ସମ୍ବଲପୁର,୧୭ା୧୦(ବ୍ୟୁରୋ): ଧାନକେଣ୍ଡା ବାହାରି କ୍ଷୀର ଢୋକିବା ସମୟ ଚାଷୀଙ୍କୁ ବେଶ୍ ଖୁସି ଆଣିଦେଇଥାଏ। ବିଲରେ ଧାନ କେଣ୍ଡା ବାହାରୁଥିବା ଫସଲକୁ ଦେଖି ସେ ତା’ର ସବୁ ଦୁଃଖକଷ୍ଟ ଭୁଲି ଯାଇଥାଏ। ହେଲେ କିଛିବର୍ଷ ହେଲା କେତେକ ଅଜଣା ରୋଗ ପୋକକୁ ନେଇ ସମ୍ବଲପୁର ଜିଲା ସମ୍ବଲପୁର ମହାନଗର ନିଗମ ଅଞ୍ଚଳ ସହିତ ମାନେଶ୍ୱର, ରେଙ୍ଗାଲି, ଧନକଉଡା, ଯୁଯୁମୁରା, ଜମନକିରା ବ୍ଲକର ଚାଷୀ ଚିନ୍ତାରେ ପଡିଯାଇଛନ୍ତି। ଏଥିରେ ଧାନକେଣ୍ଡା ଲାଲ ରଙ୍ଗ ହୋଇଯିବା ସହ କ୍ଷୀର ଢୋକିପାରୁ ନାହିଁ। ଏହି ରୋଗର ପ୍ରତିକାର କରିପାରୁ ନ ଥିବା ଚାଷୀମାନେ କହିଛନ୍ତି। ହୀରାକୁଦ ଜଳଭଣ୍ଡାର ପାଣି ଉପରେ ନିର୍ଭର କରି ହୋଇଥିବା ଚାଷଜମିରେ ଏଭଳି ରୋଗପୋକ ଅତ୍ୟଧିକ ମାତ୍ରାରେ ଲାଗିଥିବା ଅଭିଯୋଗ ହେଉଛି। ପୂର୍ବରୁ ନଳୀ ପୋକ, ଗଣ୍ଠିପୋକ, ଚକଡା ପୋକ ଲାଗି ଫସଲ ନଷ୍ଟ ହେଉଥିଲା। ହେଲେ ଏବେ ଏହି ନୂଆ ରୋଗପୋକ ଯୋଗୁ ଧାନ ଫସଲ ଉଜୁଡିବାକୁ ବସିଛି। ଚାଷୀ ଦେବେନ୍ଦ୍ର ପ୍ରଧାନ କହିଛନ୍ତି, ରୋଗପୋକ ଏବେ ପ୍ରଚୁର ପରିମାଣରେ ଫସଲରେ ଲାଗିଛି। କୀଟନାଶକ ଓ ରୋଗର ପ୍ରତିକାର ପାଇଁ ଔଷଧ ଦରଦାମ ବୃଦ୍ଧି ହୋଇଛି। କେତେକ ରୋଗ ପାଇଁ ମିଳୁଥିବା ଔଷଧ ଲିଟର ପିଛା ୧୫ ହଜାର ଟଙ୍କା ରହିଛି। ଏତେ ଦାମ୍ରେ ବାରମ୍ବାର ଔଷଧ ଦେବା ଚାଷୀମାନଙ୍କ ପଇଁ ସମ୍ଭବପର ନୁହେଁ। ଅନ୍ୟପଟେ ନଳୀ ଓ ଚକଡା ପୋକ ସହିତ ଅନ୍ୟାନ୍ୟ ରୋଗପୋକ ଦେଖିବାକୁ ମିଳୁଛି। ଉଚିତ ସମୟରେ ପ୍ରତିକାର ବ୍ୟବସ୍ଥା ନ କଲେ ଫସଲ ନଷ୍ଟ ହୋଇଯିବ ବୋଲି କହିଥିଲେ। ସେହିପରି ଚାନ୍ଦମୁଣ୍ଡା ଗ୍ରାମର ଚାଷୀ ଜି ଶ୍ରୀନିବାସ କହିଛନ୍ତି, ଧାନ ଏବେ ବାହାରିଯାଇଛି। ଧାନ କେଣ୍ଡାର ଅଗ୍ରଭାଗ ପ୍ରଥମେ ଲାଲ ରଙ୍ଗ ହୋଇଯାଉଛି। ପରେ ଧୀରେ ଧୀରେ ପୂରା କେଣ୍ଡା ଲାଲ ରଙ୍ଗ ହେବା ସହ ଧାନ କ୍ଷୀର ଢୋକିପାରୁ ନାହିଁ। ଅଜଣା ପୋକ ପାଇଁ ଏଭଳି ହେଉଛି। ଏଥି ନିମନ୍ତେ ଆବଶ୍ୟକ ମେଡିସିନ ମିଳୁନାହିଁ। ସ୍ବର୍ଣ୍ଣ କିସମ ଧାନରେ ଏହି ରୋଗ ଅଧିକ ହୋଇଥିବା ଦେଖାଦେଇଛି ବୋଲି କହିଥିଲେ। ଏ ସମ୍ପର୍କରେ ଜିଲା ମୁଖ୍ୟ କୃଷି ଅଧିକାରୀ ଟଙ୍କଧର ସାହୁ କହିଛନ୍ତି, ଏଭଳି ଘଟଣା ଆମ ଚିନ୍ତା ବଢାଇଛି। ଘଟଣାସ୍ଥଳ ପରିଦର୍ଶନ କରି ରୋଗପୋକ ଉପରେ ପରୀକ୍ଷା କରାଯିବ। କେଉଁ କାରଣରୁ ଏଭଳି ହେଉଛି ଓ ପ୍ରତିକାର ନେଇ ଚାଷୀମାନଙ୍କୁ ପରାମର୍ଶ ଦିଆଯିବ ବୋଲି ସେ କହିଥିଲେ।
