ଇଣ୍ଡିଆନ ପ୍ରିମିୟର ଲିଗ୍ର ୧୭ଶ ସଂସ୍କରଣ ଶୁକ୍ରବାରଠାରୁ ଆରମ୍ଭ ହେବାକୁ ଯାଉଛି। ତେଣୁ ଏଥିରେ ଭାଗ ନେଉଥିବା ଦଳ ଗୁଡ଼ିକର ପ୍ରସ୍ତୁତି ଅନ୍ତିମ ପର୍ଯ୍ୟାୟରେ ପହଞ୍ଚତ୍ଛି। ଅଧିନାୟକ ହାର୍ଦ୍ଦିକ ପାଣ୍ଡ୍ୟାଙ୍କ ଗୃହ ପ୍ରତ୍ୟାବର୍ତ୍ତନକୁ ନିଆରା ଢଙ୍ଗରେ ସେଲିବ୍ରେଟ କରିବାକୁ ଲକ୍ଷ୍ୟ ରଖିଛି ଏହି ଫ୍ରାଞ୍ଚାଇଜ୍ ଦଳ। ଏକାଧିକ ଖେଳାଳିଙ୍କ ଆହତ ସମସ୍ୟା ମୁଖ୍ୟ କୋଚ୍ ମାର୍କ ବାଉଚରଙ୍କୁ କିଛି ପରିମାଣରେ ଚିନ୍ତାରେ ରଖିଛି। ସ୍ପିନ୍ ବିଭାଗ ଯଦିଓ ଟିକେ ଦୁର୍ବଳ ଲାଗୁଛି ତେବେ ଯଶପ୍ରୀତ୍ ବୁମ୍ରାଙ୍କ ନେତୃତ୍ୱାଧୀନ ପେସ୍ ବାହିନୀ ଏବଂ ପାଓ୍ବର-ପ୍ୟାକେଡ ଭାରତୀୟ ବ୍ୟାଟିଂ ଲାଇନ୍ଅପ୍ ଦଳକୁ ଆଗକୁ ନେଇଯିବା ଆଶା ରହିଛି।
ଗତ ସିଜନରେ ମୁମ୍ବାଇ ଦଳ ୧୪ ଗେମ୍ରୁ ୮ଟିରେ ବିଜୟଲାଭ କରି ଲିଗ୍ ପର୍ଯ୍ୟାୟରେ ୪ର୍ଥ ସ୍ଥାନରେ ରହିଥିଲା। ଏଲିମିନେଟରରେ ଲକ୍ଷ୍ନୌ ସୁପର ଜାଏଣ୍ଟ୍ସକୁ ଦଳ ଯଦିଓ ପରାସ୍ତ କରିଥିଲା ତେବେ କ୍ୱାଲିଫାୟର-୨ରେ ଗୁଜରାଟ ଜାଏଣ୍ଟ୍ସଠାରୁ ହାରି ଯାଇଥିଲା। ଆହତ ସମସ୍ୟା ଯୋଗୁ ଦଳର ତାରକା ଖେଳାଳି ସୂର୍ଯ୍ୟକୁମାର ଯାଦବ ପ୍ରଥମ ମ୍ୟାଚରେ ଖେଳିବା ସମ୍ଭାବନା ନାହିଁ। ପାଦରେ ସମସ୍ୟା ଏବଂ ସ୍ପୋଟର୍ସ ହାର୍ଣ୍ଣିଆ ଯୋଗୁ ସେ ଗତ ୩ ମାସ ମଧ୍ୟରେ ଏକାଧିକ ଅସ୍ତ୍ରୋପଚାର କରାଇଛନ୍ତି। ଏବେ ସେ ବେଙ୍ଗାଲୁରୁସ୍ଥିତ ଜାତୀୟ କ୍ରିକେଟ ଏକାଡେମୀରେ ରିହାବରେ ଅଛନ୍ତି। ନେଟ୍ସରେ ଗୋଡ଼ ଭାଙ୍ଗିବା ଯୋଗୁ ଜାସନ ବେହରେନଡର୍ଫ ଟୁର୍ନାମେଣ୍ଟରୁ ଓହରି ଯାଇଛନ୍ତି। ଇଂଲଣ୍ଡର ବାମହାତୀ ସ୍ପିନର ଲ୍ୟୁକ ଉଡ୍ ତାଙ୍କ ସ୍ଥାନରେ ସାମିଲ ହୋଇଛନ୍ତି। ଗେରାଲ୍ଡ କୋଜି ଯଦିଓ ଦଳରେ ଯୋଗ ଦେଇଛନ୍ତି ତେବେ ସେ ବର୍ତ୍ତମାନ ପର୍ଯ୍ୟନ୍ତ ଗୋଇନ୍ ଇଞ୍ଜୁରିରୁ ସମ୍ପୂର୍ଣ୍ଣ ମୁକୁଳି ନାହାନ୍ତି। ତେଣୁ ସେ ଦଳର ପ୍ରଥମ କିଛି ମ୍ୟାଚ ଖେଳିବା ସମ୍ଭାବନା ନାହିଁ। ହାମଷ୍ଟ୍ରିଙ୍ଗ ଇଞ୍ଜୁରି ଯୋଗୁ ଦିଲଶାନ ମଦୁଶଙ୍କା ଓହରି ଯାଇଛନ୍ତି। ତାଙ୍କ ସ୍ଥାନରେ ଦକ୍ଷିଣ ଆଫ୍ରିକାର ଅନ୍କ୍ୟାପେଡ ମିଡିୟମ ପେସର କ୍ୱେନା ମାଫାକାଙ୍କୁ ଦଳରେ ସାମିଲ କରାଯାଇଛି।
ଏଥର ନୂଆ କ’ଣ ?
ଅଧିନାୟକ ହାର୍ଦ୍ଦିକ ପାଣ୍ଡ୍ୟା ମୁମ୍ବାଇ ଦଳକୁ ପ୍ରତ୍ୟାବର୍ତ୍ତନ କରିଛନ୍ତି। ରୋହିତ ଶର୍ମାଙ୍କ ସ୍ଥାନରେ ସେ ଦଳର ନେତୃତ୍ୱ ନେବେ। ପ୍ରଥମ ଥରପାଇଁ ଜଣେ ଭାରତୀୟ ଟି୨୦ ଅଧିନାୟକ ଆଇପିଏଲ୍ରେ ଅନ୍ୟ ଜଣେ ଖେଳାଳି ଅଧିନରେ ଖେଳିବେ। ଅତିରିକ୍ତ ଚାପ ନ ଥିବାରୁ ରୋହିତ କିପରି ବିସ୍ପୋରକ ବ୍ୟାଟିଂ କରୁଛନ୍ତି ତା’ ଉପରେ ମଧ୍ୟ ନଜର ରହିବ। ଦଳରେ ୬ ନୂଆ ବିଦେଶୀ ଖେଳାଳିଙ୍କୁ ଦେଖିବାକୁ ମିଳିବ। ସେମାନେ ହେଲେ କୋଜି, କ୍ୱେନା ମାଫାକା, ଲ୍ୟୁକ୍ ଉଡ୍, ନୂଓ୍ବାନ ଥୁଶରା, ରୋମାରିଓ ଶେଫର୍ଡ ଓ ମହମ୍ମଦ ନବି। ଲସିଥ ମାଲିଙ୍ଗାଙ୍କ ଆକ୍ସନରେ ବୋଲିଂ କରୁଥିବା ଥୁଶରା ନିକଟରେ ବାଂଲାଦେଶ ବିପକ୍ଷ ଏକ ଟି୨୦ ଅନ୍ତର୍ଜାତୀୟ ମ୍ୟାଚରେ ହ୍ୟାଟ୍ରିକ ସହ ୫ ଉଇକେଟ ସଫଳତା ପାଇଥିଲେ। ଅନ୍କ୍ୟାପେଡ ଖେଳାଳିଙ୍କ ମଧ୍ୟରେ ଶ୍ରେୟାସ ଗୋପାଳ ଭେଟେରାନ ସ୍ପିନର ପୀୟୂଷ ଚାଓ୍ବଲାଙ୍କ ବ୍ୟାକ୍ଅପ୍ଭାବେ ରହିବେ।
ଦୃଢ଼ ବ୍ୟାଟିଂ ଲାଇନ୍ଅପ୍
ଭାରତୀୟ ଖେଳାଳିଙ୍କୁ ନେଇ ମୁମ୍ବାଇ ଇଣ୍ଡିଆନ୍ସର ବ୍ୟାଟିଂ ଲାଇନ୍ଅପ୍ ଶକ୍ତିଶାଳୀ। ସୂର୍ଯ୍ୟକୁମାର ଯାଦବ ଫିଟ୍ ହୋଇଗଲେ ଟପ୍ ଅର୍ଡରର ୫ ସ୍ଥାନରେ ଭାରତୀୟ ଖେଳାଳିଙ୍କୁ ଦେଖିବାକୁ ମିଳିବ। ରୋହିତ ଶର୍ମା, ଇଶାନ କିଶନ, ସୂର୍ଯ୍ୟକୁମାର ଯାଦବ, ତିଳକ ବର୍ମା ଓ ହାର୍ଦ୍ଦିକ ପାଣ୍ଡ୍ୟାଙ୍କ ଉପରେ ଦଳର ବ୍ୟାଟିଂ ବିଭାଗ ମୁଖ୍ୟତଃ ନିର୍ଭର କରିବ। ଟିମ୍ ଡାଭିଡ୍ ୬ ନମ୍ବର ସ୍ଥାନରେ ଆସିବେ। କିଶନ ଓ ତିଳକ ଲେଫ୍ଟ-ରାଇଟ କମ୍ବିନେଶନକୁ ସନ୍ତୁଳିତ କରିବେ। ପ୍ରି-ସିଜନ ଖବରଦାତା ସମ୍ମିଳନୀରେ ହାର୍ଦ୍ଦିକ ପ୍ରକାଶ କରି ସାରିଛନ୍ତି ଯେ ସେ ବୋଲିଂ କରିବା ପାଇଁ ସମ୍ପୂର୍ଣ୍ଣ ଫିଟ୍। ଏହା ଦଳର ସନ୍ତୁଳନକୁ ଅଧିକ ମଜଭୁତ କରିବ। ଶେଫର୍ଡ ଓ ନବିଙ୍କ ଉପସ୍ଥିତିରେ ମୁମ୍ବାଇ ଆଉ ୨ ଜଣ କ୍ୱାଲିଟି ଅଲ୍ରାଉଣ୍ଡର ପାଇବ। ମାତ୍ର ନିହାତି ଆବଶ୍ୟକ ନ ହେଲେ ମୁମ୍ବାଇ ୩ ଜଣ ବିଦେଶୀ ଖେଳାଳିଙ୍କୁ ନେଇ ପଡ଼ିଆକୁ ଓହ୍ଲାଇବ ବୋଲି କୋଚ୍ ବାଉଚର ସୂଚନା ଦେଇ ସାରିଛନ୍ତି।
ବୁମ୍ରାଙ୍କ ଉପରେ ନଜର
ବୁମ୍ରାଙ୍କ ଉପସ୍ଥିତି ମୁମ୍ବାଇର ବୋଲିଂ ବିଭାଗକୁ ଶକ୍ତିଶାଳୀ କରିଛି। ସେ କୌଣସି ପରିସ୍ଥିତିରେ ବୋଲିଂ ପାଇଁ ଦକ୍ଷତା ରଖିଛନ୍ତି। ୨୦୨୩ ଦିନିକିଆ ବିଶ୍ୱକପ ଏବଂ ନିକଟରେ ଶେଷ ହୋଇଥିବା ଇଂଲଣ୍ଡ ବିପକ୍ଷ ଟେଷ୍ଟ ସିରିଜରେ ସେ ଚମତ୍କାର ଫର୍ମରେ ଥିବା ପ୍ରମାଣିତ କରିଛନ୍ତି। ତେବେ ସୂର୍ଯ୍ୟକୁମାର ଅଧିକ ମ୍ୟାଚ ମିସ୍ ନ କରନ୍ତୁ ବୋଲି ଦଳ ନିଶ୍ଚିତ ଚାହିଁବ। କାରଣ କିଶନ ଗତ ନଭେମ୍ବର ପରଠାରୁ ଶୀର୍ଷସ୍ତରର ମ୍ୟାଚ ଖେଳି ନାହାନ୍ତି। ବେହରନଡର୍ଫଙ୍କ ଅନୁପସ୍ଥିତିକୁ ଦଳ ଅନୁଭବ କରିପାରେ। ସେ ଜଣେ ପାଓ୍ବାରପ୍ଲେ ସ୍ପେଶାଲିଷ୍ଟ। ମଦୁଶଙ୍କା ଓହରିଯିବା ଏବଂ ପ୍ରାରମ୍ଭିକ ପର୍ଯ୍ୟାୟରେ କୋଜିଙ୍କ ଅନୁପସ୍ଥିତି ମଧ୍ୟ ଦଳର ସନ୍ତୁଳନକୁ ବିଗାଡ଼ିପାରେ।
ଦୁର୍ବଳ ସ୍ପିନ୍ ବିଭାଗ
ମୁମ୍ବାଇ ଦଳର ସ୍ପିନ ବିଭାଗ ଦୁର୍ବଳ ଲାଗୁଛି। ଚାଓ୍ବଲା ଗତ ସିଜନରେ ଭଲ ପ୍ରଦର୍ଶନ କରି ୧୬ ଗେମ୍ରୁ ୨୨ ଉଇକେଟ ନେଇଥିଲେ। ଟୁର୍ନାମେଣ୍ଟରେ ସେ ଥିଲେ ୪ର୍ଥ ସର୍ବାଧିକ ଉଇକେଟ ହାସଲକାରୀ ବୋଲର। ତେବେ ସେ କିଛିଦିନ ତଳେ ଶେଷ ହୋଇଥିବା ସୟଦ ମୁସ୍ତାକ ଅଲୀ ଟୁର୍ନାମେଣ୍ଟରେ ଭଲ ଖେଳିପାରି ନାହାନ୍ତି। ୭ ମ୍ୟାଚରୁ ସେ ୮.୪୦ ଇକୋନୋମିରେ ମାତ୍ର ୪ଟି ଉଇକେଟ ନେଇଛନ୍ତି। ୩୫ ବର୍ଷର ଚାଓ୍ବଲା ଏଥର ମଧ୍ୟ ମୁମ୍ବାଇ ସ୍ପିନ୍ ବିଭାଗର ନେତୃତ୍ୱ ନେବେ। କୁମାର କାର୍ତ୍ତିକେୟ ଆଇପିଏଲ୍ରେ ଏପର୍ଯ୍ୟନ୍ତ ପ୍ରଭାବୀ ହୋଇପାରି ନାହାନ୍ତି। ଗତ ସିଜନରେ ସେ ୮ ମ୍ୟାଚରୁ ୫ଟି ଉଇକେଟ ନେଇଥିଲେ। ତାଙ୍କ ଇକୋନୋମି ହାର ଥିଲା ୮.୭୩। ଶ୍ରେୟସ ଗୋପାଳ ଗତ ୩ ଆଇପିଏଲ୍ ସିଜନରେ ମାତ୍ର ୪ଟି ମ୍ୟାଚ ଖେଳିବାର ସୁଯୋଗ ପାଇଛନ୍ତି।
ମାର୍ଚ୍ଚ ୨୨ରୁ ଏପ୍ରିଲ ୭ ପର୍ଯ୍ୟନ୍ତ ଆଇପିଏଲ୍ କାର୍ଯ୍ୟସୂଚୀ ଘୋଷିତ ହୋଇଛି। ଏହି ସମୟ ମଧ୍ୟରେ ମୁମ୍ବାଇ ୪ଟି ମ୍ୟାଚ ଖେଳିବ। ଗୁଜରାଟ ଟାଇଟନ୍ସ ଓ ସନ୍ରାଇଜର୍ସ ହାଇଦ୍ରାବାଦ ବିପକ୍ଷରେ ୩ଟି ବାହାର (ଆଓ୍ବେ) ଗେମ୍ ଖେଳିବା ପରେ ହୋମ୍ ଗ୍ରାଉଣ୍ଡରେ ରାଜସ୍ଥାନ ରୟାଲ୍ସ ଓ ଦିଲ୍ଲୀ କ୍ୟାପିଟାଲ୍ସ ବିପକ୍ଷରେ ମୁକାବିଲା କରିବ। ତୃତୀୟ ମ୍ୟାଚପରେ ଦଳ ୫ ଦିନର ବ୍ରେକ୍ ପାଇବ।
