ଗତ ହଜାରେ କୋଟି ବର୍ଷ ମଧ୍ୟରେ ବ୍ରହ୍ମାଣ୍ଡର ତାପମାତ୍ରା ୧୦ ଗୁଣା ବଢ଼ିଛି। ଏନେଇ ଓହିଓ ବିଶ୍ୱବିଦ୍ୟାଳୟର କସ୍ମୋଲୋଜି ଏବଂ ଆଷ୍ଟ୍ରୋପାଟିକିଲ୍ ଫିଜିକ୍ସ୍ ବିଭାଗ ପକ୍ଷରୁ ହୋଇଥିବା ଗବେଷଣା ରିପୋର୍ଟରେ ଉଲ୍ଲେଖ କରାଯାଇଛି। ବ୍ରହ୍ମାଣ୍ଡର ବିଭିନ୍ନ ଗ୍ୟାସ୍ର ତାପମାତ୍ରା ଲଗାତାର ବଢିବାରେ ଲାଗିଛି। ସମ୍ପ୍ରତି ଏହା ୨୦ ଲକ୍ଷ ଡିଗ୍ରୀ କ୍ୱିଲେନ୍ ତାପମାତ୍ରାରେ ପହଞ୍ଚିଛି। ଯାହାକି ୪ ନିୟୁତ ଫାରେନହାଇଟ୍ ଡିଗ୍ରୀ ସହିତ ସମାନ। ବୈଜ୍ଞାନିକ ଜିମ୍ ପିବଲ୍ସ୍ଙ୍କ ଅନୁସାରେ ବ୍ରହ୍ମାଣ୍ଡର ଗୁରୁତ୍ୱାକର୍ଷଣ ଶକ୍ତି ଯୋଗୁ ତାପମାତ୍ରା ବୃଦ୍ଧି ପାଇଛି। ଗବେଷଣାରେ ପ୍ଲାଙ୍କ୍ ଏବଂ ସ୍ଲୋଅନ୍ ଡିଜିଟାଲ ସ୍କାଏ ସର୍ଭେ ଡାଟାର ଉପଯୋଗ କରାଯାଇଛି। ଆକାଶଗଙ୍ଗାର ପ୍ରାକୃତିକ ସଂରଚନା ଏବଂ ପ୍ରକ୍ରିୟା ଯୋଗୁ ବ୍ରହ୍ମାଣ୍ଡର ତାପମାତ୍ରା ବୃଦ୍ଧି ହାର ଅଧିକ ରହୁଛି। ବ୍ରହ୍ମାଣ୍ଡ ଆକାଶ ଗଙ୍ଗାରେ ଥିବା ବିଭିନ୍ନ ପଦାର୍ଥ ଏବଂ ଗ୍ୟାସକୁ ନିଜର ଗୁରୁତ୍ୱାକର୍ଷଣ ଶକ୍ତି ଯୋଗୁ ନିଜ ଆଡ଼କୁ ଟାଣିବାରେ ଲାଗିଛି। ଅପରପକ୍ଷରେ ଗ୍ୟାସ୍ ଏବଂ ଅନ୍ୟ ପଦାର୍ଥ ମଧ୍ୟ ଆକାଶଗଙ୍ଗା ଉପରେ ଆକର୍ଷଣ ଶକ୍ତି ସୃଷ୍ଟି କରୁଛନ୍ତି। ଏହା ଦାରା ସୃଷ୍ଟି ହେଉଥିବା ଶକ୍ତି ଯୋଗୁ ଗ୍ୟାସ୍ର ତାପମାତ୍ରା ପୂର୍ବାପେକ୍ଷା ବଢ଼ିଛି। ଆକାଶଗଙ୍ଗାରେ ଲାଗି ରହିଥିବା ଗୁରୁତ୍ୱାକର୍ଷଣର ପ୍ରଭାବ ପୃଥିବୀ ଉପରେ ମଧ୍ୟ ପଡୁଛି। ଏହାର ଯୋଗୁ ପୃଥିବୀ ସମେତ ଅନ୍ୟ ଗ୍ରହଗୁଡ଼ିକରେ ଥିବା ଗ୍ୟାସର ତାପମାତ୍ରା ମଧ୍ୟ ବଢ଼ିବାରେ ଲାଗିଥିବା କୁହାଯାଉଛି। ତେବେ ପୃଥିବୀର ତାପମାତ୍ରା ବୃଦ୍ଧି ପାଇଁ ଅନ୍ୟ କାରଣ ମଧ୍ୟ ରହିଛି। ୧୮୭୦ଠାରୁ ଶିଳ୍ପାୟନ ଧାରା ଜାରି ରହିବା ଯୋଗୁ ଏହାର ପ୍ରଭାବ ପୃଥିବୀର ତାପମାନ ଉପରେ ପଡ଼ିବାରେ ଲାଗିଛି। ସେହିପରି ଦ୍ୱିତୀୟ ବିଶ୍ୱଯୁଦ୍ଧ ପରେ କ୍ରମାଗତ ଏଥିରେ ବୃଦ୍ଧି ହେଉଥିବା ଏହି ରିପୋର୍ଟରେ ଦର୍ଶାଯାଇଛି। ବାୟୁମଣ୍ଡଳରେ ଅଙ୍ଗାରକାମ୍ଳର ପରିମାଣ ୨୦୧୩ରେ ନିୟୁତ ପିଛା(ପିପିଏମ୍) ୪ ଶହ ଥିଲା। ଗତ ୩ ଦଶନ୍ଧି ଧରି ଏକ ନିର୍ଦ୍ଦିଷ୍ଟ ଅନୁପାତରେ ବିଶ୍ୱତାପନ ବଢୁଛି। ୨୦୧୪ରେ ଏଲନିନୋ ଭୂମଧ୍ୟ ରେଖାର ମଧ୍ୟ ପୂର୍ବ ପ୍ରଶାନ୍ତସାଗରୀୟ ଅଞ୍ଚଳରେ ସୃଷ୍ଟି ହୋଇଥିଲା। ଏହର ପ୍ରଭାବଯୋଗୁ ମଧ୍ୟ ବିଶ୍ୱ ତାପମାନ ସଙ୍କଟ ସ୍ଥିତିରେ ପହଞ୍ଚିଥିଲା । ଏହାଯୋଗୁ ଆଗାମୀ ଦିନରେ ପୃଥିବୀ ଉପରେ ବିପଦ ଘନେଇ ଆସୁଛି ବୋଲି ଏହି ରିପୋର୍ଟରେ ପ୍ରକାଶ ପାଇଛି।
