ଦାରିଙ୍ଗବାଡ଼ି,୧୯ା୧୨(ଅରୁଣ ସାହୁ): ଓଡ଼ିଶାର କଶ୍ମୀର କୁହାଯାଉଥିବା ଦାରିଙ୍ଗବାଡ଼ି ଇକୋ ରିଟ୍ରିଟ୍ ସମେତ ବିଭିନ୍ନ ପର୍ଯ୍ୟଟନକ୍ଷେତ୍ରରେ ପ୍ରବଳ ଭିଡ଼ ଦେଖିବାକୁ ମିଳିଛି। ଶନିବାରଠାରୁ ଆସନ୍ତା ନୂତନ ବର୍ଷର ୫ ପର୍ଯ୍ୟନ୍ତ ଦାରିଙ୍ଗବାଡ଼ି ଅଞ୍ଚଳରେ ରହିଥିବା ଇକୋ ରିଟ୍ରିଟ୍ ସମେତ ଘରୋଇ ଲଜ, ହୋଟେଲଗୁଡ଼ିକ ଆଗୁଆ ବୁକିଂ ସରିଛି।
ଏବେ ପର୍ଯ୍ୟଟକ ଦାରିଙ୍ଗବାଡ଼ିର ପଡ଼ୋଶୀ ବ୍ଲକ ରାଇକିଆ, ବାଲିଗୁଡା, ଜି. ଉଦୟଗିରି ସମେତ ଅନ୍ୟ ସ୍ଥାନରେ ରାତ୍ରିଯାପନ କରି ଦାରିଙ୍ଗବାଡ଼ି ବୁଲିବାକୁ ଆସୁଥିବା ବେଳେ ରାଜ୍ୟ ବାହାର ପର୍ଯ୍ୟଟକ ମଧ୍ୟ ହୋଟେଲ, ଲଜ୍ ନ ପାଇ ଗୋପାଳପୁର ଏବଂ ପୁରୀରେ ରାତ୍ରିଯାପନ କରି ଏଠାକୁ ଆସି ବୁଲାବୁଲି କରି ଫେରୁଥିବା ଜଣାପଡ଼ିଛି। ପର୍ଯ୍ୟଟକଙ୍କ ଏବେ ଶୀତର ସହର ଦାରିଙ୍ଗବାଡି ପ୍ରଥମ ପସନ୍ଦ ପାଲଟିଛି। ଦାରିଙ୍ଗବାଡ଼ିର ବିଭିନ୍ନ ପର୍ଯ୍ୟଟନକ୍ଷେତ୍ର ସମେତ ଏହାର ଥଣ୍ଡା ଜଳବାୟୁ ଦିନ ଓ ରାତିରେ ପ୍ରାୟତଃ ସମାନ ଥଣ୍ଡା ଅନୁଭୂତ ହେଉଥିବା ପ୍ରକାଶ କରିଛନ୍ତି। ପର୍ଯ୍ୟଟକଙ୍କ ମୁହଁରୁ ଦାରିଙ୍ଗବାଡ଼ିକୁ ଅଧିକ ପ୍ରଂଶସା ଶୁଣିବାକୁ ମିଳିଛି।
ପର୍ଯ୍ୟଟକ କୁହନ୍ତି ଦାରିଙ୍ଗିବାଡ଼ିରେ କ’ଣ ନାହିଁ କୁହ? ଏଠାରେ ଜୈବିକ ହଳଦୀ ଚାଷ ହେଉଛି, କଫି ଚାଷ ହେଉଛି। ସମୃଦ୍ଧ ଲୋକକଳା ସହ ପ୍ରାକୃତିକ ସୌନ୍ଦର୍ଯ୍ୟ ବି ଏଠାରେ ଭରି ରହିଛି। ତେଣୁ ଯେତେଥର ଏହି ଦାରିଙ୍ଗବାଡ଼ି ଇକୋ-ରିଟ୍ରିଟ ସମେତ ପର୍ଯ୍ୟଟନ କ୍ଷେତ୍ର ବୁଲିବାକୁ ଆସୁଛୁ ଆହୁରି ବାରମ୍ବାର ଆସିବାକୁ ଇଚ୍ଛା ହେଉଛି ବୋଲି ପର୍ଯ୍ୟଟକମାନେ କହିଛନ୍ତି। କଫି ବଗିଚା ସହ ହିଲଭିୟୁ ପାର୍କ ଏବଂ ମିଡିୟୁବାନ୍ଦା ସବୁଠାରୁ ଆକର୍ଷଣୀୟ ଜଳପ୍ରପାତ ବୋଲି ବୁଲିବାକୁ ଆସିଥିବା ପର୍ଯ୍ୟଟକ କହିଛନ୍ତି।
