ଗଞ୍ଜାମ,୫ା୧୦(ଅଖିଳ ତରାଇ): ଗଞ୍ଜାମ ବ୍ଲକର ସାନରାମଚନ୍ଦ୍ରପୁର, ଝାରିଡି, ରାମଗଡ଼ ଆଦି ପଞ୍ଚାୟତରେ ପ୍ରବଳ ବର୍ଷା ଯୋଗୁ କୃଷକମାନେ ବ୍ୟାପକ କ୍ଷତିର ସମ୍ମୁଖୀନ ହୋଇଛନ୍ତି। ଫୁଲକୋବି, କାଙ୍କଡ଼ ଏବଂ ଅନ୍ୟାନ୍ୟ ପନିପରିବା ଫସଲ ବର୍ଷା ଯୋଗୁ ବୁଡ଼ି ନଷ୍ଟ ହୋଇଯାଇଛି। ଏହି ଅଞ୍ଚଳର କୃଷକମାନେ ଆର୍ଥିକ ସଙ୍କଟରେ ପଡ଼ିଛନ୍ତି, କାରଣ ସେମାନଙ୍କର ବର୍ଷସାରାର ଶ୍ରମ ଏବଂ ବିନିଯୋଗ ପାଣିରେ ମିଳାଇ ଯାଇଛି।
ସ୍ଥାନୀୟ ବିଧାୟକ କୃଷ୍ଣଚନ୍ଦ୍ର ନାୟକ କ୍ଷତିଗ୍ରସ୍ତ ଅଞ୍ଚଳ ପରିଦର୍ଶନ କରି ପରିସ୍ଥିତିର ଆକଳନ କରିଛନ୍ତି। ସେ କୃଷି ବିଭାଗର ଅଧିକାରୀମାନଙ୍କୁ ତୁରନ୍ତ କ୍ଷୟକ୍ଷତିର ସଠିକ ମୂଲ୍ୟାଙ୍କନ କରି କୃଷକମାନଙ୍କୁ ଉପଯୁକ୍ତ କ୍ଷତିପୂରଣ ପ୍ରଦାନ କରିବାକୁ ନିର୍ଦ୍ଦେଶ ଦେଇଛନ୍ତି। ନାୟକ କହିଛନ୍ତି, କୃଷକଙ୍କ ହସ ହେଉଛି ଗାଁର ସମୃଦ୍ଧିର ପରିଚୟ। ତେଣୁ ପ୍ରତ୍ୟେକ କ୍ଷୟକ୍ଷତିର ସଠିକ ଆକଳନ କରି କୃଷକଙ୍କୁ ସହାୟତା ଦେବା ଆବଶ୍ୟକ।
କୃଷକମାନେ ଏହି ଉଦ୍ୟମକୁ ସ୍ବାଗତ କରିଛନ୍ତି ଏବଂ ଶୀଘ୍ର କ୍ଷତିପୂରଣ ପାଇବା ଆଶା ରଖିଛନ୍ତି। କୃଷି ବିଭାଗ ଏକ ତଦନ୍ତ ଦଳ ଗଠନ କରି କ୍ଷୟକ୍ଷତିର ରିପୋର୍ଟ ପ୍ରସ୍ତୁତ କରୁଛି। ଏହା କୃଷକମାନଙ୍କ ପାଇଁ ଆଶାର କିରଣ ସୃଷ୍ଟି କରିଛି।
