ରସୁଲପୁର,୭ା୪(ଡି.ଏନ.ଏ.): ରସୁଲପୁର ତହସିଲ ଅନ୍ତର୍ଗତ ପ୍ରଥମାଖଣ୍ଡି ପଞ୍ଚାୟତ ସଡ଼ମ୍ବା ଗ୍ରାମ ଦେଇ ଯାଇଥିବା ପୁରୁଣା ଜାତୀୟ ରାଜପଥ ପାର୍ଶ୍ୱରୁ ଗ୍ରାମର ୨ ବ୍ୟକ୍ତି ରାତି ଅଧିଆ ମୂଲ୍ୟବାନ ଜଙ୍ଗଲି ଗଛଗୁଡ଼ିକୁ କାଟି ନେଇଛନ୍ତି। ଏନେଇ ଗ୍ରାମର ବୀରବର ପଲେଇ ଚଣ୍ଡିଖୋଲ ଜଙ୍ଗଲ ବିଭାଗ, ରସୁଲପୁର ତହସିଲଦାର ଓ କୁଆଖିଆ ଥାନାରେ ଅଭିଯୋଗ କରିଛନ୍ତି। ଅଭିଯୋଗ ସମ୍ପର୍କରେ ଜାଣି ଗଛକଟାରେ ସମ୍ପୃକ୍ତ ବ୍ୟକ୍ତି ବୀରବରଙ୍କୁ ଅଶ୍ଳୀଳ ଭାଷାରେ ଗାଳିଗୁଲଜ କରିବା ସହ ଜୀବନରୁ ମାରି ଦେବାକୁ ଧମକ ଦେଉଛନ୍ତି ବୋଲି ଅଭିଯୋଗ ହୋଇଛି।
କଟା ଯାଇଥିବା ଗଛଗୁଡ଼ିକ ବୀରବରଙ୍କ ନିଜସ୍ବ ଜମିରେ ରହିଥିଲା ବୋଲି ସେ ଦାବି କରିଛନ୍ତି। ବୁଧବାର ରାତିରେ ଗଛ କଟାଯାଇଥିଲା। ଗୁରୁବାର ସକାଳେ ଗଛ ଗରିଣ୍ଡାଗୁଡ଼ିକୁ ଗଛକଟାଳି ଖଣ୍ଡଖଣ୍ଡ କରୁଥିବା ସମୟରେ ବୀରବର ପହଞ୍ଚତ୍ ବିରୋଧ କରିଥିଲେ। ଗଛ କଟାଳି ଜଗନ୍ନାଥ ସଡ଼କ ପାର୍ଶ୍ୱରେ ଥିବା ଗଛ କାଟିଛନ୍ତି ବୋଲି ପ୍ରକାଶ କରିଥିଲେ। ଏ ସମ୍ପର୍କରେ ଅଭିଯୋଗ କଲେ ସେମାନେ ବୀରବରଙ୍କୁ ଗଛ କାଟିବା ଭଳି କାଟି ଖଣ୍ଡ ଖଣ୍ଡ କରି ଦେବେ ବୋଲି ଧମକ ଦେଇଥିଲେ। ଅନ୍ୟପକ୍ଷରେ ଅଭିଯୋଗ ପରେ ବାରବାଟୀ ରାଜସ୍ବ ନିରୀକ୍ଷକ ଘଟଣାସ୍ଥଳ ପରିଦର୍ଶନ କରିଥିଲେ। ଘଟଣାସ୍ଥଳରେ ପଡ଼ିଥିବା କଟା ଗଛର ଅଂଶବିଶେଷକୁ ଓ କଟା ଯାଇଥିବା ଗଛର ମୂଳ ଗୁଡିକର ସ୍ଥାନକୁ ବୁଲି ଦେଖିଥିଲେ। ପରିବେଶ ପ୍ରଦୂଷଣ ଏକ ବଡ଼ ଚାଲେଞ୍ଜ ହୋଇପଡି ଥିବାବେଳେ ବ୍ୟାପକ ଚାରାରୋପଣ ପାଇଁ ଜନସଚେତନତା ସୃଷ୍ଟି କରାଯାଉଛି। ଅପରପକ୍ଷରେ କାଠ ବ୍ୟବସାୟୀ, ଚୋରାଚାଲାଣକାରୀ ଓ କାଠ ମାଫିଆଙ୍କ ଦ୍ୱାରା ବ୍ୟାପକ ଗଛ କଟା ଯାଉଥିବା ଲକ୍ଷ୍ୟ କରାଯାଉଛି। ତେଣୁ ଗଛ କାଟିବା ଉପରେ ରୋକ ଲଗାଯିବା ଉପରେ ପ୍ରଶାସନ ପକ୍ଷରୁ ଅଧିକ ଗୁରୁତ୍ୱ ଦେବାକୁ ସାଧାରଣରେ ଦାବି ହେଉଛି।
