ନୂଆଦିଲ୍ଲୀ,୨୧।୧୧: ଆଇପିଏଲ୍ ୨୦୨୫ ଲାଗି ହାର୍ଦ୍ଦିକ ପାଣ୍ଡ୍ୟାଙ୍କୁ ରିଟେନ୍ କରିଛି ମୁମ୍ବାଇ ଇଣ୍ଡିଆନ୍ସ। ହେଲେ ସେ ଟୁର୍ନାମେଣ୍ଟର ପ୍ରଥମ ମ୍ୟାଚ୍ ଖେଳିବେ ନାହିଁ। ଆପଣ ଭାବୁଥିବେ କାହିଁକି। ସ୍ଲୋ ଓଭର୍ ରେଟ୍କୁ ନେଇ ହାର୍ଦ୍ଦିକଙ୍କ ଉପରେ ପ୍ରତିବନ୍ଧକ(ବ୍ୟାନ୍) ଲଗାଯାଇଛି। ଆଇପିଏଲ୍ ୨୦୨୪ରେ ମୁମ୍ବାଇର ଅନ୍ତିମ ମୁକାବିଲା ଲକ୍ଷ୍ନୌ ସୁପର ଜାଏଣ୍ଟସ ମଧ୍ୟରେ ଖେଳାଯାଇଥିଲା। ଏହି ମ୍ୟାଚ୍ରେ ହାର୍ଦ୍ଦିକ ସ୍ଲୋ ଓଭର ରେଟ୍ର ଶିକାର ହୋଇଥିଲେ। ଏହା ଉକ୍ତ ସିଜନରେ ତାଙ୍କ ଉପରେ ଲାଗିଥିବା ତୃତୀୟ ସ୍ଲୋ ଓଭର ରେଟ୍ ଥିଲା। ଏଥିଲାଗି ତାଙ୍କ ଉପରେ ୩୦ ଲକ୍ଷ ଟଙ୍କାର ଜରିମାନା ସହ ଗୋଟିଏ ମ୍ୟାଚ୍ର ବ୍ୟାନ୍ ଲାଗିଛି।
ଆଇପିଏଲ୍ ନିୟମ ମୁତାବକ, ଯଦି ଟିମ୍ ସ୍ଲୋ ଓଭର ରେଟ୍ର ଶିକାର ହୁଏ ତେବେ ଅଧିନାୟକଙ୍କ ଉପରେ ପ୍ରଥମ ଥର ପାଇଁ ୧୨ ଲକ୍ଷ ଟଙ୍କାର ଜରିମାନା ଦେବାକୁ ହୋଇଥାଏ। ଦ୍ୱିତୀୟ ଥର ପାଇଁ ୨୪ ଲକ୍ଷ ଏବଂ ତୃତୀୟ ଥର ପାଇଁ ୩୦ ଲକ୍ଷ ସହ ଗୋଟିଏ ମ୍ୟାଚ୍ରୁ ବ୍ୟାନ୍ ଲଗାଯାଇଥାଏ।
ତେବେ ଯଦି ହାର୍ଦ୍ଦିକ ଅଧିନାୟକତ୍ୱ କରିବେ ନାହିଁ ତେବେ ମୁମ୍ବାଇ କାହା ନେତୃତ୍ୱରେ ମଇଦାନକୁ ଓହ୍ଲାଇବ ତାହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ରୋହିତ ଶର୍ମା, ଜସପ୍ରିତ ବୁମ୍ରା, ସୂର୍ଯ୍ୟକୁମାର ଯାଦବ ପ୍ରମୁଖ ରେସ୍ରେ ଆଗରେ ଥିଲେ ହେଁ ସୂର୍ଯ୍ୟକୁମାର ଦଳ ମ୍ୟାନେଜମେଣ୍ଟ ଦୃଷ୍ଟିରେ ଆଗରେ ରହିବେ।
