କୋରୁକୋଣ୍ଡା, ୩।୯ (ଅଶୋକ କୁମାର ପରିଡା): ଲଗାଣ ବର୍ଷାରେ ମାଟି ଧସି କଲଭର୍ଟ ଭୁଶୁଡି ପଡ଼ିବାରୁ ମାଲକାନଗିରି ଜିଲା କୋରୁକୋଣ୍ଡା ବ୍ଲକ ନିଳାକାମ୍ବେରୁ ପଞ୍ଚାୟତ ଅନ୍ତର୍ଗତ ଏମ୍ଭି-୫୧ ଓ ଏମ୍ଭି-୫୨ ଗ୍ରାମ ମଧ୍ୟରେ ଯୋଗାଯୋଗ ବିଚ୍ଛିନ୍ନ ହୋଇପଡ଼ିଛି। ଏହାକୁ ନେଇ ଅଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି।
ସୂଚନାନୁଯାୟୀ, ଏମ୍ଭି-୫୧ରୁ ଏମ୍ଭି-୫୨ ଗ୍ରାମକୁ ସଂଯୋଗ କରିବା ପାଇଁ ଆରଡି ବିଭାଗ ପକ୍ଷରୁ ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନାରେ ରାସ୍ତା ନିର୍ମାଣ ହୋଇଥିଲା। ତେବେ ଉସକାପାଲି ଗ୍ରାମ ମୁଣ୍ଡର ଶେଷଭାଗରେ ଥିବା ୩ ଛକ ନିକଟରେ ରାସ୍ତା ସଂଯୋଗ କରୁଥିବା ପୁରୁଣା କଲଭର୍ଟର ଆବଶ୍ୟକ ମରାମତି କିମ୍ବା ପୁନନିର୍ମାଣ କରାଯାଇ ନ ଥିବାରୁ ଲଗାଣ ବର୍ଷା ଯୋଗୁ କଲଭର୍ଟ ନିକଟରେ ମାଟି ଧସିବା ସହ ରାସ୍ତାର ଏକ ବଡ଼ ଅଂଶ ଭାଙ୍ଗିଯାଇଛି। ଫଳରେ ଉକ୍ତ ରାସ୍ତା ଦେଇ ଯାନବାହନ ଚଳାଚଳ ସମ୍ପୂର୍ଣ୍ଣ ବନ୍ଦ ହୋଇଥିବା ବେଳେ ୨ ଗ୍ରାମର ଲୋକେ ଯାତାୟାତ ପାଇଁ ହଇରାଣ ହେଉଛନ୍ତି।
ବିଶେଷକରି ଜରୁରିକାଳୀନ ସମୟରେ ଲୋକଙ୍କ ଯାତାୟାତକୁ ନେଇ ଚିନ୍ତା ବଢ଼ିଛି। ଅନ୍ୟପକ୍ଷରେ ଘଟଣା ସମ୍ପର୍କରେ ବିଭାଗୀୟ ଯନ୍ତ୍ରୀ ଦୀନବନ୍ଧୁ ସାମନ୍ତଙ୍କୁ ପଚାରିବାରୁ, ପୂର୍ବତନ ଯନ୍ତ୍ରୀ ଲବରାମ ମାଝିଙ୍କ ବଦଳି ହୋଇଥିଲେ ମଧ୍ୟ ତାଙ୍କୁ ଏଯାଏଁ କାଗଜପତ୍ରରେ ଏହି ଅଞ୍ଚଳର ସମ୍ପୂର୍ଣ୍ଣ ଦାୟିତ୍ୱ ହସ୍ତାନ୍ତର ହୋଇ ନ ଥିବା ସେ କହିଛନ୍ତି। ତେବେ ଅଭିଯୋଗ ପାଇବା ପରେ ସେ ଘଟଣାସ୍ଥଳରେ ପହଞ୍ଚି ଭାଙ୍ଗିଥିବା କଲଭର୍ଟର ଉଭୟ ପାର୍ଶ୍ୱରେ ବ୍ୟାରିକେଡ୍ କରିବା ସହ ସିମେଣ୍ଟ ହୋମ୍ ପାଇପ ଉପରେ ମାଟି ପକାଇ ଅସ୍ଥାୟୀ ଭାବେ ଯାତାୟାତ ସ୍ବାଭାବିକ କରିବାକୁ ପଦକ୍ଷେପ ନେଇଥିବା କହିଛନ୍ତି। ସ୍ଥାୟୀ ସମାଧାନ ପାଇଁ ଭାଙ୍ଗିଥିବା କଲଭର୍ଟର ତୁରନ୍ତ ପୁନର୍ନିର୍ମାଣ କରି ଦୁଇ ଗ୍ରାମର ଯୋଗାଯୋଗ ସ୍ବାଭାବିକ କରିବାକୁ ଅଞ୍ଚଳବାସୀ ଦାବି କରିଛନ୍ତି।