କୋରାପୁଟ,୧୯।୭(ଅମିତାଭ ବେହେରା): କୋରାପୁଟ ସହରରେ ଗୋ ହତ୍ୟା ସହ ମାଂସ ଚାଲାଣ ହେଉଥିବା ଖବରପାଇ ଟାଉନ ଥାନା ପୋଲିସ ପକ୍ଷରୁ ଚଢ଼ାଉ କରାଯାଇ ୨ ଅଭିଯୁକ୍ତଙ୍କୁ ଗିରଫ କରିବା ସହ ୧୫ଜଣଙ୍କୁ ରବିବାର ଅଟକ ରଖାଯାଇଛି। ଅଭିଯୁକ୍ତମାନେ ହେଲେ ହମିଦ ବିବି ଓ ମାଧବ ଭୋଈ। ୩ କଟାଯାଇଥିବା ଗାଈକୁ ଜବତ କରାଯାଇଥିବା ଟାଉନ ଥାନା ଅଧିକାରୀ ସତ୍ୟାନନ୍ଦ ପାତ୍ର ସୂଚନା ଦେଇଛନ୍ତି।
ମିଳିଥିବା ସୂଚନା ମୁତାବକ, ମିଶନ କମ୍ପାଉଣ୍ଡ ଓ ଚିନ୍ଦିରି ଗ୍ରାମ ମଝିରେ ଗୋ ହତ୍ୟା ଚାଲିଥିବା ଖବର ପାଇ ଉପନିରୀକ୍ଷକ ମାନସ ରଞ୍ଜନ ପ୍ରଧାନଙ୍କ ନେତୃତ୍ୱରେ ଏକ ଟିମ୍ ଚଢ଼ାଉ କରିଥିଲା। ଏହି ସମୟରେ ୩ ଗୋରୁ କଟାଯାଉଥିବା ବେଳେ ସେଗୁଡ଼ିକୁ ଜବତ କରାଯାଇଥିଲା।
ଏ ନେଇ ଟାଉନ ଥାନାରେ ନଂ.୨୦୯/୨୦୨୬ ଓ ନଂ.୨୧୦/୨୦୨୬ରେ ୨ଟି ମାମଲା ରୁଜୁ କରାଯାଇଛି। ମାଜିଷ୍ଟ୍ରେଟ ଭଗବାନ ନାୟକଙ୍କ ଉପସ୍ଥିତିରେ ଚଢ଼ାଉ ହୋଇଥିଲା। ଭେଟେରିନାରୀ ସର୍ଜନ ଡା. ହିମାଂଶୁ ସ୍ବାଇଁଙ୍କ ତତ୍ତ୍ୱାବଧାନରେ ଜବତ ଗାଈର ଅବଶେଷକୁ ନିୟମ ଅନୁଯାୟୀ କିଛି ପୋତି ଦିଆଯାଇ ଓ ଆଉ କିଛି ପୋଡ଼ି ନଷ୍ଟ କରାଯାଇଛି। ଚଢ଼ାଉରେ ଏସ୍ଆଇ ଉମେଶ କୁମାର ଧରୁଆ, ରାଜେଶ ପ୍ରିୟଦର୍ଶୀ ନାୟକ, କରୁଣାକର ଶବର, ଏଏସ୍ଆଇ ଶେଖ ମୁକ୍ତାଜ, ବାଳକୃଷ୍ଣ ରଥ ଓ ଯୁଧିଷ୍ଠିର ମୁଦୁଲି ପ୍ରମୁଖ ସାମିଲ ରହିଥିଲେ।
