ମହାକାଳପଡ଼ା,୩୦ା୫(ଡି.ଏନ.ଏ.): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ନଦୀ ନାଳ ଘେରା ବତିଘର ପଞ୍ଚାୟତକୁ ସ୍ଥଳପଥରେ ଯାତାୟାତ ପାଇଁ କୌଣସି ସୁବିଧା ନାହିଁ। ଫଳରେ ସ୍ଥାନୀୟ ଲୋକେ ଦୈନଦିନ କାର୍ଯ୍ୟରେ ବ୍ଲକ, ତହସିଲ, ଜିଲା କାର୍ଯ୍ୟାଳୟ ଓ ଜିଲା ମୁଖ୍ୟ ଚିକିତ୍ସାଳୟ ସମେତ ଛାତ୍ରୀଛାତ୍ର କଲେଜ ଯିବାକୁ ହେଲେ ଡଙ୍ଗା ହିଁ ଏକ ମାତ୍ର ଭରସା। ମହାନଦୀ ଶାଖା ଗଳିଆ ନଦୀ ଖରିନାସୀ-ଟୁବି ଫେରିଘାଟରେ ଲୋକମାନେ ଯିବାକୁ ହେଲେ ଦୈନନ୍ଦିନ ବିପଦପୂର୍ଣ୍ଣ ଭାବେ ଡଙ୍ଗାରେ ପାର ହୋଇଥାନ୍ତି। ଯେଉଁ ଫେରିଘାଟ ଡଙ୍ଗାରେ ଯାତ୍ରୀମାନେ ପାର ହେଉଛନ୍ତି ତାହା ସୁରକ୍ଷିତ ଅଛି କି ନାହିଁ ସନ୍ଦେହ ସୃଷ୍ଟି ହେଉଛି। ଡଙ୍ଗାରେ ଯାତ୍ରୀମାନେ ବିନା ଲାଇଫ ଜ୍ୟାକେଟରେ ଯାତାୟାତ କରୁଛନ୍ତି। ଏହି କୁମ୍ଭୀର ଭରା ନଦୀରେ ଯଦି କିଛି ଦୁର୍ଘଟଣା ଘଟେ ସେଥିପାଇଁ କିଏ ଦାୟୀ ରହିବ ବୋଲି ବୁଦ୍ଧିଜୀବୀ ମହଲରେ ପ୍ରଶ୍ନ କରାଯାଇଛି।
ସୂଚନାଯୋଗ୍ୟ, ମହାନଦୀ ଓ ତା’ର ଶାଖା ନଦୀଗୁଡ଼ିକରେ ସାମୁଦ୍ରିକ ଜୁଆର ସ୍ରୋତ ଖୁବ୍ କ୍ଷୀପ୍ର ଥିବାରୁ ପୂର୍ବରୁ ଅନେକ ଡଙ୍ଗା ଦୁର୍ଘଟଣା ହେବା ନଜିର ରହିଛି। ଅପରପକ୍ଷରେ ବତିଘର ପଞ୍ଚାୟତର ମହାନଦୀ ଶାଖା ନିପାଣିଆଠାରେ ୨୦୧୯ ଜାନୁୟାରୀ ୨ରେ କୁଜଙ୍ଗ ଅଞ୍ଚଳର କେତେଜଣ ପର୍ଯ୍ୟଟକ ନିକଟ ହୁକିଟୋଲାରୁ ବଣଭୋଜି ସାରି ସାରେ ଫେରୁଥିବା ବେଳେ ଡଙ୍ଗା ବୁଡ଼ି ଦୁର୍ଘଟଣାରେ ୧୦ ଜଣ ପର୍ଯ୍ୟଟକଙ୍କ ଜୀବନ ଯାଇଥିଲା। ତଥାପି ସ୍ଥାନୀୟ ପ୍ରଶାସନର ଚେତା ପଶୁନାହିଁ। ଚାଳକଙ୍କ ଲାଇସେନ୍ସ, ଲାଇଫ ଜ୍ୟାକେଟ, ବୋଟ୍ ପଞ୍ଜୀକରଣ, ନାମଫଳକ ଓ ଡଙ୍ଗା ଫିଟ୍ନେସ୍ରେ କିଛି ନ ଥିବା ବେଳେ ଫେରିଘାଟରେ ଡଙ୍ଗା ଚାଲିଛି। ଡଙ୍ଗାର କ୍ଷମତା ତୁଳନାରେ ଅତ୍ୟଧିକ ଯାତ୍ରୀ ପରିବହନ ହେଉଥିବା ଦେଖିବାକୁ ମିଳୁଛି। ଏହି ଫେରିଘାଟରେ ବାର୍ଷିକ ଲକ୍ଷାଧିକ ଟଙ୍କା ରାଜସ୍ବ ମିଳୁଥିବା ବେଳେ ସାଧାରଣ ଲୋକଙ୍କ ଜୀବନ ପ୍ରତି ପ୍ରଶାସନର ନିଘା ନାହିଁ। ତୁରନ୍ତ ଡଙ୍ଗାରେ ଯାତ୍ରୀମାନଙ୍କ ସୁରକ୍ଷା ବ୍ୟବସ୍ଥା ଗ୍ରହଣ କରାଯିବାକୁ ସାଧାରଣରେ ଦାବି ହେଉଛି। ଏହି ଫେରିଘାଟଟି ପଞ୍ଚାୟତ ଅଧୀନରେ ପରିଚାଳିତ ହେଉଛି। ରାଜ୍ୟ ସରକାରଙ୍କ ନୌଯାତ୍ରୀ ପରିବହନ ୨୦୦୪ ବୋଟ୍ ରୁଲ୍ ଉଲ୍ଲଂଘନ କରାଯାଉଥିବା ଅଭିଯୋଗ ହେଉଛି। ଏ ସମ୍ପର୍କରେ ସରପଞ୍ଚ ଶିବାନୀ ବିଜୁଳିଙ୍କୁ ପଚାରିବାରେ ଘାଟ ଖୁବ୍ଶୀଘ୍ର ନିଲାମ ହେବ। ଘାଟ ହେଉଛି ବତିଘର ପଞ୍ଚାୟତବାସୀଙ୍କ ଲାଇଫ ଲାଇନ। ତେଣୁ ଘାଟୁଆଙ୍କ ଉପରେ ବିଶ୍ୱାସ ରଖି ଡଙ୍ଗାକୁ ଚଳାଚଳ କରାଯାଉଛି। ରାତିରେ ମଧ୍ୟ ରୋଗୀଙ୍କୁ ଡଙ୍ଗା ମାଧ୍ୟମରେ ପାର କରାଯାଇ ସ୍ବାସ୍ଥ୍ୟକେନ୍ଦ୍ରକୁ ନିଆଯାଇଥାଏ। ଯାତ୍ରୀଙ୍କ ସୁରକ୍ଷା ପ୍ରତି ଧ୍ୟାନ ଦିଆଯିବ ବୋଲି ସେ କହିଛନ୍ତି।
