ଢେଙ୍କାନାଳ ଅଫିସ, ୨୪।୯: ଛାତ୍ରାବାସକୁ ବିତିଲାଣି ୪୦ବର୍ଷ। କେଉଁଠି କୋଠା ଛାତ ଫାଟି ଆଁ କରିଛି ତ ଆଉ କେଉଁଠି କାନ୍ଥ। ସମୟେ ସମୟେ ମୁଣ୍ଡା ମୁଣ୍ଡା ହୋଇ ଖସୁଛି ସିମେଣ୍ଟ କଂକ୍ରିଟ୍। କବାଟ, ଝରକା ଅବସ୍ଥା ନ କହିବା ଭଲ। କେବଳ ହଷ୍ଟେଲ ନୁହେଁ, ଷ୍ଟାଫ୍ କ୍ୱାର୍ଟର୍ସ ସ୍ଥିତି ମଧ୍ୟ ସଙ୍ଗିନ। ମାଳମାଳ ବିଷଧର ସର୍ପ, ବିଷାକ୍ତ କୀଟପତଙ୍ଗଙ୍କ ଆଶ୍ରୟ ସ୍ଥଳୀ ପାଲଟିଛି। ଏମିତି ନୁହେଁ, ଛାତ୍ରାବାସ ପାଇଁ ବିକଳ୍ପ ହୋଇନି। ୩ ବର୍ଷ ହେଲା ୪ କୋଟି ଟଙ୍କା ବ୍ୟୟରେ ନିର୍ମିତ ହଷ୍ଟେଲ ଲୋକାର୍ପଣ ହୋଇ ଅନ୍ତେବାସୀଙ୍କ ଅପେକ୍ଷାରେ ରହଛି। ହେଲେ ଶଯ୍ୟା, ରୋଷେଇ ସାମଗ୍ରୀ ଉପଲବ୍ଧ ନ ଥିବାରୁ ଏହାର ତାଲା ଖୋଲୁନି କି କୌଣସି କାମରେ ଲାଗୁନି। ଫଳରେ ଭଙ୍ଗା ଦଦରା କୋଠାରେ ଅତି ଦୟନୀୟ ଅବସ୍ଥାରେ ବିପଦ ମୁଣ୍ଡାଇ ରହୁଛନ୍ତି ଢେଙ୍କାନାଳ ସ୍ବୟଂଶାସିତ ମହାବିଦ୍ୟାଳୟର ଅନ୍ତେବାସୀ ଏବଂ କର୍ମଚାରୀ।
ଦୀର୍ଘ ୪୦ ବର୍ଷ ତଳେ ଢେଙ୍କାନାଳ ସ୍ବୟଂଶାସିତ ମହାବିଦ୍ୟାଳୟ କ୍ୟାମ୍ପସରେ ନିର୍ମାଣ କରାଯାଇଥିଲା ୨୦ରୁ ଊର୍ଦ୍ଧ୍ୱ ଦୁଇ ମହଲା ବିଶିଷ୍ଟ ଷ୍ଟାଫ୍ କ୍ୱାର୍ଟର୍ସ। ଗୋଟିଏ ବ୍ଲକ୍ରେ ୪ କ୍ୱାର୍ଟର୍ସ ଅର୍ଥାତ୍ ୪ ପରିବାର ରହିବା ଭଳି ବ୍ୟବସ୍ଥା କରାଯାଇଥିଲା। ତେବେ ଦୀର୍ଘଦିନ ଧରି ମରାମତି ଅଭାବରୁ ଏସବୁ କୋଠା ଅତିମାତ୍ରାରେ ବିପଦସଙ୍କୁଳ ହୋଇପଡ଼ିଛି। ସାମାନ୍ୟ ବର୍ଷା ହେଲେ ଛାତରୁ ପାଣି ଗଳୁଛି। କବାଟ, ଝରକା ନଷ୍ଟ ହୋଇଗଲାଣି। ପାହାଡ଼କୁ ଲାଗି ରହିଥିବାରୁ ଘରେ ବଡ଼ ବଡ଼ ବିଷାକ୍ତ ସାପ ପଶୁଛନ୍ତି। ଖୋଦ୍ ଅଧ୍ୟକ୍ଷ ମଧ୍ୟ ଜରାଜୀର୍ଣ୍ଣ କ୍ୱାର୍ଟର୍ସରେ ରହୁଛନ୍ତି। ଅନୁରୂପ ସମସ୍ୟା ଦେଖିବାକୁ ମିଳିଛି ‘ବାଜି ରାଉତ ଛାତ୍ରାବାସ-୧’ରେ। ହଷ୍ଟେଲ ଛାତ, କାନ୍ଥ ସବୁ ଭାଙ୍ଗିରୁଜି ଗଲାଣି। ଅନ୍ତେବାସୀମାନେ ଜୀବନକୁ ପାଣି ଛଡ଼ାଇ ରହୁଛନ୍ତି। କୌଣସି ମୁହୂର୍ତ୍ତରେ ଅଘଟଣ ଘଟିବା ଆଶଙ୍କା ରହିଥିବାରୁ ବିକଳ୍ପ ସ୍ବରୂପ ଛାତ୍ରାବାସ ନିକଟରେ ରାଜ୍ୟ ସରକାରଙ୍କ ପୂର୍ତ୍ତ ବିଭାଗ ପକ୍ଷରୁ ୪ କୋଟିରୁ ଊର୍ଦ୍ଧ୍ୱ ଟଙ୍କା ବ୍ୟୟରେ ୩୦୦ ଶଯ୍ୟାବିଶିଷ୍ଟ ‘କପିଳାସ ଛାତ୍ରାବାସ-୨’ ନିର୍ମାଣ କରାଯାଇଛି। ୨୦୧୯ ଜାନୁୟାରୀ ୨୮ରୁ ଲୋକାର୍ପଣ ହୋଇ ଏହା ବ୍ୟବହାର ଅପେକ୍ଷାରେ ରହିଛି। ହେଲେ ଅନ୍ତେବାସୀଙ୍କ ପାଇଁ ଆବଶ୍ୟକ ଶଯ୍ୟା କିମ୍ବା ରୋଷେଇ ଉପକରଣ ବ୍ୟବସ୍ଥା କରାଯାଇ ନ ଥିବାରୁ ଲୋକାର୍ପଣର ୩ବର୍ଷ ପରେ ବି ଏହି ଛାତ୍ରାବାସ କାର୍ଯ୍ୟକ୍ଷମ ହୋଇପାରିନାହିଁ। ଫଳରେ ଛାତ୍ରାବାସ ଉପରେ ନିର୍ଭରଶୀଳ ଅନ୍ତେବାସୀ ପୁରୁଣା ହଷ୍ଟେଲରେ ଭାଗ୍ୟକୁ ଆଦରି ପଡ଼ିରହିଛନ୍ତି। ଜରାଜୀର୍ଣ୍ଣ କ୍ୱାର୍ଟର୍ସରେ ଜୀବନ ପ୍ରତି ବିପଦ ଥିବାରୁ ଅଧିକାଂଶ ଅଧ୍ୟାପିକା, ଅଧ୍ୟାପକ ରହୁନାହାନ୍ତି। ସେମାନେ କଟକ ଓ ଭୁବନେଶ୍ୱରରୁ ଯିବାଆସିବା କରୁଛନ୍ତି। ସମସ୍ୟା ସମ୍ପର୍କରେ ପ୍ରତିବର୍ଷ କଲେଜ କର୍ତ୍ତୃପକ୍ଷ ରାଜ୍ୟ ସରକାର, ଉଚ୍ଚ ଶିକ୍ଷା ବିଭାଗକୁ ଜଣାଉଥିଲେ ମଧ୍ୟ ଏହି ପୁରାତନ ଶିକ୍ଷାନୁଷ୍ଠାନର ସମସ୍ୟା ସମାଧାନ ଦିଗରେ କେହି ଆନ୍ତରିକତା ଦେଖାଉନାହାନ୍ତି, ଯାହାକୁ ନେଇ ଅସନ୍ତୋଷ ବଢ଼ିବାରେ ଲାଗିଛି।
ଏ ସଂକ୍ରାନ୍ତରେ କଲେଜ ଅଧ୍ୟକ୍ଷ ରଞ୍ଜିତ ପ୍ରଧାନ କୁହନ୍ତି, ବହୁ ପୁରୁଣା ଷ୍ଟାଫ୍ କ୍ୱାର୍ଟର୍ସ ମରାମତି ଅଭାବରୁ ବିପଦସଙ୍କୁଳ ଅବସ୍ଥାରେ ରହିଛି। ପୂର୍ତ୍ତ ବିଭାଗ ଅଧୀକ୍ଷଣ ଯନ୍ତ୍ରୀ ଏବଂ ଅନ୍ୟ ବିଭାଗୀୟ ଅଧିକାରୀମାନେ ଦୁଇଦିନ ତଳେ ପରିଦର୍ଶନ କରି ଯାଇଛନ୍ତି। ନୂତନ କ୍ୱାର୍ଟର୍ସ ନିର୍ମାଣ ପାଇଁ ପ୍ରସ୍ତାବ ଦେବାକୁ ସେମାନେ କହିଛନ୍ତି। ସେହିପରି ବାଜି ରାଉତ ଛାତ୍ରାବାସ-୧କୁ ମରାମତି କରିବାକୁ ପୂର୍ତ୍ତ ବିଭାଗକୁ କୁହାଯାଇଛି। ନୂତନ କପିଳାସ ଛାତ୍ରାବାସ-୨ରେ ଶଯ୍ୟା ଅଭାବ ସମ୍ପର୍କରେ ସରକାରଙ୍କ ଦୃଷ୍ଟି ଆକର୍ଷଣ କରିବା ପରେ ବିଶ୍ୱବ୍ୟାଙ୍କ ପକ୍ଷରୁ ୩୦ ଲକ୍ଷ ଟଙ୍କା ମଞ୍ଜୁର ହୋଇଛି। ଖୁବ୍ଶୀଘ୍ର ଟେଣ୍ଡର କରି ଶଯ୍ୟା ଏବଂ ରୋଷେଇ ସାମଗ୍ରୀ ବ୍ୟବସ୍ଥା କରାଯିବ। ପୂର୍ତ୍ତ ବିଭାଗ ଅଧୀକ୍ଷଣ ଯନ୍ତ୍ରୀ ମନୋରଞ୍ଜନ ବିଶ୍ୱାଳ କୁହନ୍ତି, ଷ୍ଟାଫ୍ କ୍ୱାର୍ଟର୍ସଗୁଡ଼ିକ ପ୍ରାୟ ୪୦-୫୦ ବର୍ଷ ପୁରୁଣା। ସେସବୁ ଆଉ ମରାମତି ହେବା ଅବସ୍ଥାରେ ନାହିଁ। ନୂଆ କ୍ୱାର୍ଟର୍ସ ନିର୍ମାଣ ପାଇଁ ପ୍ରାୟ ୪ କୋଟି ଟଙ୍କା ଖର୍ଚ୍ଚ ହେବ। ଏ ଦିଗରେ ବିଭାଗ ପକ୍ଷରୁ ପଦକ୍ଷେପ ନିଆଯାଉଛି। ତେବେ ୨୦୧୯ରୁ ନୂତନ ହଷ୍ଟେଲ କୋଠା କଲେଜ କର୍ତ୍ତୃପକ୍ଷଙ୍କୁ ହସ୍ତାନ୍ତର କରାଯାଇଥିବା ସେ ସୂଚନା ଦେଇଛନ୍ତି।