କେନ୍ଦୁଝର,୧୪ା୧୧(ସ୍ବ.ପ୍ର.): ବିଳମ୍ବରେ ସ୍କୁଲ ଆସିବାକୁ ନେଇ ୬ ଶିକ୍ଷକଙ୍କ ଦିନକର ଦରମା ବନ୍ଦ ହୋଇଛି। କେନ୍ଦୁଝର ଜିଲା ଶିକ୍ଷା ଅଧିକାରୀ ପୂର୍ଣ୍ଣଚନ୍ଦ୍ର ସେଠୀ ଶନିବାର ୨ ସ୍କୁଲ୍ ପରଦର୍ଶନ ସମୟରେ ଶିକ୍ଷକଙ୍କ ଅନୁପସ୍ଥିତି ଦେଖି ଏଭଳି କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି। ଖବର ପ୍ରଚାର ପରେ ଆଦୌ ସ୍କୁଲ ଯାଉ ନ ଥିବା ଶିକ୍ଷକଙ୍କ ମଧ୍ୟରେ ଛନକା ପଶିଛି। ସୂଚନା ମୁତାବକ, ଜିଲାର ଅନେକ ବିଦ୍ୟାଳୟରେ ପ୍ରତିଦିନ ଶିକ୍ଷକମାନେ ବିଳମ୍ବରେ ଆସି ଶୀଘ୍ର ଘରକୁ ଯାଉଥିବା ନେଇ ଅଭିଯୋଗ ହୋଇ ଆସୁଥିଲା। ଏନେଇ ଶନିବାର ଜିଲା ଶିକ୍ଷା ଅଧିକାରୀ ଆନନ୍ଦପୁର ବ୍ଲକ୍ ଧକୋଠା ସରକାରୀ ହାଇସ୍କୁଲ ଏବଂ କୋଳିମାଟିସ୍ଥିତ ସ୍ବପ୍ନେଶ୍ୱର ଆଦିବାସୀ ହାଇସ୍କୁଲ ପରିଦର୍ଶନ କରିଥିଲେ। ସ୍କୁଲ୍ ସମୟ ସକାଳ ୬ଟା ୩୦ ହୋଇଥିଲେ ହେଁ ଧକୋଠା ସରକାରୀ ହାଇସ୍କୁଲର ଶିକ୍ଷୟିତ୍ରୀ ନିବେଦିତା ସାହୁ, ସୁଜାତା ଦଳେଇ ଏବଂ କୋଳିମାଟି ସ୍ବପ୍ନେଶ୍ୱର ଆଦିବାସୀ ହାଇସ୍କୁଲର ଶିକ୍ଷକ ତପନ ଚକ୍ର, ବିନୟ ଭୂଷଣ ମିଶ୍ର, ନିରଞ୍ଜନ ମିଶ୍ର, ଯୁଗଳ କିଶୋର ବାରିକ ଅନୁପସ୍ଥିତ ଥିଲେ। ଶିକ୍ଷାଧିକାରୀ ଦେଖିବା ପରେ ସମସ୍ତ ଶିକ୍ଷକଙ୍କ ଗୋଟିଏ ଦିନର ଦରମା ବନ୍ଦ ନିର୍ଦ୍ଦେଶ ଦେଇଥିଲେ। ଆଗାମୀ ଦିନରେ ଜିଲାର ଅନ୍ୟ ସମସ୍ତ ବିଦ୍ୟାଳୟରେ ଅଚାନକ ପରିଦର୍ଶନ କରାଯିବ ବୋଲି ସେଠୀ ପ୍ରକାଶ କରିଛନ୍ତି।
