ଛେନାପଦି, ୨୬ା୧୨(ନିରାକାର ପରିଡ଼ା): କେନ୍ଦୁଝର ଜିଲା ହାଟଡ଼ିହୀ ବ୍ଲକ୍ର ବିଭିନ୍ନ ଅଞ୍ଚଳରେ ଅଦିନିଆ ବର୍ଷାରେ ବ୍ୟାପକ ଧାନ ଫସଲ ନଷ୍ଟ ହୋଇଛି। ୪ ଦିନ ପୂର୍ବେ ହୋଇଥିବା ବର୍ଷାରେ ଧାନ ବିଲରେ ପାଣି ପଶିଯାଇଥିଲା। ପୁଣି ବୁଧବାରଠାରୁ ବର୍ଷା ଲାଗି ରହିଥିବାରୁ ପରିସ୍ଥିତି ଆହୁରି ସଙ୍ଗୀନ ହୋଇଛି। କ୍ଷେତରେ ପାଚିଲା ଧାନ ଲୋଟୁଥିବା ବେଳେ ଅନେକ ହେକ୍ଟର ଜମିରେ ରବି ଫସଲ ନଷ୍ଟ ହୋଇଯାଇଛି। ବର୍ଷକର ଫସଲ ପାଣିରେ ପଡ଼ିଥିବା ଦେଖି ଚାଷୀ ଚିନ୍ତାରେ ପଡ଼ିଛନ୍ତି।
ପ୍ରକାଶ ଯେ, ହାଟଡ଼ିହୀ ବ୍ଲକ୍ର ଅକାରୁଆ, ବଞ୍ଚୋ, ଶାସଙ୍ଗ, ପଞ୍ଚୁଗୋଛିଆ, ସୁଲଣ, ବଡ଼ ରମ୍ପାସ, ଇଞ୍ଚୋଳ, ଓରାଳୀ, ପଢ଼ିଆରିପାଲ୍ଲି, ବାଙ୍ଗୋର, ସୋ ସୋ, ଶାଳନିଆ, ଗେଡ଼ମା, ବାଲିବରେଇ, ସଢ଼ା, ମରେଇଗାଁ ଆଦି ଅଞ୍ଚଳରେ ଏବେ ଧାନ ଅମଳ ଚାଲିଛି। ଚଳିତ ବର୍ଷ ବିଳମ୍ବରେ ଚାଷ ହୋଇଥିବାରୁ ଏସବୁ ଅଞ୍ଚଳରେ ବିଳମ୍ବରେ ଅମଳ ହେଉଛି। ଧାନ କଟା ହୋଇ ବିଲରେ ପଡ଼ିଥିବା ବେଳେ ଲଘୁଚାପ ବର୍ଷାରେ ବିଲରେ ପାଣି ହୋଇଯାଇଛି।
ଚାଷୀମାନେ ବାନ୍ଧିକି ଉଠାଇବାକୁ ବେଳ ପାଇଲେ ନାହିଁ। ବର୍ଷା ପାଣି ପଶି ଧାନ ସବୁ ଭିଜିଯାଇଛି। ଚାଷୀମାନେ ବିଲରେ ପଶି ଧାନକୁସବୁ ଏକାଠି କରି ହିଡ଼କୁ ଛାଣୁଛନ୍ତି। ହାଟଡ଼ିହୀ ଅଞ୍ଚଳରେ ଚଳିତ ବର୍ଷ ୧୭ ହଜାର ହେକ୍ଟର ଜମିରେ ଧାନ ଚାଷ ହୋଇଥିଲା। ହେଲେ ଏପରି ବର୍ଷା ପରେ ପ୍ରାୟ ୩୦ ପ୍ରତିଶତ ଧାନ କ୍ଷତିଗ୍ରସ୍ତ ହୋଇଛି। ଖଳା ବାଡ଼ିରେ ଆଣି ରଖିଥିବା ଅଧିକାଂଶ ଧାନ ଗଜା ହୋଇଗଲାଣି। ବର୍ଷା ଯୋଗୁ ଧାନର ରଙ୍ଗ ପରିବର୍ତ୍ତନ ହୋଇଯାଉଛି। ଚାଷୀ ଋଣ କରିବା ସହ ବିଭିନ୍ନ ସୂତ୍ରରୁ ଟଙ୍କା ଆଣି ଚାଷ କରିଥିବା ବେଳେ ଅଦିନିଆ ବର୍ଷାରେ ଫସଲ ନଷ୍ଟ ହୋଇଯାଇଥିବାରୁ ଚିନ୍ତାରେ ପଡ଼ିଛନ୍ତି।
ସରକାର ଏଫ୍କ୍ୟୁ ମାନର ଧାନ କିଣିବା ଉପରେ ଗୁରୁତ୍ୱ ଦେଉଥିବା ବେଳେ ବର୍ଷା ଯୋଗୁ କିପରି ଉନ୍ନତ ମାନର ଧାନ ଅମଳ କରିବେ ସେନେଇ ଚିନ୍ତାରେ ପଡ଼ିଛନ୍ତି। ସରକାରଙ୍କ ପକ୍ଷରୁ କ୍ଷୟକ୍ଷତିର ଆକଳନ କରି ସହାୟତା ପ୍ରଦାନ କରିବାକୁ ବଦରମ୍ପାସ ଗ୍ରାମର ଚାଷୀ ରବିନ୍ଦ୍ର ଜେନା, କୃଷ୍ଣଚନ୍ଦ୍ର ଦାସ, ହେମନ୍ତ ସାମଲ, ସଞ୍ଜୟ ସାହୁ, ଗୋପବନ୍ଧୁ ପେରେଇ, ନାରାୟଣ ବେହେରା, ସୁଶାନ୍ତ ଜେନା, ହାଡ଼ିବନ୍ଧୁ ସାମଲ ପ୍ରମୁଖ ଦାବି କରିଛନ୍ତି। ଏ ସମ୍ପର୍କରେ ବ୍ଲକ୍ କୃଷି ଅଧିକାରୀ ଡ. ଦେବୀ ପ୍ରସନ୍ନ ଖୁଣ୍ଟିଆ କହିଛନ୍ତି, କ୍ଷୟକ୍ଷତି ରିପୋର୍ଟ ଆସିନାହିଁ। ରିପୋର୍ଟ ଆସିଲେ ସରକାରଙ୍କ ନିୟମାନୁଯାୟୀ ପଦକ୍ଷେପ ଗ୍ରହଣ କରାଯିବ।
