ମେଲବୋର୍ନ,୧୨।୩ : ବିଭିନ୍ନ ପ୍ରଜାତିର କୁମ୍ଭୀର ପୃଥିବୀରେ ଲକ୍ଷ ଲକ୍ଷ ବର୍ଷ ଧରି ବାସ କରିଆସୁଛନ୍ତି ଏବଂ ଏହି ଯାତ୍ରାରେ ସେମାନେ ଏକ ବିଶେଷ ଉପାୟରେ ରୋଗ ପ୍ରତିରୋଧକ ବିକଶିତ କରିଛନ୍ତି। ଏହା ସେମାନଙ୍କୁ ଜଳାଶୟ ଏବଂ ଅନ୍ୟାନ୍ୟ ଜଳରେ ବାସ କରୁଥିବା ସମୟରେ ଶରୀରକୁ କ୍ଷତିକାରକ ମାଇକ୍ରୋଅର୍ଗାନ୍ସରୁ ରକ୍ଷା କରିବାରେ ସାହାଯ୍ୟ କରିଥାଏ। ନିକଟରେ ନେଚର କମ୍ୟୁନିକଶେନରେ ପ୍ରକାଶିତ ରିପୋର୍ଟ ଅନୁସାରେ ଲୁଣି କୁମ୍ଭୀର ଠାରେ ମିଳୁଥିବା ଆଣ୍ଟିମାଇକ୍ରୋବାୟଲ ପ୍ରୋଟିନ ଡିଫେନସିନ୍ସର ଅନୁସନ୍ଧାନ କରାଯାଇଥିଲା।
ଏହି ପ୍ରୋଟିନ କୁମ୍ଭୀର ଶରୀରରେ ସଂକ୍ରାମକ ରୋଗର ମୁକାବିଲା / ରୋକିବାରେ ଏକ ପ୍ରମୁଖ ଭୂମିକା ଗ୍ରହଣ କରିଥାଏ। ଆଣ୍ଟିବାୟୋଟିକ-ପ୍ରତିରୋଧକ ମାଇକ୍ରୋଅର୍ଗାନ୍ସ ସଂଖ୍ୟା ବଢ଼ିବା ସହିତ ନୂତନ ଏବଂ ପ୍ରଭାବଶାଳୀ ଚିକିତ୍ସା ପାଇଁ ମଣିଷର ଆବଶ୍ୟକତା ମଧ୍ୟ ବଢ଼ିବାରେ ଲାଗିଛି।
କୁମ୍ଭୀରମାନଙ୍କଠାରେ ମିଳୁଥିବା ଡିଫେନସିନ୍ସ ପ୍ରୋଟିନ ଏହି ପ୍ରଶ୍ନଗୁଡ଼ିକର ଉତ୍ତର ହେବ ଏବଂ ଜୀବନ ରକ୍ଷାକାରୀ ଔଷଧର ବିକାଶରେ ସହାୟକ ହେବ ବୋଲି ବୈଜ୍ଞାନିକ ମତପୋଷଣ କରିଛନ୍ତି। ଉଦ୍ଭିଦ ଏବଂ ପ୍ରାଣୀମାନଙ୍କଠାରେ ବହୁତ କମ ପରିମାଣରେ ଉତ୍ପାଦିତ ହେଊଥିବା ପ୍ରୋଟିନ ହେଉଛି ଡିଫେନସିନ୍ସ ପ୍ରୋଟିନ। ଉଦ୍ଭିଦଗୁଡିକରେ, ଏହା ସାଧାରଣତଃ ଫୁଲ ଏବଂ ପତ୍ରରେ ଉତ୍ପନ୍ନ ହୁଏ।
ପ୍ରାଣୀମାନଙ୍କଠାରେ, ଏହା ଧଳା ରକ୍ତ କଣିକା ତଥା ଫୁସଫୁସ ଏବଂ ଅନ୍ତନଳୀରେ ଉତ୍ପନ୍ନ ହୋଇଥାନ୍ତି। ସଂକ୍ରାମକ ଅଣୁଜୀବକୁ ନଷ୍ଟ କରି ଶରୀରକୁ ସୁରକ୍ଷା ଦେବାରେ ଡିଫେନସିନ୍ସ ପ୍ରୋଟିନ ଭୂମିକା ଗୁରୁତ୍ୱପୂର୍ଣ୍ଣ।
ବିଭିନ୍ନ ପ୍ରଜାତିର ଉଦ୍ଭିଦ ଏବଂ ପ୍ରାଣୀରେ ମିଳୁଥିବା ଡିଫେନସିନ୍ସ ପ୍ରୋଟିନ ଅଧ୍ୟୟନରୁ ଏହା ଜଣାପଡିଛି। ଡିଫେନସିନ୍ସ ପ୍ରୋଟିନ ଜୀବାଣୁ, କବକ, ଭୂତାଣୁ ଏବଂ ଏପରିକି କର୍କଟ କୋଷକୁ ମଧ୍ୟ ନଷ୍ଟ କରିପାରେ।
ଡିଫେନସିନ୍ସ ପ୍ରୋଟିନ ଏହି କୋଷିକାକୁ ବାନ୍ଧି ରୋଗ ସୃଷ୍ଟିକାରୀ ମାଇକ୍ରୋଅର୍ଗାନ୍ସଗୁଡ଼ିକୁ ମାରିଦିଏ। ଡିଫେନସିନ୍ସ ପ୍ରୋଟିନ ଏହି ମାଇକ୍ରୋ ଅର୍ଗାନଜୀବ କୋଷଗୁଡ଼ିକ ସଂସ୍ପର୍ଶରେ ଆସିବା ପରେ, ସେମାନଙ୍କର କୋଷର ମେମ୍ବ୍ରିନକୁ କଣା କରିଦିଏ। ଯେଉଁ କାରଣରୁ କୋଷ ଭିତରେ ଥିବା ଅଣୁଜୀବ ଲିକ ହେବା ଆରମ୍ଭ କରେ ଏବଂ ଶେଷରେ ଏହା ମରିଯାଏ । ମଇଳା ପାଣିରେ ବାସ କରିବା ସତ୍ତ୍ୱେ କୁମ୍ଭୀରମାନେ କ୍ୱଚିତ ସଂକ୍ରମିତ ହୁଅନ୍ତି। ଏହା ସୂଚିତ କରେ ଯେ ତାଙ୍କର ରୋଗ ପ୍ରତିରୋଧକ ଶକ୍ତି ଅଧିକ।
ଲୁଣି କୁମ୍ଭୀରର ଜିନୋମକୁ ଅଧ୍ୟୟନ କରିବା ସମୟରେ, ବୈଜ୍ଞାନିକ ଏକ ନିର୍ଦ୍ଦିଷ୍ଟ ଡିଫେନସିନ୍ସ ପ୍ରୋଟିନ ସିପିଓବିଡି-୧୩ର ସନ୍ଧାନ ପାଇଥିଲେ। ଯାହା କ୍ୟାଣ୍ଡିଡା ଆଲବିକାନ୍ସ ନାମକ ଫଙ୍ଗସକୁ ପ୍ରଭାବଶାଳୀ ଭାବରେ ମାରିପାରେ। କ୍ୟାଣ୍ଡିଡା ଆଲବିକାନ୍ସ ସମଗ୍ର ବିଶ୍ୱରେ ମଣିଷରେ ଫଙ୍ଗାଲ ରୋଗର ମୁଖ୍ୟ କାରଣ। କିଛି ଉଦ୍ଭିଦ ଏବଂ ପ୍ରାଣୀ କ୍ୟାଣ୍ଡିଡା ଆଲବିକାନ୍ସକୁ ନଷ୍ଟ କରିବା ଦେଖାଯାଇଥିଲା।
ସନ୍ଧାନ ମିଳିଥିବା ପ୍ରୋଟିନ ଏହାର ଆଖପାଖ ପରିବେଶର ପିଏଚସ୍ତର ଉପରେ ନିର୍ଭର କରି ଏହାର କାର୍ଯ୍ୟକଳାପକୁ ସ୍ବ-ନିୟନ୍ତ୍ରଣ କରିଥାଏ। ଏକ୍ସ-ରେ କ୍ରିଷ୍ଟାଲୋଗ୍ରାଫି ବ୍ୟବହାର କରି ଏହାର ସଂରଚନାକୁ ବୈଜ୍ଞାନିକମାନେ ଦେଖିଥିଲେ। କବକ ବା ଫଙ୍ଗାଲ ମାନବ ସ୍ବାସ୍ଥ୍ୟ ପାଇଁ ବିପଦ।
ତେବେ ଜୀବାଣୁ ଏବଂ ଭୂତାଣୁ ଦ୍ୱାରା ସୃଷ୍ଟି ହେଊଥିବା ସଂକ୍ରମଣ ତୁଳନାରେ ଫଙ୍ଗାଲ ସଂକ୍ରମଣକୁ ଗୁରୁତର ସହ ନିଆଯାଏ ନାହିଁ। କାରଣ ମାନବ ଇତିହାସର ସମସ୍ତ ମହାମାରୀ ଜୀବାଣୁ କିମ୍ବା ଭୂତାଣୁ ଯୋଗୁ ଘଟିଥିଲା। ପ୍ରକୃତ କଥା ହେଉଛି ଫଙ୍ଗସ ସାଧାରଣତଃ ନଖ ଏବଂ ପାଦରେ ସଂକ୍ରମଣ ହୋଇଥାଏ। ଯାହା ଜୀବନ ପ୍ରତି ବିପଦ ନୁହେଁ। କିନ୍ତୁ ଫଙ୍ଗସ ମାନବ ସ୍ବାସ୍ଥ୍ୟକୁ କ୍ଷତି ପହଞ୍ଚାଇପାରେ, ବିଶେଷତଃ ଯେଉଁମାନଙ୍କର ରୋଗ ପ୍ରତିରୋଧକ ଶକ୍ତି ଦୁର୍ବଳ। ପ୍ରତିବର୍ଷ ବିଶ୍ୱରେ ପ୍ରାୟ ୧୫ ଲକ୍ଷ ଲୋକଙ୍କର ବିଭିନ୍ନ ଫଙ୍ଗାଲ ସଂକ୍ରମଣରେ ମୃତ୍ୟୁ ଘଟିଥାଏ।
