ନୂଆଦିଲ୍ଲୀ,୨୭।୧୨:କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ମାନସୁଖ ମାଣ୍ଡବ୍ୟ ଭାରତୀୟ ମେଡିକାଲ ଆସୋସିଏସନ (ଆଇଏମଏ)ର ପ୍ରତିନିଧୀ, ବରିଷ୍ଠ ଡାକ୍ତର ଏବଂ ଜନସ୍ବାସ୍ଥ୍ୟ ବିଶେଷଜ୍ଞଙ୍କ ସହ କୋଭିଡଙ୍କ ସ୍ଥିତି ଏବଂ ପ୍ରସ୍ତୁତିର ସମୀକ୍ଷା ପାଇଁ ଏକ ଭର୍ଚୁଆଲ ବୈଠକ କରିଛନ୍ତି।
ବିଶେଷ କରି ଚାଇନା, ଜାପାନ, ଦକ୍ଷିଣ କୋରିଆ ଏବଂ ଥାଇଲ୍ୟାଣ୍ଡରେ ବଢୁଥିବା କରୋନା ସଂକ୍ରମଣକୁ ଦୃଷ୍ଟିରେ ରଖି ଦେଶରେ ଏହା ଉପରେ ନଜର ରଖିବାକୁ ସରକାରଙ୍କ ଉଦ୍ୟମର ଏକ ଅଂଶ ଭାବରେ ଏହି ବୈଠକ ଅନୁଷ୍ଠିତ ହୋଇଥିଲା। ତେବେ ଭାରତରେ ପରିସ୍ଥିତି ଠିକ ଅଛି। ଗତ ୭ ଦିନରେ ଭାରତରେ ରିପୋର୍ଟ ହୋଇଥିବା ନୂତନ ମାମଲା ସଂଖ୍ୟା ୧ ଡିସେମ୍ବରରେ ୩୦୦ରୁ କମ ହୋଇ ୨୫ ଡିସେମ୍ବରରେ ୧୬୩କୁ ହ୍ରାସ ପାଇଛି।
ଇଣ୍ଡିଆନ ମେଡିକାଲ ଆସୋସିଏସନ (ଆଇଏମଏ) ର ପୂର୍ବତନ ସଭାପତି ଡା. ଜୟଲାଲ ମଧ୍ୟ ସ୍ବାସ୍ଥ୍ୟମନ୍ତ୍ରୀଙ୍କ ସହ ହୋଇଥିବା ବୈଠକରେ ଅଂଶଗ୍ରହଣ କରିଥିଲେ। ଜୟଲାଲ କହିଛନ୍ତି, ବିଶେଷକରି ସ୍ବାସ୍ଥ୍ୟ କର୍ମୀ ଏବଂ ଫ୍ରଣ୍ଟଲାଇନ୍ ଓ୍ବାର୍କର୍ସଙ୍କ ପାଇଁ ଚତୁର୍ଥ ଡୋଜ୍ ଉପରେ ବିଚାର କରିବାକୁ ସରକାରଙ୍କୁ ଅନୁରୋଧ କରାଯାଇଛି।
ସ୍ବାସ୍ଥ୍ୟସେବା ଏବଂ ଫ୍ରଣ୍ଟଲାଇନ କର୍ମଚାରୀଙ୍କ ପାଇଁ ପ୍ରାୟ ଏକ ବର୍ଷ ପୂର୍ବରୁ ବୁଷ୍ଟର ଡୋଜ୍ ନେଇଥିଲେ। ତେଣୁ ସେମାନଙ୍କ ରୋଗ ପ୍ରତିରୋଧକ ଶକ୍ତି ଶେଷ ହୋଇଯାଇଥିବ। ବରିଷ୍ଠ ଡାକ୍ତର, ନର୍ସ, ହସ୍ପିଟାଲର ଅନ୍ୟ କର୍ମଚାରୀ ଏବଂ ଫ୍ରଣ୍ଟଲାଇନ କର୍ମଚାରୀଙ୍କ ପାଇଁ ଦ୍ୱିତୀୟ ବୁଷ୍ଟର ଡୋଜ ଉପରେ ବିଚାର କରିବାକୁ ଆମେ ମନ୍ତ୍ରୀଙ୍କୁ ଅନୁରୋଧ କରିଛୁ। ଅନ୍ୟାନ୍ୟ ପରାମର୍ଶରେ ମନ୍ତ୍ରୀଙ୍କ ସହ କଥାବାର୍ତ୍ତା ବେଳେ ଜନଗହଳି ପୂର୍ଣ୍ଣ ସ୍ଥାନରେ ମାସ୍କ ପିନ୍ଧିବା ମଧ୍ୟ ସାମିଲ ଥିଲା।