ନୂଆଦିଲ୍ଲୀ,୪ା୨: ଭାରତରେ ନିଯୁକ୍ତିର ବନ୍ୟା ସୃଷ୍ଟି କରିବ ଆର୍ଟିଫିସିଆଲ୍ ଇଣ୍ଟେଲିଜେନ୍ସ (AI)। ଆଗାମୀ ଦିନରେ ‘ଡାଟା ସେଣ୍ଟର’ଗୁଡ଼ିକ ବ୍ୟାପକ ନିଯୁକ୍ତି ସୁଯୋଗ ସୃଷ୍ଟି କରିବ। ପୂର୍ବରୁ ଦେଶରେ ଇଣ୍ଟରନେଟ୍ ଆସିବା ସମୟରେ ହୋଇଥିବା ଚାକିରି ବିସ୍ଫୋରଣ ପରି ପୁଣି ଏକ ବଡ଼ ପରିବର୍ତ୍ତନ ଆଣିବ ବୋଲି ଏନଭିଡିଆ (NVIDIA) ସିଇଓ ଜେନସେନ୍ ହୁଆଙ୍ଗ ଭବିଷ୍ୟବାଣୀ କରିଛନ୍ତି।
ହୁଆଙ୍ଗଙ୍କ ଅନୁଯାୟୀ, ଗୋଟିଏ ଡାଟା ସେଣ୍ଟର ନିର୍ମାଣରେ ପ୍ରାୟ ୫,୦୦୦ ରୁ ୧୦,୦୦୦ ଲୋକଙ୍କୁ ସିଧାସଳଖ ନିଯୁକ୍ତି ମିଳିଥାଏ। ଏଥିରେ ଇଲେକ୍ଟ୍ରିସିଆନ୍, ପ୍ଲମ୍ବର ଏବଂ ନିର୍ମାଣ ଶ୍ରମିକମାନେ ସାମିଲ ଅଟନ୍ତି।
ନିର୍ମାଣ ବ୍ୟତୀତ ସପ୍ଲାଏ ଚେନ୍, ଡିଜାଇନ୍, ଆର୍କିଟେକଚର ଏବଂ ପ୍ରୋଜେକ୍ଟ ମ୍ୟାନେଜମେଣ୍ଟ କ୍ଷେତ୍ରରେ ମଧ୍ୟ ବହୁ ସଂଖ୍ୟାରେ ନିଯୁକ୍ତି ସୃଷ୍ଟି ହେବ। ଡାଟା ସେଣ୍ଟର କାର୍ଯ୍ୟକ୍ଷମ ହେବା ପରେ ଏହା ଉପରେ ଆଧାରିତ ଅନେକ ନୂତନ ଷ୍ଟାର୍ଟଅପ୍ ଜନ୍ମ ନେବେ।
ନିକଟରେ ୨୦୨୬ ବଜେଟ୍ ଉପସ୍ଥାପନ କରି ଅର୍ଥମନ୍ତ୍ରୀ ନିର୍ମଳା ସୀତାରମଣ ଘୋଷଣା କରିଥିଲେ ଯେ, ଭାରତରେ ନିର୍ମିତ ଡାଟା ସେଣ୍ଟର ବ୍ୟବହାର କରୁଥିବା ବିଦେଶୀ କମ୍ପାନୀଗୁଡ଼ିକୁ ୨୦୪୭ ପର୍ଯ୍ୟନ୍ତ ଟ୍ୟାକ୍ସ ହଲିଡେ (କର ଛାଡ଼) ପ୍ରଦାନ କରାଯିବ।
ଗୁଗଲ ଆନ୍ଧ୍ରପ୍ରଦେଶରେ ଏକ AI ଡାଟା ସେଣ୍ଟର ପାଇଁ $୧୫ ବିଲିୟନ ନିବେଶ କରିବାକୁ ଘୋଷଣା କରିଥିବାବେଳେ ମାଇକ୍ରୋସଫ୍ଟ ଏବଂ ଆମାଜନ ମଧ୍ୟ ଭାରତରେ ବିଲିୟନ ବିଲିୟନ ଡଲାର ନିବେଶ କରୁଛନ୍ତି।
ଆଇଟି ମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି ଯେ, ଡାଟା ସେଣ୍ଟର ଭାରତ ପାଇଁ ଏକ ବଡ଼ ଶକ୍ତି ହେବ ଏବଂ ଏହା ମାଧ୍ୟମରେ ଭାରତ ସାରା ବିଶ୍ୱକୁ ନୂତନ ସେବା ଯୋଗାଇବ। ଏହି ବିକାଶ ଭାରତକୁ ବିଶ୍ୱର ଏକ ପ୍ରମୁଖ AI ହବ୍ରେ ପରିଣତ କରିବା ସହ ଅର୍ଥନୀତିକୁ ଗତିଶୀଳ କରିବ ବୋଲି ଆଶା କରାଯାଉଛି।
