ଭୁବନେଶ୍ୱର,୩।୮(ବ୍ୟୁରୋ): ବିଭିନ୍ନ ଡିଜାଇନ୍ର ଆକର୍ଷଣୀୟ ଶାଢ଼ି, ଚୁଡ଼ି, ସାଲ୍ୱାର, ବ୍ୟାଗ୍, କୁର୍ତ୍ତି, ଜ୍ୟାକେଟ, ଜୋତା, ଅଳଙ୍କାର, ଘରୋପକରଣର ସମ୍ଭାରରେ ଭରପୂର ହୋଇଛି କଟନ ଫାବ୍ ପ୍ରଦର୍ଶନୀ। ଗୁଆହାଟୀ, ଲକ୍ଷ୍ନୌ, ଗୁଜରାଟ, ବାରାଣସୀ, ରାଜସ୍ଥାନ, ପଞ୍ଜାବ, ମଧ୍ୟପ୍ରଦେଶ, ଦିଲ୍ଲୀ, ମୁମ୍ବାଇ, ଶ୍ରୀନଗର, ହରିୟାଣା, ଭାଗଲପୁର, ଆସାମ ସହ ଓଡ଼ିଶାର ଅନେକ ସ୍ଥାନରୁ ଆସିଥିବା କାରିଗର ସେମାନଙ୍କ ହାତ ତିଆରି ସାମଗ୍ରୀର ପସରା ମେଲାଇଛନ୍ତି। ଜୁଲାଇ ୨ରୁ ଆରମ୍ଭ ହୋଇଥିବା ଏହି ପ୍ରଦର୍ଶନୀ ଆଜି ୩ ତାରିଖରେ ଶେଷ ହେଉଛି। ତେଣୁ ପ୍ରଦର୍ଶନୀ ବୁଲି ଦେଖିବା ସହ କିଣାକିଣି ଲାଗି ଗୋଟିଏ ଦିନର ସୁଯୋଗ ଥିବାରୁ ଶେଷ ଦିନରେ ଭଲ ବେପାର ଆଶା ରଖିଛନ୍ତି ଆୟୋଜକ।
ପ୍ରଦର୍ଶନୀ ଭିତରକୁ ପଶିବା କ୍ଷଣି ହାଜି ମହମ୍ମଦ ୟାମୁନ ନାମକ ଜଣେ ମଉସାଙ୍କ ଚୁଡ଼ିକାମ ଅତ୍ୟନ୍ତ ମନୋଲୋଭା ହୋଇଛି। ତାଙ୍କ ପାଖରେ ମହିଳାଙ୍କ ଭିଡ଼ ଲାଗୁଛି। ୧୭ବର୍ଷରୁ ଅଧିକ ହେବ ସେ ଏହି ପ୍ରଦର୍ଶନୀରେ ଭାଗ ନେଉଛନ୍ତି। ନିଜ ହାତରେ ତିଆରି କରିଥିବା ଚୁଡ଼ିଗୁଡିକର ଡିଜାଇନ୍ ବେଶ୍ ଆକର୍ଷଣୀୟ ହୋଇଛି। ସେହିପରି ବ୍ୟବସାୟୀ ବାଦଲ କୁମାରଙ୍କ ପାଖରେ ସିଖୋ ସଫ୍ଟ ସିଲ୍କ, ଟସର ସିଲ୍କ, ଟୋସା, କାଞ୍ଜିପୁରମ ଭଳି ସୁନ୍ଦର ଶାଢ଼ି ରହିଛି। ରାଜସ୍ଥାନରୁ ଆସିଥିବା ଆଲାମଙ୍କ ଷ୍ଟଲ୍ରେ ବହୁ ସାଧାରଣ ଓ ସୁନ୍ଦର ଡିଜାଇନର ରେଗୁଲାର କୁର୍ତ୍ତି କଲେକ୍ସନ ରହିଛି। ଦାମ୍ ୫୫୦ରୁ ଆରମ୍ଭ। ବର୍ତ୍ତମାନ ଟ୍ରେଣ୍ଡରେ ଚାଲୁଥିବା ଝିଅଙ୍କ ଚିକନେ କୁର୍ତ୍ତିର ଅନେକ ପ୍ରକାର ଡିଜାଇନ ମଧ୍ୟ ଉପଲବ୍ଧ ରହିଛି। ଏଥିସହ ପ୍ରଦର୍ଶନୀର ବିଭିନ୍ନ ଷ୍ଟଲ୍ରେ ହରିୟାଣାର ଧୋତି, ଅଳଙ୍କାର ଯଥା କାନଫୁଲ, ହାର, ପାଉଁଜି, ଓଡ଼ିଶାରୁ ବ୍ରହ୍ମପୁର ଆଚାର, ପାମ୍ପଡ଼, କନ୍ଧମାଳ ହଳଦୀ, ବିଭିନ୍ନ ପନିପରିବା ମଞ୍ଜି ଆଦି ବିକ୍ରି ହେଉଛି। କିଣିବା ସହ ଖାଇବାର ମଜା ନେବା ପାଇଁ ଫୁଡ ଷ୍ଟଲଗୁଡ଼ିକରେ ମଧ୍ୟ ଲୋଙ୍କର ଭିଡ଼ ଦେଖିବାକୁ ମିଳିଛି।
