ଦିଗପହଣ୍ଡି,୪ା୯(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ପାଇକ ସାହି ନିକଟ ଶ୍ରୀକୃଷ୍ଣ ଚୈତନ୍ୟ ଆଶ୍ରମ ପରିସରରେ ଥିବା ଶ୍ରୀ ରାଧା ବିନୋଦ ବିହାରୀଜୀଉ(ରାଧାକୃଷ୍ଣ) ମନ୍ଦିରରେ ଭାଦ୍ରବ କୃଷ୍ଣପକ୍ଷ ଅଷ୍ଟମୀ ତିଥି ଶୁକ୍ରବାର ଶ୍ରୀ କୃଷ୍ଣ ଜନ୍ମାଷ୍ଟମୀ ମହୋତ୍ସବ ଆଡମ୍ବର ସହକାରେ ଅନୁଷ୍ଠିତ ହୋଇଛି। ଦିଗପହଣ୍ଡି ସହର ସମେତ ଆଖାପଖ ଗ୍ରାମାଞ୍ଚଳରୁ ଆସିଥିବା ବହୁ ସଂଖ୍ୟକ ଶ୍ରଦ୍ଧାଳୁଙ୍କ ଉପସ୍ଥିତିରେ ସକାଳେ ମଙ୍ଗଳ ଆଳତୀ, ତୁଳସୀ ପରିକ୍ରମା, ମହାଜନ ପଦ୍ୟାବଳୀ ସଙ୍କୀର୍ତ୍ତନ, ସ୍ତୋତ୍ରପାଠ ପରେ ଶ୍ରଦ୍ଧାଳୁ ବୃନ୍ଦ ଠାକୁରଙ୍କୁ ଦର୍ଶନ କରିବା ସହ ପୂଜାର୍ଚ୍ଚନା କରିଥିଲେ। ଗତ ସୋମବାର ଏକାଦଶୀ ତିଥିଠାରୁ ଶୁକ୍ରବାର ପୂର୍ଣ୍ଣମୀ ପର୍ଯ୍ୟନ୍ତ ଶ୍ରୀ ରାଧାକୃଷ୍ଣଙ୍କ ଝୁଲଣ ଯାତ୍ରା ଅନୁଷ୍ଠିତ ହୋଇଥିଲା। ସେହିପରି ଗତ ଶନିବାରଠାରୁ ଗତକାଲି ଗୁରୁବାର ପର୍ଯ୍ୟନ୍ତ ମନ୍ଦିର ପରିସରରେ ଶ୍ରୀମଦ ଭାଗବତ କଥାମୃତ ପାରାୟଣ ଅନୁଷ୍ଠିତ ହୋଇଥିଲା। ତ୍ରିଦଣ୍ଡି ସ୍ବାମୀ ଭକ୍ତି ବିଚାର ବିଷ୍ଣୁ ଗୋସ୍ବାମୀ ମହାରାଜ ଏବଂ ଶ୍ରୀପାଦ କୃଷ୍ଣ ଦାସ ପ୍ରଭୁ ପ୍ରବକ୍ତା ଭାବେ ଯୋଗଦେଇଥିଲେ। ଭକ୍ତି ସାଧକ ଯୋଗୀ ମହାରାଜ ଏବଂ ଶ୍ୟାମାନନ୍ଦ ପ୍ରଭୁ ସମସ୍ତ କାର୍ଯ୍ୟକ୍ରମ ପରିଚାଳନାରେ ସହାୟତା କରିଥିଲେ। ସେହିପରି ପନ୍ଦରାସାହିସ୍ଥିତ ଶ୍ରୀ ରାଧାଶ୍ୟାମ ମନ୍ଦିର, ସହରର ଶ୍ରୀ ରାଧା ଦାମୋଦର ମନ୍ଦିର, ଶ୍ରୀ ରାଧା ମୋହନ ମନ୍ଦିର ସମେତ ସାନବ୍ରାହ୍ମଣ ସାହିସ୍ଥିତ ଶ୍ରୀ ଗୋପୀନାଥ ମନ୍ଦିର ପରିସରରେ ମହାପ୍ରଭୁ ଶ୍ରୀ କୃଷ୍ଣଙ୍କ ଜନ୍ମାଷ୍ଟମୀ ମହୋତ୍ସବ ମହାସମାରୋହରେ ପାଳିତ ହୋଇଯାଇଛି। ମନ୍ଦିର ପରିଚାଳନା କମିଟି ଓ ମେକାପ ପରିବାର ସଦସ୍ୟଙ୍କ ମିଳିତ ପ୍ରଚେଷ୍ଟାରେ ଶ୍ରୀକୃଷ୍ଣଙ୍କ ଜନ୍ମାଷ୍ଟମୀ ଉତ୍ସବ ପାଳନ କରାଯାଇଥିଲା। ଏପରିକି ମୁଖ୍ୟ ପଣ୍ଡିତଙ୍କ ପୌରୋହିତ୍ୟରେ ମନ୍ଦିର ପ୍ରାଙ୍ଗଣରେ ପ୍ରଭୁ ଶ୍ରୀ ଜଗନ୍ନାଥ ଓ ଶ୍ରୀ ରାଧାକୃଷ୍ଣଙ୍କୁ ପୂଜାର୍ଚ୍ଚନା କରାଯାଇଥିଲା। ଶ୍ରୀ ଗୋପୀନାଥ ମହାପ୍ରଭୁଙ୍କ ମଙ୍ଗଳ ଆରତି ପରେ ସଂକୀର୍ତ୍ତନ, ହୋମ ଓ ଶ୍ରୀକୃଷ୍ଣଙ୍କ ଜନ୍ମଲୀଳା ଆଦି ପୂଜାପାଠ କରି ମହାପ୍ରଭୁଙ୍କ ମଙ୍ଗଳ ଆରତି ପରେ ସଂକୀର୍ତ୍ତନ, ହୋମ ଓ ଶ୍ରୀକୃଷ୍ଣଙ୍କ ଜନ୍ମଲୀଳା ଆଦି ପୂଜାପାଠ କରାଯାଇଥିଲା। ସହରର ବହୁ ଗଣ୍ୟମାନ୍ୟ ବ୍ୟକ୍ତି ଉପସ୍ଥିତ ରହି ପ୍ରଭୁ ଶ୍ରୀକୃଷ୍ଣଙ୍କ ଅପାର କରୁଣା ଲାଭ କରିଥିଲେ। ଏଥିରେ ଗ୍ରାମବାସୀ ଏବଂ ସାହି ବାସିନ୍ଦା ଉପସ୍ଥିତ ରହି ସମସ୍ତ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ।