ଭଦ୍ରକ ଅଫିସ,୩ା୮- ଅଗଷ୍ଟ ୧ ତାରିଖଠାରୁ ଅନ୍ଲକ୍-୩ ଆରମ୍ଭ ହୋଇଛି। ଏଥିରେ ଭଦ୍ରକ ଜିଲା ପ୍ରଶାସନ ପକ୍ଷରୁ କେତେକ କଟକଣାକୁ କୋହଳ କରାଯାଇଥିବା ବେଳେ ଆଉ କେତେକ କଟକଣା ଅନ୍ଲକ-୨ ଭଳି ବଳବତ୍ତର ରହିଛି। ଜିଲାପାଳ ଡ. ଜ୍ଞାନ ରଞ୍ଜନ ଦାସ ଆସନ୍ତା ୩୧ ତାରିଖ ପର୍ଯ୍ୟନ୍ତ ସମଗ୍ର ଜିଲାକୁ ଲକ୍ ଡାଉନ ଘୋଷଣା କରିଛନ୍ତି। ପ୍ରତି ସପ୍ତାହର ଶନିବାର ଓ ରବିବାର ଶଟ୍ ଡାଉନକୁ ବଳବତ୍ତର ରଖାଯାଇଛି। ରାତ୍ରିକାଳୀନ କର୍ଫ୍ୟୁ ରାତି ୭ରୁ ସକାଳ ୫ ପର୍ଯ୍ୟନ୍ତ ଜାରି ରହିବ। ଲକ୍ ଡାଉନ ବେଳେ ସୋମବାରରୁ ଶୁକ୍ରବାର ଦୋକାନ ବଜାର, ସରକାରୀ ବେସରକାରୀ ସଂସ୍ଥା ସନ୍ଧ୍ୟା ୬ଟା ପର୍ଯ୍ୟନ୍ତ ଖୋଲା ରହିପାରିବ। ଏହା ବ୍ୟତୀତ ପୂର୍ବରୁ କଣ୍ଟେନ୍ମେଣ୍ଟ ଜୋନ ଗୁଡିକ ପାଇଁ ଯେଉଁ କଟକଣା ରହିଥିଲା ଅଗଷ୍ଟ ମାସରେ ତାହା ବଳବତ୍ତର ରହିବ। ସରକାରଙ୍କ ନିଷ୍ପତ୍ତି ଅନୁଯାୟୀ ମାସ୍କ ପିନ୍ଧୁ ନ ଥିବା ଲୋକଙ୍କଠାରୁ ପ୍ରଥମ ଥର ପାଇଁ ୧ ହଜାର ଓ ପରେ ୫ ହଜାର ଟଙ୍କା ପର୍ଯ୍ୟନ୍ତ ଜରିମାନା ଆଦାୟ ହେବ। ଦୋକାନୀମାନେ ସେମାନଙ୍କ ଦୋକାନରେ ସାମାଜିକ ଦୂରତ୍ୱ ରକ୍ଷା କରିବା ବାଧ୍ୟତା ମୂଳକ। ରେଷ୍ଟୁରାଣ୍ଟମାନଙ୍କରେ ୫୦ ପ୍ରତିଶତ ଆସନ ସଂଖ୍ୟାରେ ଲୋକଙ୍କୁ ଖାଇବାକୁ ଦିଆଯାଇ ପାରିବ ବୋଲି ନିର୍ଦ୍ଦେଶନାମା ଜାରି ହୋଇଛି। ଏହା ବ୍ୟତୀତ ଲକ୍ ଡାଉନ ଓ ଶଟ୍ ଡାଉନ ବେଳେ ପେଟ୍ରୋଲ ପମ୍ପ, ରାଜପଥ ପାର୍ଶ୍ୱ ଢାବା, ଟାୟାର ମରାମତି ଦୋକାନ ଖୋଲା ରହି ପାରିବ ବୋଲି କୁହାଯାଇଛି। ଜିଲାର ଦ୍ରୁତ ସଂକ୍ରମଣକୁ ଲକ୍ଷ୍ୟ ରଖି ଜିଲାପାଳ ଏହି ନିର୍ଦ୍ଦେଶନାମା ଜାରି କରିଛନ୍ତି। ରବିବାର ନୂଆ ୨୫ ଆକ୍ରାନ୍ତ ଚିହ୍ନଟ ହୋଇଛନ୍ତି। ଏମାନଙ୍କ ମଧ୍ୟରୁ ୬ ଜଣ ସଙ୍ଗରୋଧ କେନ୍ଦ୍ରରୁ ଓ ୧୯ ଜଣ ସ୍ଥାନୀୟ ସଂକ୍ରମଣ ବୋଲି କୁହାଯାଇଛି। ଏହି ନୂଆ ସଂକ୍ରମଣକୁ ମିଶାଇ ଜିଲାରେ ୬୫୨ ଛୁଇଁଛି ଆକ୍ରାନ୍ତଙ୍କ ସଂଖ୍ୟା। ଏମାନଙ୍କ ମଧ୍ୟରୁ ୫୪୯ ସୁସ୍ଥ ହୋଇସାରିଥିବା ବେଳେ ୧୦୧ ଚିକତ୍ସାଧିନ ଥିବା ଓ ୨ ଜଣ ମୃତ୍ୟୁବରଣ କରିଥିବା ପ୍ରଶାସନ ପକ୍ଷରୁ ସୂଚନା ଦିଆଯାଇଛି। ବର୍ତ୍ତମାନ ସୁଦ୍ଧା ୧୯,୧୪୯ ଜଣଙ୍କ ସ୍ବାବ୍ ପରୀକ୍ଷା କରାଯାଇଥିବା ସୂଚନା ମିଳିଛି।
