ନୂଆଦିଲ୍ଲୀ,୫।୩: ଧର୍ମଶାଳାର ଏଚ୍ପିସିଏ ଷ୍ଟାଡିୟମରେ ମାର୍ଚ୍ଚ ୭ରୁ ଭାରତ-ଇଂଲଣ୍ଡ ମଧ୍ୟରେ ୫ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜର ଅନ୍ତିମ ମୁକାବିଲା ଖେଲାଯିବ। ଏହି ମ୍ୟାଚ୍ରେ ବିଜେତା ହୋଇ ଭାରତ ଗସ୍ତର ସୁଖଦ ଅନ୍ତ କରିବାକୁ ଇଂଲଣ୍ଡ ଚାହିଁବ। ସେହିଭଳି ଟିମ୍ ଇଣ୍ଡିଆ ସିରିଜକୁ ୪-୧ରେ ଜିତିବା ଲାଗି ଚେଷ୍ଟା କରିବ। ତେବେ ଏହି ମ୍ୟାଚ୍ ବିଭିନ୍ନ କାରଣକୁ ନେଇ ସ୍ବତନ୍ତ୍ର ହେବାକୁ ଯାଉଛି। କାରଣ ଏଥିରେ ୮ଜଣ ଖେଳାଳି ନିଜର ଡେବ୍ୟୁ କରିବେ। ଆପଣ ଭାବୁଥିବେ କିଭଳି? ଜାଣନ୍ତୁ…
ବର୍ତ୍ତମାନ ପର୍ଯ୍ୟନ୍ତ ଧର୍ମଶାଳାରେ କେବଳ ଗୋଟିଏ ଟେଷ୍ଟ ମ୍ୟାଚ୍ ଖେଳାଯାଇଛି। ମାର୍ଚ୍ଚ ୨୦୧୭ରେ ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଏହି ମ୍ୟାଚ ଖେଳାଯାଇଥିଲା। ଏହା ପରେ, ପ୍ରାୟ ସାତ ବର୍ଷ ପରେ ଏଠାରେ ଏକ ଟେଷ୍ଟ ମ୍ୟାଚ ଅନୁଷ୍ଠିତ ହେଉଛି।
୮ ଖେଳାଳି ଏହିପରି ଡେବ୍ୟୁ କରିବେ?
ଯଦି ଆମେ ୨୦୧୭ ମସିହାରେ ଭାରତ ଖେଳିଥିବା ମ୍ୟାଚର ପ୍ଲେଇଂ ୧୧ ଦେଖିବା ଏବଂ ମାର୍ଚ୍ଚ ୭ ରୁ ଖେଳାଯିବାକୁ ଥିବା ଦଳର ସମ୍ଭାବ୍ୟ ଏକାଦଶକୁ ଦେଖିବା, ତେବେ ଟିମ ଇଣ୍ଡିଆର ୮ ଜଣ ଖେଳାଳି ଡେବ୍ୟୁ କରିବେ ବୋଲି କହିପାରିବା। ୨୦୧୭ ରେ ଖେଳାଯାଇଥିବା ଟେଷ୍ଟ ମ୍ୟାଚରେ ବର୍ତ୍ତମାନର ଦଳର ୩ ଖେଳାଳି ପ୍ଲେ -୧୧ରେ ଥିଲେ। ସେମାନେ ହେଲେ ରବିଚନ୍ଦ୍ରନ ଅଶ୍ୱିନ, ରବିନ୍ଦ୍ର ଜାଡେଜା ଏବଂ କୁଲଦୀପ ଯାଦବ। ଏହି ତିନିଜଣ ଇଂଲଣ୍ଡ ବିପକ୍ଷରେ ଖେଳିବା ନିଶ୍ଚିତ। କିନ୍ତୁ ଅବଶିଷ୍ଟ ୮ ଜଣ ଖେଳାଳି ପୂର୍ବରୁ ଧର୍ମଶାଳାରେ ଟେଷ୍ଟ ମ୍ୟାଚ ଖେଳି ନାହାନ୍ତି, ଯେଉଁଥିରେ ରୋହିତ ଶର୍ମା ଏବଂ ଜସପ୍ରୀତ ବୁମ୍ରାଙ୍କ ନାମ ମଧ୍ୟ ରହିଛି। ଯଶସ୍ବୀ ଜୈସୱାଲ, ଶୁଭମାନ ଗିଲ, ସରଫରାଜ ଖାନ୍, ରଜତ ପାଟିଦାର, ଆକାଶଦୀପ, ଧ୍ରୁଭ ଜୁରେଲଙ୍କ ନାମ ମଧ୍ୟ ସେଥିରେ ରହିଛନ୍ତି। ଯଦିଓ ଦଳ ପ୍ଲେଇଂ -୧୧ ରେ ପରିବର୍ତ୍ତନ କରେ, ତେବେ ଆକାଶଦୀପଙ୍କ ସ୍ଥାନରେ ମହମ୍ମଦ ସିରାଜ ସୁଯୋଗ ପାଇପାରନ୍ତି। ଏଭଳି ପରିସ୍ଥିତିରେ ମଧ୍ୟ ଟିମ ଇଣ୍ଡିଆର ୮ଜଣ ଖେଳାଳି ଧର୍ମଶାଳାରେ ଡେବ୍ୟୁ କରିବେ।