ଭଣ୍ଡାରିପୋଖରୀ,୨୪।୭(ଡି.ଏନ୍.ଏ.): ଉପରମୁଣ୍ଡରେ ଲଘୁଚାପ ଜନିତ ବର୍ଷା ଯୋଗୁ ବୈତରଣୀ ନଦୀରେ ଦ୍ୱିତୀୟ ବନ୍ୟା ଆସିଛି। ଶନିବାର ଭଦ୍ରକ ଜିଲା ଭଣ୍ଡାରିପୋଖରୀ ଆଖୁଆପଦା ଆନିକଟଠାରେ ବୈତରଣୀ ଜଳସ୍ତର ବିପଦ ସଙ୍କେତ ଟପିଛି। ରାତି ୧୦ଟା ସୁଦ୍ଧା ୧୭.୯୫ ମିଟର ଛୁଇଁଛି ଜଳସ୍ତର।
ସୂଚନା ଅନୁସାରେ, ଆଖୁଆପଦାଠାରେ ବିପଦ ସଙ୍କେତ ୧୭.୮୩ ମିଟର ରହିଥିବା ବେଳେ ଅପରାହ୍ନ ସାଢ଼େ ୩ଟାରେ ଏହା ଅତିକ୍ରମ କରିଥିଲା। ଗତ ୨୪ ଘଣ୍ଟା ମଧ୍ୟରେ ବୈତରଣୀ ଉପରମୁଣ୍ଡରେ ହୋଇଥିବା ବର୍ଷା ରେକର୍ଡ ଅନୁଯାୟୀ ସର୍ବାଧିକ ଚମ୍ପୁଆରେ ୯୯.୦୪ ସେମି, କେନ୍ଦୁଝରରେ ୪୯.୦୦, ଠାକୁରମୁଣ୍ଡାରେ ୨୧.୦୦, ଆନନ୍ଦପୁରରେ ୧୨.୦୬, ସ୍ବାମପାଟଣାରେ ୩୨.୦୦ ଓ ଆଖୁଆପଦାରେ ୧.୦୪ ସେମି ବର୍ଷା ହୋଇଛି। ତେବେ ମଧ୍ୟରାତ୍ରି ସୁଦ୍ଧା ନଦୀର ଜଳସ୍ତର ବୃଦ୍ଧି ପାଇ ୧୮ ମିଟର ପର୍ଯ୍ୟନ୍ତ ଯାଇ ସ୍ଥିର ରହିବ ବୋଲି ଆଖୁଆପଦା ବନ୍ୟା ନିୟନ୍ତ୍ରଣ କକ୍ଷ ସୂତ୍ରରୁ ଜଣାଯାଇଛି। ପ୍ରକାଶ ଯେ, ଚଳିତବର୍ଷ ମେ’ରେ ବୈତରଣୀରେ ପ୍ରଥମ ବନ୍ୟା ଆସିଥିଲା।
