ଜେରୁଜେଲମ, ୨୭।୧୨: ଅନେକ କୋଟି ଲୋକ ମାଇକ୍ରୋବ୍ଲଗିଂ ଆପ୍ ଟୁଇଟରକୁ ବ୍ୟବହାର କରୁଛନ୍ତି। ତେବେ ଟୁଇଟର ୟୁଜର୍ସଙ୍କ ଡେଟା କେତେ ସୁରକ୍ଷିତ ତାହା ଏବେ ବଡ଼ ପ୍ରଶ୍ନବାଚୀ ସୃଷ୍ଟି କରିଛି। ଇସ୍ରାଏଲର ସାଇବର ଇଣ୍ଟେଲିଜେନ୍ସ କମ୍ପାନୀ ହଡସନ୍ ରକ ପକ୍ଷରୁ ପ୍ରକାଶିତ ରିପୋର୍ଟ ଅନୁସାରେ ୪୦ କୋଟି ଟୁଇଟର ୟୁଜର୍ସଙ୍କ ପର୍ସନାଲ୍ ଡେଟା ଚୋରି ହୋଇଛି। ଚୋରି କରାଯାଇଥିବା ଡେଟାକୁ ଡାର୍କ ଓ୍ବେବ୍ରେ ବିକ୍ରିକରାଯାଉଥିବା ମଧ୍ୟ ରିପୋର୍ଟରେ ଉଲ୍ଲେଖ କରାଯାଇଛି। ତେବେ ଡେଟା ଚୋରି କରାଯାଇଥିବା ୟୁଜର୍ସଙ୍କ ମଧ୍ୟରେ ଗୁଗଲ କମ୍ପାନୀ ସିଇଓ ସୁନ୍ଦର ପିଚାଇ ଓ ହିନ୍ଦୀ ଚଳଚ୍ଚିତ୍ର ଜଗତର ଲୋକପ୍ରିୟ ଅଭିନେତା ସଲମାନ୍ ଖାନ୍ଙ୍କ ନାମ ସାମିଲ ଅଛି। କିଛି ମାସ ପୂର୍ବରୁ ପାଖାପାଖି ୫.୪ ନିୟୁତ ଟୁଇଟର ୟୁଜର୍ସଙ୍କ ଡେଟା ଲିକ୍ ହୋଇଥିବା ଖବର ସାମ୍ନାକୁ ଆସିଥିଲା। ଆୟର୍ଲାଣ୍ଡର ଡେଟା ପ୍ରୋଟେକ୍ସନ୍ କମିଶନର (ଡିପିସି) ଏ ନେଇ ଯାଞ୍ଚ କରିବ।
ଆପ୍ଲିକେଶନ୍ ପ୍ରୋଗ୍ରାମିଂ ଇଣ୍ଟରଫେସ୍ (ଏପିଆଇ)ର ବ୍ୟବହାର କରି ହ୍ୟାକର୍ମାନେ ୟୁଜର୍ସଙ୍କ ପର୍ସନାଲ ଡେଟା ଚୋରି କରୁଥିବା ହଡ୍ସନ୍ ରକ୍ ପକ୍ଷରୁ କୁହାଯାଇଛି। ୟୁଜର୍ସଙ୍କ ଟୁଇଟର ଆକାଉଣ୍ଟ ଡିଟେଲ୍ସ ସାଙ୍ଗକୁ ଫୋନ୍ ନମ୍ବର ହ୍ୟାକ୍ କରାଯାଇଛି। ଡାର୍କ ସାଇଟ୍ରେ ଡେଟା ବିକ୍ରି ଲାଗି ହ୍ୟାକରମାନେ ଅପ୍ଲୋଡ୍ କରିଥିବା ସ୍କ୍ରିନ୍ସର୍ଟର ଫଟୋ ହଡ୍ସନ୍ ଜାରି କରିଛି।
