ନୂଆଦିଲ୍ଲୀ,୨୯।୮: ଭାରତରୁ ବିଦେଶ ଯାତ୍ରା କରୁଥିବା ଲୋକଙ୍କ ପାଇଁ ଏକ ଖୁସି ଖବର ଅଛି। ଯାତ୍ରୀମାନଙ୍କୁ ଆଉ କରୋନା ଟେଷ୍ଟ ରିପୋର୍ଟ ପାଇଁ କଠିନ ପରିଶ୍ରମ କରିବାକୁ ପଡ଼ିବ ନାହିଁ। ଖୁବ ଶୀଘ୍ର କୋଓ୍ବିନ୍ ଆପରେ ଲୋକଙ୍କ ପାଇଁ କରୋନା ଟେଷ୍ଟ ରିପୋର୍ଟ ଉପଲବ୍ଧ ହେବ। ଜାତୀୟ ସ୍ବାସ୍ଥ୍ୟ ପ୍ରାଧିକରଣର ସଭାପତି ଆର.ଏସ ଶର୍ମା କହିଛନ୍ତି ଯେ, ଏପର୍ଯ୍ୟନ୍ତ ସମସ୍ତ ଟିକାକରଣ ତଥ୍ୟ କୋଓ୍ବିନ୍ ଆପରେ ଉପଲବ୍ଧ, କିନ୍ତୁ ଆମେ ଏହି ଆପରେ କିଛି ପରିବର୍ତ୍ତନ କରିବାକୁ ଯାଉଛୁ, ଯାହା ଦ୍ୱାରା ଲୋକମାନେ ଆପ ମାଧ୍ୟମରେ ସେମାନଙ୍କର କରୋନା ପରୀକ୍ଷା ରିପୋର୍ଟ ଡାଉନଲୋଡ କରିପାରିବେ। ଆମେ ଆଇସିଏମଆର (ଭାରତୀୟ ଚିକିତ୍ସା ଅନୁସନ୍ଧାନ ପରିଷଦ) ର ମହାନିର୍ଦ୍ଦେଶକଙ୍କ ସହ କାର୍ଯ୍ୟ କରୁଛୁ ଏବଂ ଆମେ ଏକ ସିଷ୍ଟମ ପ୍ରସ୍ତୁତ କରିଛୁ, ଯେପରି କୋଓ୍ବିନ୍ ଆପ୍ରେ ଆପଣ ଟିକାକରଣ ପ୍ରମାଣପତ୍ରକୁ ଡାଉନଲୋଡ କରିପାରିବେ ସେହିଭଳି, ଏବେ ଆପଣ ଆର୍ଟି-ପିସିଆର୍ ଟେଷ୍ଟ ରିପୋର୍ଟ ମଧ୍ୟ ଏହି ଆପ୍ରୁ ଡାଉନଲୋଡ କରିବାକୁ ସମର୍ଥ ହେବେ।
ସୂଚନାଯୋଗ୍ୟ, ଭାରତରେ କରୋନା ଟିକାକରଣ ପାଇଁ କୋଓ୍ବିନ୍ ଆପ ହେଉଛି ଏକ କ୍ଲାଉଡ ଆଧାରିତ ପରିଚାଳନା ବ୍ୟବସ୍ଥା। ଏହି ଆପରେ, ଟିକାକରଣ କେନ୍ଦ୍ର ଠାରୁ ଆରମ୍ଭ କରି ଟିକା ନେଇଥିବା ଲୋକଙ୍କ ପର୍ଯ୍ୟନ୍ତ ଏକ ସମ୍ପୂର୍ଣ୍ଣ ତାଲିକା ରହିଛି।