ଆଙ୍କାରା,୬। ୩: ଯାତ୍ରା ଯେତେ ରୋମାଞ୍ଚକର ହେବ, ତାହା ଚିରଦିନ ପର୍ଯ୍ୟନ୍ତ ସ୍ମରଣୀୟ ହୋଇ ରହିବ। ତେବେ ଜଳଯାତ୍ରାକୁ ଅଧିକ କୌତୂହଳଯୁକ୍ତ କରିବା ପାଇଁ ମିରେ କ୍ରୁଜେସ୍ କମ୍ପାନୀ ଏକ ନିଆରା କ୍ରୁଜ୍ ଯାତ୍ରା ଆରମ୍ଭ କରିବାକୁ ଯାଉଛି। ଯେଉଁ ବ୍ୟକ୍ତିବିଶେଷମାନଙ୍କୁ ଜଳଯାତ୍ରା କରିବା ପସନ୍ଦ ସେମାନେ ଏଣିକି ଗୋଟିଏ ସପ୍ତାହ କି ଦୁଇ ସପ୍ତହ ନୁହେଁ ବରଂ ଏକାଧିକ ବର୍ଷ ଜଳଯାତ୍ରା କରିପାରିବେ। ଜଳଯାତ୍ରା କରିବାକୁ ପସନ୍ଦ କରୁଥିବା ଲୋକ ୩ ବର୍ଷ ଜାହାଜରେ ରହିବା ସହ ୭ଟି ମହାଦେଶର ପ୍ରାୟ ୧୩୫ ଦେଶ ବୁଲିବାର ସୁଯୋଗ ପାଇପାରିବେ। ନଭେମ୍ବର ୧ରେ ଏମ୍.ଭି. ଜେମିନି ଶିପ୍ ତୁର୍କୀର ଇସ୍ତାନବୁଲରୁ ଏହି ଦୀର୍ଘତମ ଯାତ୍ରା ଆରମ୍ଭ କରିବ। ବିଶ୍ୱରେ ଥିବା ୧୪ ବିସ୍ମୟ ମଧ୍ୟରୁ ଏହି କ୍ରୁଜ୍ରେ ଯାତ୍ରା କରୁଥିବା ବ୍ୟକ୍ତି ୧୩ ବିସ୍ମୟକୁ ଦେଖିବାର ସୁଯୋଗ ପାଇବେ। କ୍ରୁଜ୍ ଯାତ୍ରା ପାଇଁ ଆଗ୍ରହୀଥିବା ବ୍ୟକ୍ତିଙ୍କୁ ଭଡ଼ା ବାବଦକୁ ୨୪,୫୧,୩୦୦୦ରୁ ୮୯,୮୮,୩୨୦ ପର୍ଯ୍ୟନ୍ତ ଟଙ୍କା ଦେବାକୁ ପଡ଼ିବ। ଗୋଟିଏ ବର୍ଷର କ୍ରୁଜ୍ଯାତ୍ରା ପାଇଁ ଯାତ୍ରୀଙ୍କୁ ପାଖାପାଖି ୩୦,୦୦ ଡଲାର (୨୪,୨୫,୯୧୭ ଟଙ୍କା) ପଇଠ କରିବାକୁ ପଡ଼ିବ। ଏମ୍.ଭି. ଜେମିନିରେ ୧୦୭୪ ଯାତ୍ରୀଙ୍କ ପାଇଁ ୪୦୦ କ୍ୟାବିନ୍ ରୁମ୍, ୨୬୦ ସ୍କୋୟାର୍ ଫୁଟ୍ର ବାଲ୍କୋନି, ୧୪ ଅଫିସ, ଲାଇବ୍ରେରି, ଲନ୍, ସୁଇମିଂ ପୁଲ୍, ସନ୍ ଡେକ୍, ଫିଟ୍ନେଶ୍ ସେଣ୍ଟର, ମିଟିଂ ରୁମ୍ ଏବଂ ମେଡିକାଲ ସୁବିଧା ରହିଛି। କ୍ରୁଜ୍ ଯାତ୍ରା ପାଇଁ ପଇଠ କରାଯାଇଥିବା ଟଙ୍କା ବାଦ୍ ଖାଦ୍ୟ, ପାନୀୟ, ଓ୍ବାଇ-ଫାଇ ଇତ୍ୟାଦି ସେବା ସକାଶେ ଟଙ୍କା ଦେବାକୁ ପଡ଼ିବ ନାହିଁ। ୧୯୯୨ରେ ନିର୍ମାଣ ନିର୍ମାଣ ହୋଇଥିବା ଏମ୍.ଭି. ଜେମିନି ଶିପ୍ର ନବୀକରଣ ଗତ ଅକ୍ଟୋବରରେ କରାଯାଇଥିବା ଲାଇଫ୍ ଆଟ୍ ସି କ୍ରୁଜ୍ର ମ୍ୟାନେଜିଂ ଡାଇରେକ୍ଟର ମାଇକେଲ ପିଟରସନ୍ କହିଛନ୍ତି। ୩ ବର୍ଷ ମଧ୍ୟରେ କ୍ରୁଜ୍ ୪୦୦ ବନ୍ଦର ଭ୍ରମଣ କରିବ। ପ୍ରତି ବନ୍ଦରରେ ଏହା ଏକାଧିକ ଦିନ ରହିବ, ଯାହାଦ୍ୱାରା ଯାତ୍ରୀମାନେ ଉକ୍ତ ସ୍ଥାନକୁ ମନଭରି ଉପଭୋଗ କରିପାରିବେ। ଏମ୍.ଭି. ଜେମିନି ଦକ୍ଷିଣ ଆମେରିକା ଓ ଆଣ୍ଟାର୍କଟିକାରେ ୯୮ ଦିନ ରହିବ ବୋଲି କମ୍ପାନୀ ପକ୍ଷରୁ କୁହାଯାଇଛି।
