ସିଡନୀ,୭।୪: ଅଷ୍ଟ୍ରେଲିଆର ବିସ୍ଫୋରକ ବ୍ୟାଟ୍ସମ୍ୟାନ ଡେଭିଡ ୱାର୍ନରଙ୍କ ପାଇଁ ଅଡୁଆ ବଢ଼ିଛି। ମଦ୍ୟପାନ କରି ଗାଡ଼ି ଚଲାଉଥିବା ବେଳେ (Drink-driving) ସିଡନୀ ପୋଲିସ ତାଙ୍କୁ ଗିରଫ କରିଛି। ଏହି ଖବର ପ୍ରକାଶ ପାଇବା ପରେ କ୍ରିକେଟ ଜଗତରେ ହଲଚଲ ସୃଷ୍ଟି ହୋଇଛି।
ରିପୋର୍ଟ ଅନୁଯାୟୀ, ଗତ ୫ ଏପ୍ରିଲ ସାରେ ସିଡନୀର ମାରୁବ୍ରା (Maroubra) ଅଞ୍ଚଳରେ ପୋଲିସ ଗାଡ଼ି ଗୁଡ଼ିକର ଯାଞ୍ଚ କରୁଥିଲା। ଏହି ସମୟରେ ୱାର୍ନର ପୋଲିସ ଚେକ୍-ପୋଷ୍ଟ ଦେଖି ନିଜ ଗାଡ଼ିକୁ କିଛି ଦୂରରେ ଅଟକାଇ ଦେଇଥିଲେ। ଏହା ଦେଖି ପୋଲିସର ସନ୍ଦେହ ହୋଇଥିଲା। ଯାଞ୍ଚ ପରେ ତାଙ୍କର ‘ବ୍ରେଥ ଆନାଲିସିସ୍’ କରାଯାଇଥିଲା।
ରିପୋର୍ଟରେ ୱାର୍ନରଙ୍କ ଶରୀରରେ ମଦ ପରିମାଣ ସୀମାଠାରୁ ଦୁଇ ଗୁଣରୁ ଅଧିକ ଥିଲା। ଏଣୁ ପୋଲିସ ତାଙ୍କୁ ଗିରଫ କରି ଥାନାକୁ ନେଇଥିଲା ଏବଂ ପରେ ଏକ କୋର୍ଟ ନୋଟିସ ଦେଇ ଛାଡ଼ି ଦେଇଛି। ଆସନ୍ତା ମଇ ୭ ତାରିଖରେ ତାଙ୍କୁ କୋର୍ଟରେ ହାଜର ହେବାକୁ ପଡ଼ିବ।
ୱାର୍ନର ଚଳିତ ଆଇପିଏଲ (IPL)ରେ ଖେଳୁନାହାନ୍ତି, ସେ PSL-୨୦୨୬ ରେ ’କରାଚି କିଙ୍ଗସ’ (Karachi Kings) ର ଅଧିନାୟକତ୍ୱ କରୁଛନ୍ତି। ୱାର୍ନରଙ୍କ ନେତୃତ୍ୱରେ ଦଳ ପ୍ରଥମ ୩ଟି ଯାକ ମ୍ୟାଚ ଜିତି ପଏଣ୍ଟ ଟେବୁଲର ଦ୍ୱିତୀୟ ସ୍ଥାନରେ ଅଛି। ଏପ୍ରିଲ ୩ରେ ସେ ପରିବାର ସହ ସମୟ ବିତାଇବା ପାଇଁ ଅଷ୍ଟ୍ରେଲିଆ ଆସିଥିଲେ। ଆସନ୍ତା ୯ ଏପ୍ରିଲରେ କରାଚି କିଙ୍ଗସର ପରବର୍ତ୍ତୀ ମ୍ୟାଚ ରହିଛି।
ୱାର୍ନରଙ୍କୁ ପୋଲିସ ଛାଡ଼ି ଦେଇଥିବାରୁ ଏବଂ ତାଙ୍କ ଉପରେ କୌଣସି ଯାତ୍ରା କଟକଣା (Bail conditions) ନ ଥିବାରୁ ସେ ପାକିସ୍ତାନ ଫେରିବା ପାଇଁ ସ୍ବାଧୀନ ଅଛନ୍ତି। କିନ୍ତୁ ଏହି ବିବାଦ ପରେ ଫ୍ରାଞ୍ଚାଇଜ କିମ୍ବା ପାକିସ୍ତାନ କ୍ରିକେଟ ବୋର୍ଡ ତାଙ୍କ ବିରୋଧରେ କୌଣସି ଆନୁଶାସନିକ କାର୍ଯ୍ୟାନୁଷ୍ଠାନ ଗ୍ରହଣ କରୁଛି କି ନାହିଁ, ତାହା ଦେଖିବାକୁ ବାକି ରହିଲା।
କହିରଖୁଛୁ, ୱାର୍ନର ପୂର୍ବରୁ ମଧ୍ୟ ୨୦୧୮ର ବଲ-ଟ୍ୟାମ୍ପରିଂ ବିବାଦ ପାଇଁ ବ୍ୟାନ ହୋଇ ସାରିଛନ୍ତି। ଏହି ନୂଆ ବିବାଦ ତାଙ୍କ କ୍ରିକେଟ କ୍ୟାରିୟରର ଶେଷ ସମୟରେ ଆଉ ଏକ କଳା ଦାଗ ସଦୃଶ ହୋଇଛି।
