୬ ମାସ ମଧ୍ୟରେ ଦାଦନ ଶ୍ରମିକଙ୍କ ମୃତ୍ୟୁ ୧୧ରେ ପହଞ୍ଚିଛି। ଯାହାକି ବ୍ଲକରେ ଦାଦନ ସମସ୍ୟା ଜଟିଳ ହୋଇଥିବା ଦର୍ଶାଉଥିବା ବେଳେ ବ୍ଲକ ପ୍ରଶାସନ ପକ୍ଷରୁ ମନରେଗା ଯୋଜନାର ବିଫଳତାକୁ ମଧ୍ୟ ଇଙ୍ଗିତ କରୁଛି। କେବେ ଏହି ଦାଦନ ସମସ୍ୟା ଉପରେ ପୂର୍ଣ୍ଣଚ୍ଛେଦ ପଡ଼ିବ ତାହା ଦେଖିବାକୁ ବାକି ରହିଲା।
