ପଟ୍ଟାଙ୍ଗି,୨୮ା୧୦(ଶରତ କୁମାର ଧଳ)-ବାତ୍ୟା ମୋନ୍ଥାର ଗତିବିଧିକୁ ନେଇ କୋରାପୁଟ ଜିଲା ଆନ୍ଧ୍ର ସୀମାନ୍ତବର୍ତ୍ତୀ ପଟ୍ଟାଙ୍ଗି ବ୍ଲକ୍କୁ ଜିଲା ପ୍ରଶାସନ ପକ୍ଷରୁ ସ୍ବତନ୍ତ୍ର ନଜରରେ ରଖାଯାଇଛି। ଜିଲାପାଳ ମନୋଜ ସତ୍ୟବାନ ମହାଜନଙ୍କ ନିର୍ଦ୍ଦେଶ କ୍ରମେ ତହସିଲଦାର ଦେବେନ୍ଦ୍ର ବାହାଦୂର ସିଂ ଧାରୁଆ ଏବଂ ବିଡିଓ ରାମକ୍ରିଷ୍ନା ନାୟକ ପ୍ରସ୍ତୁତି ଆରମ୍ଭ କରିଛନ୍ତି। ବାତ୍ୟା ପ୍ରଭାବରେ କୌଣସି ଧନଜୀବନ ନଷ୍ଟ ନ ହେବା ପ୍ରତି ଧ୍ୟାନ ଦେବାକୁ ଜିଲାପାଳ ନିର୍ଦ୍ଦେଶ ଦେଇଛନ୍ତି। ଏହାକୁ ଦୃଷ୍ଟିରେ ରଖି ୨ ଅଧିକାରୀଙ୍କ ତତ୍ତ୍ୱାବଧାନରେ ବ୍ଲକ୍ର ରାଲେଗଡା, ଚନ୍ଦକା, ପେଟୁରୁ, ପଟ୍ଟାଙ୍ଗି ଅମ୍ପାବାଲି, ଦେଓପଟ୍ଟାଙ୍ଗି ଓ ସମ୍ବାଇ ଆଦି ପଞ୍ଚାୟତରେ ୮ ଆଶ୍ରୟସ୍ଥଳୀ କରାଯାଇଛି। ଖବର ଲେଖାଯିବା ସୁଦ୍ଧା ୧୨୧ଜଣଙ୍କୁ ଆଶ୍ରୟସ୍ଥଳୀକୁ ସ୍ଥାନାନ୍ତର କରାଯାଇଛି। ବାତ୍ୟାର ପ୍ରଭାବରେ ବିଭିନ୍ନ ପଞ୍ଚାୟତରେ ଭାଙ୍ଗିଥିବା ୧୫ ଘରକୁ ପଲିଥିନ୍ ପ୍ରଦାନ କରାଯାଇଛି। ଆଶ୍ରୟସ୍ଥଳୀରେ ରନ୍ଧା ଖାଦ୍ୟ ପ୍ରସ୍ତୁତ କରି ଲୋକଙ୍କୁ ପ୍ରଦାନ କରାଯାଇଛି। ବାତ୍ୟାର ପ୍ରଭାବରେ ମଙ୍ଗଳବାର ବ୍ଲକ୍ର ସୁଙ୍କି ମୁଙ୍ଗାରଗୁମି, ସମ୍ବାଇ ସୁନାବେଡା ଘାଟି ଓ ଗାଙ୍ଗରାଜପୁର ପଞ୍ଚାୟତର କାଉଗୁଣ୍ଠା ନୂତନ ପ୍ରାଥମିକ ବିଦ୍ୟାଳୟ ଉପରେ ଗଛ ପଡିଯାଇଥିବା ଦେଖିବାକୁ ମିଳିଛି। ଘଟଣାସ୍ଥଳକୁ ଓଡ୍ରାଫ୍ ଟିମ୍ ଯାଇ ରାସ୍ତା ଓ ଘାଟି ସଫା କରିଥିଲେ। ବିଦ୍ୟାଳୟ ଉପରୁ ଗଛ କଡାଯାଇଥିବା ବିଡିଓ ନାୟକ ପ୍ରକାଶ କରିଛନ୍ତି। ବାତ୍ୟାର ପ୍ରକୋପ ବଢିବାରେ ଲାଗିଥିବାରୁ ଆନ୍ଧ୍ର ସୀମାନ୍ତ ଅଞ୍ଚଳରେ ଭୟର ବାତାବରଣ ଦେଖିବାକୁ ମିଳିଛି। ଏହି ଜରୁରୀକାଳିନ ସମୟରେ ପଞ୍ଚାୟତ ଓ ଆଶ୍ରୟସ୍ଥଳୀରୁ କୌଣସି ଖବର ବ୍ଲକ୍ ପ୍ରଶାସନ ନିକଟରେ ପହଞ୍ଚିବା ପାଇଁ ମୋବାଇଲ ନେଟୱର୍କ ବାଧକ ସାଜିଥିବା ଦେଖିବାକୁ ମିଳିଛି।
