ପାଣିକୋଇଲି,୯ା୧୨(ଡି.ଏନ.ଏ.):ନଦୀରୁ ବାଲି ଉଠାଇବା ପାଇଁ ରାତାରାତି ମେଶିନ ସାହାଯ୍ୟରେ ଶତାଧିକ ଗଛ କାଟି, ପିଣ୍ଡି ଭାଙ୍ଗି ରାସ୍ତା ନିର୍ମାଣ କରାଯାଇଛି। ଏନେଇ ଯାଜପୁର ଜିଲା ପାଣିକୋଇଲି ଥାନାରେ ଅଭିଯୋଗ ହୋଇଛି। ଲିଙ୍ଗେଶ୍ୱର ଉନ୍ନୟନ କମିଟି ସମ୍ପାଦକ ପ୍ରଦୀପ କୁମାର ଧଳ ଥାନାରେ ଲିଖିତ ଅଭିଯୋଗ କରିବା ସହ କାର୍ଯ୍ୟାନୁଷ୍ଠାନ ଦାବି କରିଛନ୍ତି। ତେବେ କାର୍ଯ୍ୟାନୁଷ୍ଠାନ ନ ହେଲେ ଏଥିପାଇଁ ବଢୁଥିବା ଜନ ଅସନ୍ତୋଷ ଆନ୍ଦୋଳନର ରୂପ ନେବ ବୋଲି ସୂଚନା ମିଳିଛି।
୩ ବର୍ଷ ତଳେ ସରକାରୀ ଅନୁମତି ନେଇ ଲିଙ୍ଗେଶ୍ୱର ଶିଶୁ ମନ୍ଦିର ସମ୍ପାଦକ ବରପଦା ମୌଜାର ୯୯୬, ୧୦୧୧, ୧୦୧୫ନମ୍ବର ପ୍ଲଟ ଓ ଏହାର ପାଶ୍ୱବର୍ତ୍ତୀ ଜମିରେ ଚାରାରୋପଣ କରିଥିଲେ। ବୃକ୍ଷର ଯନତ୍ ନେବା ପାଇଁ ତାର ଚାରି କଡରେ ଇଟାର ପିଣ୍ଡି କରାଯାଇଥିଲା। ତାର ବାଡ଼ ମଧ୍ୟ ଦିଆଯାଇଥିଲା। ଏବେ ଗଛଗୁଡିକ ଫଳନ୍ତି ଅବସ୍ଥାକୁ ଆସି ଯାଇଥିଲା। ମାତ୍ର ଧନତ୍ରୀ ବାଲି ଘାଟରୁ ବାଲି ଉଠାଇବା ପାଇଁ ଗଛଗୁଡ଼ିକୁ କଟାଯାଇ ରାସ୍ତା ନିର୍ମାଣ କରାଯାଇଛି। ସରସଦା ଗ୍ରାମର ଜଣେ ଯୁବକ, ବରପଦା ଗ୍ରାମର ଜଣେ ଓ ରଣପାଳ ଗ୍ରାମର ଜଣେ ଯୁବକ କତେଜେଣ ଅନ୍ୟବ୍ୟକ୍ତିଙ୍କୁ ଧରି ଏଭଳି କାଣ୍ଡ ଭିଆଇଛନ୍ତି। ପୂର୍ବରୁ ମଧ୍ୟ ରାତିଅଧିଆ ଏଭଳି କାରନାମାକୁ ନେଇ ବିଭାଗୀୟ ଅଧିକାରୀଙ୍କୁ ଅବଗତ କରାଯାଇଥିଲା।
