ସାକ୍ଷୀଗୋପାଳ,୧୪।୪(ଡି.ଏନ୍.ଏ.): ପୁରୀ ଜିଲା ସତ୍ୟବାଦୀ ବ୍ଲକ ଭୀମପୁର ଓ ଦାସ ବିଦ୍ୟାଧରପୁର ଗ୍ରାମରେ ବେଶ୍ ଧୁମଧାମ୍ରେ ପାରମ୍ପରିକ ଖାଇଫୋଡ଼ ଯାତ୍ରା ପାଳିତ ହୋଇଯାଇଛି । ମହାବିଷୁବ ସଂକ୍ରାନ୍ତି ଅବସରରେ ଭୀମପୁର ଗ୍ରାମର ମା’ ଗଡ଼ଚଣ୍ଡିଙ୍କ ମନ୍ଦିର ଏବଂ ଦାସବିଦ୍ୟାଧରପୁର ବଡ଼ ପୋଖରୀରେ ଖାଇଫୋଡ ଯାତ୍ରା ଦେଖିବାକୁ ହଜାର ହଜାର ଶ୍ରଦ୍ଧାଳୁଙ୍କ ଭିଡ଼ ହୋଇଥିଲେ। ଠାକୁରାଣୀଙ୍କ ସମସ୍ତ ନୀତିକାନ୍ତି ସରିବା ପରେ କାଳେସି ବିଜେ କରିଥିଲେ। ମାନସିକଧାରୀ ପାଟୁଆମାନେ ପୋଖରୀରେ ଗାଧୁଆ ସାରି ଛଅରୁ ଦଶଇଞ୍ଚ ଲମ୍ବ ଦୁଇରୁ ଚାରୋଟି ଲେଖାଏ ଲୁହାବାଙ୍କ କଣ୍ଟା ପିଠିରେ ଫୁଟାଇ କୋଡ଼ିଏ ହାତ ଉଚ୍ଚ ଖାଇରୁ ତଳକୁ ଝୁଲିବା ଏବଂ ଠାକୁରାଣୀଙ୍କ ଜୟ ଜୟକାର ଧ୍ୱନୀ ଦେଇ ଖାଇ ଚାରିପଟେ ବୁଲିବା ଏକ ସାଧନା। ଚୈତ୍ର ମାସ ସାରା ଏହି ପାଟୁଆମାନେ ହବିଷ୍ୟାନ୍ନରେ ରହିଥିଲେ। ପ୍ରତି ମଙ୍ଗଳବାର ମା’ଙ୍କୁ ପୂଜା କରୁଥିଲେ। ମନ୍ଦିରରେ ମଧ୍ୟାହ୍ନ ଧୂପ ସରିବା ପରେ ମା’ ଗଡ଼ଚଣ୍ଡି,ବସନ୍ତେଇ, ଜାଗୁଳାଇ,ମଙ୍ଗଳା ଓ ବାଟ ମଙ୍ଗଳା ଙ୍କର ପାଞ୍ଚଜଣ କାଳେସି ବିଜେ ହୋଇ ନିକଟବର୍ତ୍ତୀ ନଳିତା ପୋଖରୀକୁ ଯାଇଥିଲେ। ପୋଖରୀ ଚତୁଃପାର୍ଶ୍ୱରେ ସମବେତ ଭକ୍ତମାନଙ୍କ ଗହଣରେ ଜଣକ ପରେ ଜଣେ ପାଟୁଆମାନଙ୍କ ପିଠିରେ କାଳେସିମାନେ କଣ୍ଟା ଫୁଟାଇଥିଲେ ମଧ୍ୟ କ୍ଷତ ସ୍ଥାନରୁ ରକ୍ତସ୍ରାବ ହୋଇ ନଥିଲା। କଣ୍ଟାର ଗୋଟିଏ ମୁଣ୍ଡରେ ଲଗାଯାଇଥିବା ରଶିରେ ପାଟୁଆ ମାନେ ବନ୍ଧା ହୋଇ ଖାଇ ଦଣ୍ଡରୁ ତଳକୁ ଝୁଲିଥିଲେ। ଖାଇରେ ଝୁଲିବା ସମୟରେ ପାଟୁଆମାନେ ଖଜୁରି, କୋଳି, ଆମ୍ବ ଆଦି ଠାକୁରାଣୀଙ୍କ ଉଦ୍ଦେଶ୍ୟରେ ପକାଇଥିଲେ। ଛୋଟ ଶିଶୁଙ୍କୁ ଖାଇରେ ଧରି ପାଟୁଆମାନେ ବୁଲୁଥିବା ଦେଖାଯାଇଥିଲା। ଅସାଧ୍ୟ ରୋଗ ପିଡ଼ାରୁ ଉପଶମ ଲଭିବା ଏବଂ ନିଃସନ୍ତାନମାନେ ସନ୍ତାନ ସନ୍ତତି ଆଶାରେ ଏଭଳି କଷ୍ଟକର ତପ ସାଧନ କରିଥାନ୍ତି ବୋଲି ଜଣାପଡିଥାଏ। ସେହିପରି ଦାସବିଦ୍ୟାଧରପୁର ବଡ଼ ପୋଖରୀରେ ଖାଇଫୋଡ ଯାତ୍ରା ହୋଇଛି।
