କଟକ,୨୯।୭(ଶିଳ୍ପା ପ୍ରିୟଦର୍ଶିନୀ): ବାରବାଟୀ ଷ୍ଟାଡିୟମ ନବୀକରଣ କାର୍ଯ୍ୟ ନେଇ ଲାଗି ରହିଥିବା ବିବାଦ ବଢ଼ିବାରେ ଲାଗିଛି। ଏହି ପ୍ରସଙ୍ଗରେ କଟକ ମେୟର ସୁବାସ ସିଂଙ୍କୁ ଟାର୍ଗେଟ କରିଛନ୍ତି ଓସିଏ ସମ୍ପାଦକ ସଞ୍ଜୟ ବେହେରା। ସୁବାସ ଦ୍ୱନ୍ଦ୍ୱରେ ରହି ଗଣମାଧ୍ୟମ ସମ୍ମୁଖରେ ବିଭ୍ରାନ୍ତିକର ମନ୍ତବ୍ୟ ଦେଇଥିବାରୁ ସଞ୍ଜୟ ତାଙ୍କୁ ସମାଲୋଚନା କରିଛନ୍ତି।
ଓସିଏ ସମ୍ମିଳନୀ କକ୍ଷରେ ରବିବାର ଆୟୋଜିତ ଖବରଦାତା ସମ୍ମିଳନୀରେ ସଞ୍ଜୟ କହିଛନ୍ତି, ବାରବାଟୀ ଷ୍ଟାଡିୟମ୍ ନବୀକରଣ କାର୍ଯ୍ୟ ନେଇ ଯେଉଁ ଯୋଜନା କରାଯାଇଥିଲା ତାହା ଚାଲିଛି। ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସରକାର ସମୟରେ ଅଲିମ୍ପିକ ଆସୋସିଏଶନର ଲିଜ୍ ଅବଧିକୁ ବୃଦ୍ଧି କରିବା ନେଇ କ୍ୟାବିନେଟ୍ରେ ଅନୁମତି ମିଳିଥିଲା। ଏହାସହ ସେ ଘୋଷଣା କରିଥିଲେ, ନିର୍ବାଚନରେ ବିଜେଡି ସରକାର ଗଢ଼ିଲେ ବାରବାଟୀର ରୂପରେଖ ବଦଳାଇବା ସହ ନବୀକରଣ କାର୍ଯ୍ୟ ହାତକୁ ନେବା ପାଇଁ। କିନ୍ତୁ ଏନେଇ ମେୟର ଶନିବାର ଗଣମାଧ୍ୟମକୁ ମିଥ୍ୟା ତଥ୍ୟ ପ୍ରଦାନ କରିଛନ୍ତି। ତତ୍କାଳୀନ ସରକାର ୭୦୦ କୋଟି ଟଙ୍କାର ବଜେଟ କରି ନାହାନ୍ତି। ଏପରି କି କୌଣସି ବଜେଟ କ୍ୟାବିନେଟ୍ରେ ମଞ୍ଜୁର ହୋଇନାହିଁ କିମ୍ବା କୌଣସି ଏମ୍ଓୟୁ କରାଯାଇନାହିଁ। ବାରବାଟୀ ନବୀକରଣ କାର୍ଯ୍ୟ ନେଇ ଭିତ୍ତିପ୍ରସ୍ତର ମଧ୍ୟ ସ୍ଥାପନ କରାଯାଇନାହିଁ। ମେୟର ଯେଉଁ ମନ୍ତବ୍ୟ ଦେଇଛନ୍ତି, ତାଙ୍କୁ ସାଙ୍ଗରେ ନେଇ ତତ୍କାଳୀନ ମୁଖ୍ୟମନ୍ତ୍ରୀଙ୍କ ପାଖକୁ ଯାଇ ବାରବାଟୀ ନବୀକରଣ କାର୍ଯ୍ୟ ଲାଗି ଆଲୋଚନା କରିଥିଲେ, ତାହା ଭିତ୍ତିହୀନ। ବାରବାଟୀର କୌଣସି କାର୍ଯ୍ୟ ହେଲେ ସେଥିରେ ବାରବାଟୀ-କଟକର ବିଧାୟିକା, ମେୟର ଓ ଅନ୍ୟ ନେତୃବୃନ୍ଦଙ୍କ ଉପସ୍ଥିତି ଗୁରୁତ୍ୱପୂର୍ଣ୍ଣ। କିନ୍ତୁ ଏଭଳି ଭୁଲ୍ ତଥ୍ୟ ଦେଇ କଟକବାସୀଙ୍କୁ ଦ୍ୱନ୍ଦ୍ୱରେ ପକାଉଛନ୍ତି ମେୟର। ବାରବାଟୀକୁ ନେଇ ପୂର୍ବରୁ ବିଭିନ୍ନ ଲୋକ ଭିନ୍ନ ମତ ଦେଉଥିବାରୁ ସେଥିରୁ ନିବୃତ୍ତ ରହିବାକୁ ସଞ୍ଜୟ କହିଛନ୍ତି। ପୂର୍ବ ସରକାର କେବଳ ୩୦ଟି ଜିଲାରେ ୪୧ଟି କ୍ରିକେଟ୍ ଏକାଡେମୀ କରିଛନ୍ତି। ବାରବାଟୀ ନବୀକରଣ ନେଇ କାଗଜକଲମରେ ତଥ୍ୟ ନାହିଁ। ଏହା କେବଳ ପୂର୍ବ ସରକାରଙ୍କ ଏକ ଘୋଷଣା ଥିଲା। ବାରବାଟୀ-କଟକ ବିଧାୟିକା ସୋଫିଆ ଫିର୍ଦ୍ଦୋଷ ବିଧାନସଭାରେ ବାରବାଟୀ ପ୍ରସଙ୍ଗ ନେଇ ପ୍ରଶ୍ନ କରିବା ଯଥାର୍ଥ ରହିଛି। ଏପରି କି ବିଧାୟିକାଙ୍କ ପ୍ରଶ୍ନର ଉତ୍ତର ମଧ୍ୟ କ୍ରୀଡ଼ାମନ୍ତ୍ରୀ ସୂର୍ଯ୍ୟବଂଶୀ ସୁରଜ ସମସ୍ତ ତଥ୍ୟ ଅନୁଯାୟୀ ପ୍ରଦାନ କରିଛନ୍ତି । ସେଥିରେ କୌଣସି ମିଥ୍ୟା ରହି ନାହିଁ। କ୍ରୀଡ଼ା ଦିଗରେ ଓ ବାରବାଟୀ ଭିତ୍ତିଭୂମି କାର୍ଯ୍ୟ ନେଇ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ରାଜ୍ୟ କ୍ରୀଡ଼ାମନ୍ତ୍ରୀ ସୂର୍ଯ୍ୟବଂଶୀ ସୁରଜଙ୍କୁ ଭେଟି ସମସ୍ତ ବିଷୟରେ ସେ ଆଲୋଚନା କରିଛନ୍ତି ଏବଂ ଉଭୟ ସମସ୍ତ ସହଯୋଗ ଯୋଗାଇ ଦେବା ନେଇ ପ୍ରତିଶ୍ରୁତି ଦେଇଥିବା ସଞ୍ଜୟ କହିଛନ୍ତି। ବାରବାଟୀକୁ ବିଶ୍ୱସ୍ତରୀୟ କରିବା ନେଇ ଅର୍ଥର ଆବଶ୍ୟକତା ରହିଛି। ଏନେଇ ଏକ ଡିପିଆର ପ୍ରସ୍ତୁତ କରିବା ଲାଗି ଲଣ୍ଡନର ଗୋଟିଏ କମ୍ପାନୀକୁ ଦାୟିତ୍ୱ ଦିଆଯାଇଛି। କମ୍ପାନୀ ୩ ଡିପିଆର ପ୍ରସ୍ତୁତ କରିବ। ସେଥିମଧ୍ୟରୁ ଯେଉଁ ଡିପିଆରକୁ ରାଜ୍ୟ ସରକାର ଓ ବିସିସିଆଇ ଅନୁମତି ପ୍ରଦାନ କରିବେ, ତଦନୁଯାୟୀ କାର୍ଯ୍ୟ ହେବ। ଏହାସହ ଅର୍ଥ ପାଇଁ ଏକ ରିପୋର୍ଟ ତିଆରି କରାଯାଉଛି। ଏନେଇ ଡେଲ୍ଏଟ୍ କମ୍ପାନୀକୁ ଦାୟିତ୍ୱ ଦିଆଯାଇଛି। ଓସିଏ ନୂତନ ଭାବେ ଭିତ୍ତିଭୂମିକୁ ତିଆରି କରିବାକୁ ଚାହୁଁଛି। ଅନ୍ୟ ରାଜ୍ୟରେ ୨ଟି ଷ୍ଟାଡିୟମ ରହିଛି କିନ୍ତୁ ଓଡ଼ିଶାରେ ଆମ ନିଜସ୍ବ ଷ୍ଟାଡିୟମ ନାହିଁ। ୨୦୧୬ ନୀତି ଅନୁଯାୟୀ ଯଦି ଓସିଏ ନଁାରେ ନିଜର ଟାଇଟେଲ ନ ଥିବ, ତେବେ ଭିତ୍ତିଭୂମି ପାଇଁ ଆବଶ୍ୟକ ସବ୍ସିଡି ଓସିଏକୁ ମିଳିପାରିବ ନାହିଁ। ସେଥିପାଇଁ ଓଡ଼ିଶା ଅଲିମ୍ପିକ୍ ଆସୋସିଏଶନ ଓସିଏକୁ ସବ୍ଲିଜ୍ ଅନୁଯାୟୀ ପ୍ରଦାନ କଲେ ଓସିଏ ଏନେଇ କାର୍ଯ୍ୟ କରିବା ଲାଗି ବ୍ୟବସ୍ଥା କରାଯାଇଛି। ଡିପିଆର ପ୍ରସ୍ତୁତ ପରେ ଓଡ଼ିଶା ଅଲିମ୍ପିକ୍ ଆସୋସିଏଶନ ଓ ଓଡ଼ିଶା କ୍ରିକେଟ୍ ଆସୋସିଏଶନକୁ ନେଇ ଏକ ବୈଠକ ହେବ। ସେଥିରେ ଭିତ୍ତିଭୂମି ବିକାଶ ନେଇ ଯାହା ନିଷ୍ପତ୍ତି ହେବ ସେନେଇ ସରକାରଙ୍କୁ ଅବଗତ କରାଯିବ ବୋଲି ସଞ୍ଜୟ ବେହେରା କହିଛନ୍ତି।
ଅଲିମ୍ପିକ ଆସୋସିଏଶନର ସମ୍ପାଦକ ଅଭିଜିତ୍ ପାଲ୍ କହିଛନ୍ତି, ବାରବାଟୀର ମର୍ଯ୍ୟାଦା ଓ ମାନ୍ୟତା ବଜାୟ ରଖିବା ଦିଗରେ ଓଡ଼ିଶା ଅଲିମ୍ପିକ ଆସୋସିଏଶନ ଓ ଓଡ଼ିଶା କ୍ରିକେଟ୍ ଆସୋସିଏଶନ ସର୍ବଦା ଚେଷ୍ଟା କରିବ।
ସୂଚନାଥାଉକି, ବାରବାଟୀ ଷ୍ଟାଡିୟମ ନବୀକରଣ ନେଇ ବିଧାନସଭାରେ ପ୍ରଶ୍ନ କରିଥିଲେ ବାରବାଟୀ-କଟକ ବିଧାୟିକା ସୋଫିଆ ଫିର୍ଦ୍ଦୋଷ। ବିଧାୟିକାଙ୍କ ପ୍ରଶ୍ନର ଉତ୍ତର ଦେଇ କ୍ରୀଡ଼ାମନ୍ତ୍ରୀ କହିଥିଲେ, ବାରବାଟୀ ଷ୍ଟାଡିୟମ ଓସିଏ ଦ୍ୱାରା ପରିଚାଳିତ, ଏହାର ବିକାଶ ପାଇଁ କୌଣସି ପଦକ୍ଷେପ ନିଆଯାଇନାହିଁ। କ୍ରୀଡ଼ାମନ୍ତ୍ରୀଙ୍କ ଏହି ମନ୍ତବ୍ୟକୁ ନେଇ ମେୟର ସୁବାସ ସିଂ କହିଥିଲେ, ବାରବାଟୀ ନବୀକରଣ କାର୍ଯ୍ୟ ନେଇ ଭିତ୍ତିପ୍ରସ୍ତର ସ୍ଥାପନ କରାଯାଇଛି। ଏନେଇ ୭୦୦ କୋଟିର ବଜେଟ କରାଯିବା ସହ ଡିପିଆର ପ୍ରସ୍ତୁତ କରାଯାଇଛି। ଏପରିକି ଏମ୍ଓୟୁ ସ୍ବାକ୍ଷର କରାଯାଇଛି। ଯୋଜନା ଭାଜପା ସରକାର ବଦଳାଇବା ହାସ୍ୟାସ୍ପଦ ବୋଲି ମେୟର କହିଥିଲେ।
