କୋକସରା,୨।୮ (ଡି.ଏନ.ଏ.)-କଳାହାଣ୍ଡି ଜିଲା କୋକସରା ବ୍ଲକ କ୍ଷୁଦ୍ର ଜଳସେଚନ ଓ ଅଣୁ ବିଭାଗ ଅଧୀନରେ ଥିବା ବେହେରା ଡ୍ୟାମ୍ ଏବଂ ବିଭିନ୍ନ ଚେକ୍ ଡ୍ୟାମ୍ରୁ ବାହାରି ଥିବା କେନାଲ ଏବେ ଚାଷ କାମରେ ଲାଗୁନାହିଁ ା ଆବଶ୍ୟକ ରକ୍ଷାଣାବେକ୍ଷଣ, ମରାମତି ଅଭାବରୁ ସେଥିରେ ଏକାଧିକ ଫାଟ ସୃଷ୍ଟି ହୋଇଛି। ବୁଦୁବୁଦିଆ ଗଛଲତାରେ କେନାଲ ପୋତି ହୋଇଯାଇଛି। ଫଳରେ ଜମିକୁ କେନାଲ ପାଣି ମାଡ଼ି ପାରୁନାହିଁ । ଏହାକୁ ନେଇ ସ୍ଥାନୀୟ ଚାଷୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି।
ମିଳିଥିବା ସୂଚନା ଅନୁଯାୟୀ, ବେହେରା ଡ୍ୟାମ୍ରୁ କୋକସରା ବ୍ଲକର ଡୁଡୁକାଠେଙ୍ଗା, ଟେମରା, କାଉଡୋଳା ଓ ମହିମା ପଞ୍ଚାୟତର ୨ ହଜାର ହେକ୍ଟର ଚାଷଜମିକୁ ଖରିଫ ଋତୁ ଓ ୫ ଶହ ହେକ୍ଟର ଚାଷଜମିକୁ ରବି ଋତୁରେ ପାଣି ଯୋଗାଣ ପାଇଁ ବ୍ୟବସ୍ଥା ରହିଛି। ହେଲେ ମରାମତି ଓ କେନାଲ ସଫା କରାଯାଉ ନ ଥିବା ଯୋଗୁ ଜମିକୁ ପାଣି ଆସୁପାରୁନାହିଁ ବୋଲି ଟେମରା,କାଉଡୋଳା ପଞ୍ଚାୟତର ଚାଷୀମାନେ ଅଭିଯୋଗ କରିଛନ୍ତି । ବଡ଼ପୋଡ଼ାଗୁଡା ପଞ୍ଚାୟତ ବାବେକୋହରାଠାରେ ଥିବା ଚେକ୍ ଡ୍ୟାମର ଅବସ୍ଥା ମଧ୍ୟ ତଦ୍ରୂପ । କେନାଲ ସଫା କରିବା ପାଇଁ ପାଣିପଞ୍ଚାୟତ କମିଟି ବାରମ୍ବାର ବିଭାଗୀୟ ଅଧିକାରୀଙ୍କ ଦୃଷ୍ଟିଆକର୍ଷଣ କରିଥିଲେ ମଧ୍ୟ କୌଣସି ପଦକ୍ଷେପ ଗ୍ରହଣ କରାଯାଇନାହିଁ। ଚଳିତବର୍ଷ ଅନିୟମିତ ବର୍ଷା ଯୋଗୁ ଚାଷ କାମ ଆଗେଇ ପାରିନାହିଁ । କେନାଲରେ ପାଣି ପରିଚାଳନାକୁ ବିଭାଗ ଆଦୌ ଦୃଷ୍ଟି ଦେଉନାହିଁ। ଏଣୁ ତାହା ଚାଷୀଙ୍କ କାମରେ ଲାଗୁ ନାହିଁ ବୋଲି କୋକସରା ବ୍ଲକର ଚାଷୀ ନେତା ଶିବ ପ୍ରସାଦ ପ୍ରଧାନୀ କହିଛନ୍ତି । ଏ ନେଇ କୋକସରା ବ୍ଲକ ଯନ୍ତ୍ରୀ ବିନ୍ଦୁ ସାଗର ପଣ୍ଡାଙ୍କୁ ପଚାରିବାରୁ କେନାଲ ମରାମତି କିମ୍ବା ସଫା କରିବାକୁ ବିଭାଗୀୟ ଅନୁଦାନ ଆସିନାହିଁ। ଏମ୍ଜିଏନ୍ଆରଇଜିଏସ୍ରେ କାମ କରିବାକୁ ୨୦ ଲକ୍ଷ ଟଙ୍କା ମଞ୍ଜୁର ହୋଇଥିଲେ ମଧ୍ୟ ତାହା ମିଳିନାହିଁ। ଫଳରେ କାମ ଆଗେଇ ପାରୁନାହିଁ। ଆମେ ଏ ସଂକ୍ରାନ୍ତରେ ବିଭାଗୀୟ ଅଧିକାରୀଙ୍କୁ ଅବଗତ କରିଛୁ ବୋଲି ସେ କହିଛନ୍ତି।
