ବ୍ରହ୍ମପୁର,୫ା୧୧(ସୁବାସ ଚନ୍ଦ୍ର ପାଢ଼ୀ)ଦିନ ଥିଲା ଦକ୍ଷିଣ ଓଡ଼ିଶାର ବ୍ୟବସାୟିକ ପେଣ୍ଠସ୍ଥଳ ବ୍ରହ୍ମପୁରରେ ବାଲୁଙ୍କେଶ୍ୱର ବାଣ ବଜାର ରହିଥିଲା। ଦୀପାବଳି ଆସିବାର ପ୍ରାୟ ମାସକ ପୂର୍ବରୁ ଏହି ବଜାର ଚଳଚଞ୍ଚଳ ହୋଇ ଉଠୁଥିଲା। ଦକ୍ଷିଣ ଓଡ଼ିଶା ସମେତ ଅନ୍ୟ ଜିଲାଗୁଡିକରୁ ବ୍ୟବସାୟୀମାନେ ଏଠାକୁ ବେପାର କରିବାକୁ ଆସୁଥିଲେ। ସୁଲଭ ଦରରେ ବିଭିନ୍ନ ପ୍ରକାର ବାଣ ଏଠାରେ ଉପଲବ୍ଧ ହେଉଥିଲା। ବ୍ରହ୍ମପୁର ସମେତ ଆଖପାଖ ଅଞ୍ଚଳର ଜନସାଧାରଣ ମଧ୍ୟ ଏହି ବାଣବଜାର ଉପରେ ନିର୍ଭର କରୁଥିଲେ। କିନ୍ତୁ ପ୍ରାୟ ୫ ବର୍ଷ ହେବ ଆଉ ଏହି ବାଣ ମାର୍କେଟ ଖୋଲୁନାହିଁ। ଜିଲା ପ୍ରଶାସନ ପକ୍ଷରୁ ସେଠାରେ ବାଣ ବିକ୍ରି ପାଇଁ ଅନୁମତି ମିଳୁନାହିଁ। ବ୍ୟବସାୟୀମାନେ ନିରୁପାୟ ହୋଇ ସେଠାରେ ବାଣ ବେପାର ବନ୍ଦ କରିବାକୁ ବାଧ୍ୟ ହୋଇଛନ୍ତି। ଦୀପାବଳି ଆଉ ମାତ୍ର କିଛିଦିନ ଥିବା ବେଳେ ଏହି ବାଣବଜାର ଏବେ ଖାଁଖାଁ। କେତେଜଣ ବ୍ୟବସାୟୀ ନିଜ ଦୋକାନ ଘରକୁ ଅନ୍ୟମାନଙ୍କୁ ଭଡ଼ାରେ ଦେଇଛନ୍ତି। ସେଠାରେ ଗୋଡ଼ି, ବାଲି, ସିମେଣ୍ଟ, ଡାଏରୀ ମିଲ୍କ, ଗ୍ୟାରେଜ୍, ମାଛ ଗୋଦାମ ଆଦି ଖୋଲିଛି। ବାଣ ମାର୍କେଟ ଏବେ ଇତିହାସ ପାଲଟିଥିବା ଭଳି ମନେ ହେଉଛି।
ସୂଚନା ମୁତାବକ, ୮୦ଦଶକରେ ପ୍ରଥମେ ପୁରୁଣା ଆମ୍ବ ବଜାରରେ ଅସ୍ଥାୟୀ ଭାବେ ବାଣବଜାର ଆରମ୍ଭ ହୋଇଥିଲା। ପରେ ୧୯୯୫ରେ ଅନ୍ଧପସରା ରୋଡ଼ରେ ସ୍ଥାୟୀ ଭାବେ ବାଲୁଙ୍କେଶ୍ୱର ବାଣ ବଜାର ସ୍ଥାପନ ହୋଇଥିଲା। ସେଠାରେ ପ୍ରାୟ ୮୦ଜଣ ବ୍ୟବସାୟୀଙ୍କର ୮୦ଟି ଦୋକାନ ଘର ଥିଲା। ଦୁର୍ଘଟଣାକୁ ଏଡ଼ାଇବା ପାଇଁ ଯଥାସାଧ୍ୟ ପଦକ୍ଷେପ ନିଆଯାଇଥିଲା। ପ୍ରତି ଦୋକାନ ସମ୍ମୁଖରେ ଅଗ୍ନି ନିର୍ବାପକ ଯନ୍ତ୍ର, ବାଲି, ବଜାର ମଝିରେ ପାଣି କୁଣ୍ଡ ଆଦିି ଆବଶ୍ୟକ ସୁରକ୍ଷା ଉପକରଣ ରହିଥିଲା। ବଜାର ପଛପାଖରେ ମଧ୍ୟ ବେଡ଼ା ବନ୍ଧ ରହିଛି। ଗଞ୍ଜାମ ଜିଲା ଆସିକାର ନଳବଣ୍ଟାରୁ ଆରମ୍ଭ କରି ଆଙ୍କୁଶପୁର ଏବଂ ବ୍ରହ୍ମପୁର ସହ ଏହାର ଆଖପାଖ ଅଞ୍ଚଳରେ ପ୍ରସ୍ତୁତ ହେଉଥିବା ଦେଶୀ ବାଣ ସହ ଶିବକାଶୀରୁ ନାନା ରକମର ବାଣ ଏହି ବଜାରକୁ ଆସୁଥିଲା। ପାଇକାରୀ ଦରରେ ବାଣ କିଣି ନେଇ ବିକ୍ରି କରିବାକୁ ଦୀପାବଳିର ମାସକ ପୂର୍ବରୁ ଏହି ବଜାରକୁ ଲୋକଙ୍କ ସୁଅ ଛୁଟୁଥିଲା। କିନ୍ତୁ ୨୦୧୯ରୁ ଏହି ବଜାରରେ ବାଣ ବେପାର କରିବା ପାଇଁ ବ୍ୟସାୟୀମାନଙ୍କୁ ଜିଲା ପ୍ରଶାସନ ପକ୍ଷରୁ ଲାଇସେନ୍ସ ମିଳୁନାହିଁ। ଫଳରେ ବାଣବଜାର ତା’ର ଚମକ ହରାଇଛି। ବ୍ୟବସାୟୀମାନେ ସେମାନଙ୍କ ଦେକାନ ଘରକୁ ଅନ୍ୟମାନଙ୍କୁ ଭଡ଼ାରେ ଦେଇଛନ୍ତି। ୪/୫ ଜଣ ବାଣ ବ୍ୟବସାୟୀ କୁକୁଡ଼ାଖଣ୍ଡି ବ୍ଲକ ଅନ୍ତର୍ଗତ ଡେଙ୍ଗାପଦରକୁ ଯାଇ ବ୍ୟବସାୟ କରୁଥିବା ଜଣାପଡ଼ିଛି। ଆଉ କେତେକ ବ୍ୟବସାୟୀ (ପ୍ରାୟ ୩୫ଜଣ) ସହର ଉପକଣ୍ଠ ଆଙ୍କୁଶପୁର ନିକଟ ବୁଢ଼ୀଘରା ଠାକୁରାଣୀ ମନ୍ଦିର କଡ଼ରେ ଥିବା ନିରୋଳା ସ୍ଥାନ ଖୋଜି ସେଠାରେ ସାମୂହିକ ବାଣ ବ୍ୟବସାୟ କରି ବଜାର ସୃଷ୍ଟି କରିବାକୁ ଅଣ୍ଟାଭିଡ଼ିଛନ୍ତି। କିନ୍ତୁ ଏ ପର୍ଯ୍ୟନ୍ତ ସେଥିରେ ସଫଳ ହୋଇନାହାନ୍ତି। ଅନ୍ୟପଟେ ପରମ୍ପରା ଅନୁସାରେ ଲୋକେ ଦୀପାବଳିରେ ବାଣ କିଣିବା ପାଇଁ ଚାହୁଁଥିଲେ ମଧ୍ୟ ତାହା ମୁସ୍କିଲ ହୋଇପଡୁଛି। ମୁନଫାଖୋର ବ୍ୟାସାୟୀମାନେ ବେଆଇନ ଭାବେ ଲୁଚାଛପାରେ ଚଢାଦରରେ ବାଣ ବିକ୍ରି କରୁଛନ୍ତି। ବାଲୁଙ୍କେଶ୍ୱର ବାଣ ବଜାରର ସମ୍ପାଦକ ରାଜୁ ସାହୁ କହିଛନ୍ତି, ଅନ୍ଧପସରା ନିକଟରେ ଥିବା ବାଲୁଙ୍କେଶ୍ୱର ବାଣ ବଜାର ସମସ୍ତ ନିୟମ କାନୁନ ଅନୁସାରେ ଚାଲିଥିଲା। ପ୍ରାୟ ୭୦ ଜଣ ବ୍ୟବସାୟୀ ଲାଇସେନ୍ସ ପାଇ ସେଠାରେ ବ୍ୟବସାୟ କରୁଥିଲେ। ସରକାରଙ୍କ କଟକଣା ଯୋଗୁ ଉକ୍ତ ବାଣ ବଜ଼ାର ୫ ବର୍ଷ ହେଲା ବନ୍ଦ ରହିଛି। ଆଗକୁ ଜିଲା ପ୍ରଶାସନ ଅନୁମତି ଦେଲେ ସହର ବାହାରେ ବାଣ ବଜ଼ାର ଖୋଲାଯିବ ବୋଲି ସେ କହିଛନ୍ତି।
