ରାଜନଗର, ୨୦ା୬ (ଭାସ୍କର ରାଉତରାୟ): ୟୁଏସ ନାଗରିକଙ୍କଠାରୁ ୬ ଲକ୍ଷ ୨୫ ହଜାର ଡଲାର ଲୁଟି ନେଇଛନ୍ତି ସାଇବର ଠକ। ଯାହାର ଭାରତୀୟ ମୁଦ୍ରାରେ ୫ କୋଟିରୁ ଊର୍ଦ୍ଧ୍ୱ ହେବ। ରାଜନଗର ଥାନା ଅଞ୍ଚଳର ଜଣେ ଯୁବକଙ୍କ ସହ ୩ ଜଣ ଯୁବକ ନିଜ ନାଁ ବଦଳାଇ ଅନ୍ଲାଇନରେ ଲ୍ୟାପଟପ୍ ରିପ୍ୟାରିଂ କରିବା ନାଁରେ ୟୁସ୍ ନାଗରିକଙ୍କଠାରୁ ଏହି ଟଙ୍କା ଲୁଟି ନେଇଛନ୍ତି। ଦିଲ୍ଲୀ ସାଇବର ପୋଲିସ ଏହି ସାଇବର ଠକେଇରରେ ସମ୍ପକ୍ତ ଥିବା ରାଜନଗର ଥାନା ଅନ୍ତର୍ଗତ ଚନ୍ଦନପୁର ଗାଁର ସୁବ୍ରତ ଦାସଙ୍କୁ ରବିବାର ରାତିରେ ପେଣ୍ଠ ବେଳାଭୂମିରୁ ଗିରଫ କରିଛି। ସୁବ୍ରତଙ୍କୁ ସୋମବାର ରାଜନଗର ଜେଏମ୍ଏଫ୍ସି କୋର୍ଟରେ ହାଜର କରିବା ପରେ ଦିଲ୍ଲୀ ସାଇବର ପୋଲିସ ନେଇଯାଇଛି।
ପୋଲିସ ସୂତ୍ରରୁ ମିଳିଥିବା ସୂଚନା ମୁତାବକ, ୟୁଏସ୍ର ଜୋସ୍ ଆଣ୍ଟୋନିଓ କୋଡେରୋ(୫୯)ଙ୍କ ଲ୍ୟାପଟପ ଖରାପ ହେବାରୁ ସେ ଗ୍ରୀକ୍ ସ୍କ୍ବାର୍ଡ ସହ ଯୋଗାଯୋଗ କରିଥିଲେ। ଦିଲ୍ଲୀରେ ରହୁଥିବା ରାଜନଗରର ସୁବ୍ରତ ଦାସ ଓରଫ ଅଷ୍ଟିମ, ସୁମନ ଓରଫ ଜୋନ୍, କୁନାଲ ସିଂ ଓରଫ ଖ୍ରୀଷ୍ଟଫର ନିଜକୁ ଗ୍ରୀକ୍ ସପ୍ଟୱେର କମ୍ପାନୀର କର୍ମଚାରୀ ଦର୍ଶାଇ ୟୁଏସ୍ର ଜୋସ୍ ଆଣ୍ଟୋନିଓ କୋଡେରୋଙ୍କ ସହ କଥା ହୋଇଥିଲେ। ଲ୍ୟାପଟପକୁ ସଜାଡ଼ିବା ପାଇଁ ଟିମ୍ ଭିୟୋର ଡାଉନଲୋଡ କରିବାକୁ କହିଥିଲେ। ପରେ ଅଷ୍ଟିମ ଟେକ୍ନିସିଆନ ସାଜି କଥା ହୋଇଥିଲେ। ଜୋନ୍ ଓ ଅଷ୍ଟିମଙ୍କ କଥାରେ ବିଶ୍ୱାସ କରି ଜୋସ୍ ଆଣ୍ଟୋନିଓ ତାଙ୍କର ବ୍ୟାଙ୍କ ଡିଟେଲ ଦେଇଥିଲେ। ସାଇବର ହ୍ୟାକର ହ୍ୟାକ୍ କରି ଦେଇଥିବାରୁ ବ୍ୟାଙ୍କ ଆକାଉଣ୍ଟରେ ଥିବା ଟଙ୍କାକୁ ସେଫ୍ ଆକାଉଣ୍ଟରେ ଡିପୋଜିଟ କରିବାକୁ ପଡ଼ିବ ଓ ପରେ ଟ୍ରାନ୍ସଫର କରି ଦିଆଯିବ ବୋଲି ଜୋନ୍ ଓ ଅଷ୍ଟିମ କହିଥିଲେ। ନଚେତ୍ ହ୍ୟାକର ସମସ୍ତ ଟଙ୍କା ନେଇଯିବ ବୋଲି କହିଥିଲେ। ହ୍ୟାକରଙ୍କ କବଳରୁ ଟଙ୍କାକୁ ରକ୍ଷା କରିବାକୁ ଯାଇ ୟୁଏସ୍ ନାଗରିକ ହ୍ୟାକରଙ୍କ କବଳରେ ପଡ଼ି ଯାଇଥିଲେ। ୩ଟି ପର୍ଯ୍ୟାୟରେ ସାଇବର ଠକ ୬ ଲକ୍ଷ ୨୫ ହଜାର ଡଲାର ଅନ୍ୟ ଆକାଉଣ୍ଟକୁ ନେଇ ଆସିଥିଲେ। ଏହି ୩ଜଣଙ୍କ ସହ ଯୋଗାଯୋଗ ବିଚ୍ଛିନ୍ନ ହେବା ପରେ ୟୁଏସ୍ର ଜୋସ୍ ଆଣ୍ଟୋନିଓ ଦିଲ୍ଲୀ ସାଇବର ଥାନାରେ ଏତଲା ଦେଇଥିଲେ। ପୋଲିସ ଖୋଳତାଡ଼ କରିବା ପରେ ୩ଜଣ ମୋବାଇଲ ସୁଇଚ ଅଫ୍ କରି ଫେରାର ହୋଇଯାଇଥିଲେ। ମୋବାଇଲ ଟ୍ରାକିଂ କରି ଦିଲ୍ଲୀ ସାଇବର ପୋଲିସ ଇନ୍ସପେକ୍ଟର ଜନିତ୍ ମଲ୍ଲିକଙ୍କ ନେତୃତ୍ୱରେ ୪ ଜଣିଆ ଟିମ୍ ରବିବାର ରାତିରେ ରାଜନଗର ଥାନାରେ ପହଞ୍ଚତ୍ ଥିଲେ। ରାଜନଗର ପୋଲିସ୍ ସହାୟତାରେ ପେଣ୍ଠ ବେଳାଭୂମି ନିକଟରୁ ସୁବ୍ରତଙ୍କୁ କାବୁ କରି ନେଇଥିଲେ।
