ନୂଆଦିଲ୍ଲୀ, ୨୧।୩: ଆଇପିଏଲ ଇତିହାସର ସଫଳ ଅଧିନାକୟ ରୋହିତ ଶର୍ମାଙ୍କ ନିକଟରୁ ଅଧିନାୟକତ୍ୱ ନେଇ ହାର୍ଦ୍ଦିକ ପାଣ୍ଡ୍ୟାକୁ ଦେଇଛି ମୁମ୍ବାଇ ଇଣ୍ଡିଆନ୍ସ। ଏହାକୁ ନେଇ ସୋସିଆଲ ମିଡିଆରେ ଫ୍ୟାନ ମାନେ ଅସନ୍ତୋଷ ପ୍ରକାଶ କରିଥିଲେ। ତେବେ ପୂର୍ବତନ ଭାରତୀୟ କ୍ରିକେଟର ତଥା ବର୍ତ୍ତମାନ ଭାଷ୍ୟକାର ଭାବରେ କାମ କରୁଥିବା ହରଭଜନ ସିଂ ପ୍ରତିକ୍ରିୟା ପ୍ରକାଶ କରିଛନ୍ତି। ପୂର୍ବରୁ ବର୍ତ୍ତମାନର ଅଧିନାୟକ ହାର୍ଦ୍ଦିକ ପାଣ୍ଡ୍ୟା ଏହା ଉପରେ ପ୍ରତିକ୍ରିୟା ଦେବା ସହିତ ସବୁ କିଛି ଠିକ୍ ଥିବା କହିଥିଲେ। ରୋହିତଙ୍କ ଉପସ୍ଥିତି ମୋ ପାଇଁ ଏକ ସକରାତ୍ମକ ଜିନିଷ ବୋଲି କହିଛନ୍ତି ପାଣ୍ଡ୍ୟା। ଯେ କୌଣସି ପରସ୍ଥିତିରେ ରୋହିତଙ୍କ ଠାରୁ ମୁଁ ପରାମର୍ଶ ପାଇ ପାରିବି ବୋଲି ମଧ୍ୟ ସେ କହିଛନ୍ତି। ୨୦୧୫ରେ ମୁଁ ଏମ୍ଆଇରୁ ମୋର କ୍ୟାରିୟର ଆରମ୍ଭ କରିଥିଲି। ସମାନ ଦଳକୁ ଅଧିନାୟକ ଭାବରେ ପ୍ରତ୍ୟାବର୍ତ୍ତନ କରିବା ମୋ ପାଇଁ ଅତ୍ୟନ୍ତ ଗର୍ବର ବିଷୟ ବୋଲି କହିଥିଲେ ପାଣ୍ଡ୍ୟା। କ୍ୟାରିୟର ଆରମ୍ଭରୁ ମୁଁ ରୋହିତଙ୍କ ଅଧୀନରେ ଖେଳିଛି ତେଣୁ ଯେତେବେଳେ ବି ପରାମର୍ଶ ଆବଶ୍ୟକ ତାହା ମିଳି ପାରିବ। ତେବେ ହରଭଜନ ଏଥିରେ ଅସହମତି ପ୍ରକାଶ କରିଛନ୍ତି। ସେ କହିଛନ୍ତି ଉଭୟ ଖେଳାଳିଙ୍କ ମଧ୍ୟରେ ସମ୍ପର୍କ କେତେ ଠିକ୍ ଅଛି ତାହା କେବଳ ସମୟ କହିବ। ଏହା ସହ ସେ ରୋହିତଙ୍କ କ୍ୟାପଟେନ୍ସିକୁ ମଧ୍ୟ ପ୍ରଶଂସା କରିଛନ୍ତି। ୫ ଥର ଆଇପିଏଲ୍ ବିଜୟୀ ହୋଇଥିବା ବେଳେ ନିକଟରେ ବରିଷ୍ଠ ଖେଳାଳିଙ୍କ ଅନୁପସ୍ଥିତିରେ ମଧ୍ୟ ଇଂଲଣ୍ଡ ବିପକ୍ଷରେ ଭାରତ ସିରିଜ ଜିତିବା ଏକ ଚମତ୍କାର ଉପଲବ୍ଧି ବୋଲି କହିଛନ୍ତି ହରଭଜନ। ବିରାଟ କୋହଲିଙ୍କ ପରି ଷ୍ଟାର ଖେଳାଳି ଅନୁପସ୍ଥିତ ଥିବା ବେଳେ ଭାରତ ୦-୧ରେ ପଛୁଆ ରହିଥିଲା। ତେବେ ଭାରତ ଯେଉଁ ଭଳି ପ୍ରତ୍ୟାବର୍ତ୍ତନ କଲା ତାହା ବେଶ ପ୍ରଶଂସନୀୟ। ଯୁବ ଖେଳାଳି ମାନେ ଭଲ ପ୍ରଦର୍ଶନ କରିଥିବା ବେଳେ ଏହାର ସମସ୍ତ ଶ୍ରେୟ ରୋହିତଙ୍କୁ ଯିବ ବୋଲି ହରଭଜନ କହିଛନ୍ତି।
