ପୁରୁଣା ଭୁବନେଶ୍ୱର,୨୫।୯(ଡି.ଏନ୍.ଏ.):ରାଜଧାନୀ ଭୁବନେଶ୍ୱରରେ ପ୍ରବାହିତ ଦୟା ୱେଷ୍ଟ କେନାଲ ଭଳି ଦୟା ନଦୀର ପାଣି ମଧ୍ୟ ଧୀରେ ଧୀରେ ବିଷାକ୍ତ ହେବାରେ ଲାଗିଛି। ଧଉଳି ପାଦଦେଶରେ ବୋହି ଯାଇଥିବା ଏହି ଐତିହ୍ୟ ତଥା ପବିତ୍ର ନଦୀ ଏବେ ବ୍ୟବହାର ଅନୁପଯୋଗୀ ହୋଇପଡିଛି। ପୂର୍ବରୁ ଗାଧୋଇବା, ପିଇବା ଓ କୃଷି କାର୍ଯ୍ୟ ପାଇଁ ଦୟା ଲୋକେ ଦୟା ଉପରେ ନିର୍ଭର କରୁୁଥିଲେ। ହେଲେ ସହରର ଡ୍ରେନ୍ ପାଣି ନଦୀକୁ ଛଡ଼ାଯିବା, ମୃତ ପ୍ରାଣୀକୁ ଭସାଇଦେବା ସହ ବିଭିନ୍ନ ଶିଳ୍ପ, କାରଖାନାରୁ ନିର୍ଗତ କେମିକାଲ ଓ ବର୍ଜ୍ୟ ନଦୀପାଣିରେ ମିଶୁଥିବାରୁ ପ୍ରତ୍ୟକ୍ଷ ଏବଂ ପରୋକ୍ଷରେ ଲୋକଙ୍କ ପାଇଁ କାଳ ପାଲଟିଛି। ସଚେତନତା ଅଭାବରୁ ପାର୍ବଣ ସମୟରେ ବିଭିନ୍ନ ରାସାୟନିକ ପ୍ରଲେପ ମୂର୍ତ୍ତି ନଦୀରେ ପକାଇବା ଓ ଘରର ପୂଜା ବର୍ଜ୍ୟ ନଦୀକୁ ଫିଙ୍ଗାଯିବା ଦୟାପାଣି ଦୂଷିତ ହେବାର ଅନ୍ୟତମ କାରଣ ହୋଇଛି।
ରାଜ୍ୟ ଜଙ୍ଗଲ ଓ ପରିବେଶ ବିଭାଗର ତଥ୍ୟ ଅନୁସାରେ, ରାଜ୍ୟର ୧୧ ପ୍ରଦୂଷିତ ନଦୀ ମଧ୍ୟରେ ଦୟା ରହିଛି। ନଦୀଜଳ ଦୂଷିତ ହେଉଥିବାରୁ ବିଏମ୍ସି ପକ୍ଷରୁ ପୂର୍ବରୁ ହିଁ ରାସାୟନିକ ପ୍ରଲେପ ମୂର୍ତ୍ତିକୁ ନଦୀରେ ନ ପକାଇବାକୁ କଟକଣା ଜାରି କରାଯାଇଛି। ଏହାବଦଳରେ ବିଏମ୍ସି ପକ୍ଷରୁ ବିଭିନ୍ନ ନଦୀପଠାରେ ଅସ୍ଥାୟୀ ବିସର୍ଜନ ପୋଖରୀ ତିଆରି କରିଛି। ସେହିପରି ପୁରୀ-ଭୁବନେଶ୍ୱର ଜାତୀୟ ରାଜପଥ ଦୟାନଦୀର ବ୍ରିଜତଳେ ଅସ୍ଥାୟୀ ବିସର୍ଜନ ପୋଖରୀ ନିର୍ମାଣ କରାଯାଇଛି। ଏହାସତ୍ତ୍ୱେ କେତେଜଣ ସିଧାସଳଖ ନଦୀରେ ମୂର୍ତ୍ତି ବିସର୍ଜନ କରୁଛନ୍ତି। ନିକଟରେ ଗଣେଶ, ବିଶ୍ୱକର୍ମା, ଖୁଦୁରକୁଣୀ ପୂଜା ହୋଇଥିବାବେଳେ ବିସର୍ଜନ ଦିନ ଲୋକେ ମୂର୍ତ୍ତିକୁ ଦୟା ନଦୀରେ ବିସର୍ଜନ କରିଥିବା ଦେଖିବାକୁ ମିଳୁଛି। ଏଥିସହ ୫ଦିନ ତଳେ ଲଗାଣବର୍ଷା ଯୋଗୁ ଦୟାରେ ବନ୍ୟା ଆସିଥିଲା। ଏହି ବନ୍ୟା ଜଳସ୍ତର ଅପେକ୍ଷାକୃତ କମିଥିବାବେଳେ ସମ୍ପୂର୍ଣ୍ଣ ଗୋଳିଆ ରହିଛି। ଗୋଟିଏ ପଟେ ଗୋଳିଆ ପାଣି ଅନ୍ୟପଟେ ରାସାୟନିକ ପ୍ରଲେପ ଦିଆଯାଇଥିବା ମୂର୍ତ୍ତି ଏଠାରେ ବିସର୍ଜନ କରାଯିବା ଦ୍ୱାରା ଦୟାନଦୀ ପାଣି ବିଷମୟ ହେଉଛି। ତୁରନ୍ତ ଏଥିପ୍ରତି ବିଭାଗୀୟ କର୍ତ୍ତୃପକ୍ଷ, ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସାଧାରଣରେ ଦାବି ହେଉଛି।
ଏ ନେଇ ଧଉଳି ଥାନାଧିକାରୀ ଦୟାନିଧି ନାୟକ କହିଛନ୍ତି, ପୂଜା ପାର୍ବଣକୁ ଦୃଷ୍ଟିରେ ରଖି ପୂର୍ବରୁ ହିଁ ନଦୀ ନିକଟରେ ଅସ୍ଥାୟୀ ପୋଖରୀ ହୋଇଥିଲା। ପୋଲିସ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇ ଲୋକଙ୍କୁ କଟକଣା ମାନିବାକୁ ନିବେଦନ କରାଯାଇଥିଲା। ପ୍ରଥମେ କେତେଜଣ ଅସ୍ଥାୟୀ ପୋଖରୀରେ ମୂର୍ତ୍ତି ବିସର୍ଜନ କରିଥିଲେ। କିନ୍ତୁ ପରେ ଲୋକମାନେ ନଦୀରେ ମୂର୍ତ୍ତିକୁ ପକାଇଥିଲେ। ନଦୀଜଳକୁ ପରିଷ୍କାର ରଖିବା ପାଇଁ ଲୋକେ ନିଜେ ସଚେତନ ହେବା ଜରୁରୀ ବୋଲି ସେ କହିଛନ୍ତି।