ନୂଆଦିଲ୍ଲୀ,୪।୬: ଆମ ମଧ୍ୟରୁ ଅନେକ ଲୋକ କୋର୍ଟ ମ୍ୟାରେଜ (Court Marriage) କରିବାକୁ ଇଚ୍ଛା ପ୍ରକାଶ କରିଥାନ୍ତି। ଯଦି ଆପଣ ମଧ୍ୟ ସେମାନଙ୍କ ମଧ୍ୟରୁ ଜଣେ, ତେବେ ଆଜି ଆମେ ଆପଣଙ୍କୁ ଜଣାଇବୁ ଏଥିପାଇଁ କେତେ ଖର୍ଚ୍ଚ ହୋଇଥାଏ ଏବଂ ଏହାର ସମ୍ପୂର୍ଣ୍ଣ ପ୍ରକ୍ରିୟା କ’ଣ।
ଆଜିକାଲି ଅଧିକାଂଶ ଲୋକ ସିମ୍ପଲ ବା ସାଧାରଣ ବିବାହ ଉପରେ ବିଶ୍ୱାସ କରୁଛନ୍ତି। ଏହାଦ୍ୱାରା ଟଙ୍କା ମଧ୍ୟ ବଞ୍ଚିଥାଏ ଏବଂ ସାଦାସିଧା ଭାବେ ବିବାହ ସମ୍ପନ୍ନ ହୋଇଯାଏ। ଏଭଳି ପରିସ୍ଥିତିରେ ଆଜିକାଲି ଅନେକ ଲୋକ କୋର୍ଟ ମ୍ୟାରେଜର ବିକଳ୍ପ ବାଛୁଛନ୍ତି। ହେଲେ ଆମ ମଧ୍ୟରୁ ଅଧିକାଂଶ ଲୋକଙ୍କୁ ଏଥିପାଇଁ ଆବଶ୍ୟକ ହେଉଥିବା ଦସ୍ତାବିଜ ଏବଂ ଖର୍ଚ୍ଚ ବିଷୟରେ ଜଣାନଥାଏ।
କୋର୍ଟ ମ୍ୟାରେଜ ଆଜିକାଲି ଅନେକ ଲୋକଙ୍କ ପ୍ରଥମ ପସନ୍ଦ ପାଲଟିଛି। ଏହା ଶସ୍ତା, ଆଇନଗତ ଭାବେ ସୁଦୃଢ଼ ଏବଂ ଗୋପନୀୟ ହୋଇଥାଏ। ଏଥିରେ ଅଧିକ ଖର୍ଚ୍ଚ ମଧ୍ୟ ହୁଏନାହିଁ। ଏଥିରେ ସରକାରୀ ଫିସ ପ୍ରାୟ ୫୦୦ ଟଙ୍କାରୁ ୩,୦୦୦ ଟଙ୍କା ପର୍ଯ୍ୟନ୍ତ ହୋଇଥାଏ, ଯେଉଁଥିରେ ନୋଟିସ ଫାଇଲିଂ, ରେଜିଷ୍ଟ୍ରେସନ ଏବଂ ମ୍ୟାରେଜ ସାର୍ଟିଫିକେଟ (ବିବାହ ପ୍ରମାଣପତ୍ର) ର ଫିସ ସାମିଲ ଥାଏ। ଦିଲ୍ଲୀ, ମୁମ୍ୱାଇ, ବେଙ୍ଗାଲୁରୁ ଭଳି ବଡ଼ ବଡ଼ ସହରଗୁଡ଼ିକରେ ମଧ୍ୟ ସରକାରୀ ଫିସ ୧୦୦ ରୁ ୧,୫୦୦ ଟଙ୍କା ମଧ୍ୟରେ ରହିଥାଏ। ଏଭଳି ପରିସ୍ଥିତିରେ କୋର୍ଟ ମ୍ୟାରେଜ ପାଇଁ ମୋଟ ଖର୍ଚ୍ଚ ସାଧାରଣତଃ ୩,୦୦୦ ରୁ ୧୦,୦୦୦ ଟଙ୍କା ମଧ୍ୟରେ ଆସିଥାଏ, ତେବେ ଏହା ଭିନ୍ନ ଭିନ୍ନ ରାଜ୍ୟ ଅନୁଯାୟୀ ଅଲଗା ହୋଇପାରେ।
courtmarriage.net ର ସୂଚନା ଅନୁଯାୟୀ, ସାଧାରଣ ମାମଲାରେ ଯେପରିକି ଏକା ଧର୍ମର ଏବଂ ବିନା କୌଣସି ବିବାଦରେ ବିବାହ କରିବା ପାଇଁ ୮,୦୦୦ ରୁ ୧୫,୦୦୦ ଟଙ୍କା ପର୍ଯ୍ୟନ୍ତ ଖର୍ଚ୍ଚ ହୋଇଥାଏ। ଅନ୍ୟପଟେ ଆନ୍ତଃ-ଜାତି (Inter-caste) କିମ୍ୱା ଆନ୍ତଃ-ଧର୍ମ (Inter-religion) ବିବାହ କ୍ଷେତ୍ରରେ ୧୫,୦୦୦ ରୁ ୨୫,୦୦୦ ଟଙ୍କା କିମ୍ୱା ତା’ଠାରୁ ସାମାନ୍ୟ ଅଧିକ ଖର୍ଚ୍ଚ ହୋଇଥାଏ। ସେହିପରି ଜରୁରୀକାଳୀନ କିମ୍ୱା ସେହି ଦିନ (Same Day) ବିବାହ କରିବାକୁ ହେଲେ ୨୦,୦୦୦ ରୁ ୩୫,୦୦୦ ଟଙ୍କା ପର୍ଯ୍ୟନ୍ତ ଲାଗିଯାଇଥାଏ।
ମୋଟାମୋଟି ଭାବେ ଦେଖିବାକୁ ଗଲେ ପ୍ରକୃତ ଖର୍ଚ୍ଚ ମୁଖ୍ୟତଃ ଓକିଲ କିମ୍ୱା ସର୍ଭିସ ପ୍ରୋଭାଇଡରଙ୍କ ଫିସ ଉପରେ ଯାଇଥାଏ। ଏହା ମଧ୍ୟରେ ଆଫିଡେଭିଟ (Affidavit) ପ୍ରସ୍ତୁତ କରିବା, ନୋଟାରୀ, ଷ୍ଟାମ୍ପ ପେପର, ସାକ୍ଷୀମାନଙ୍କ ଖର୍ଚ୍ଚ, ଫଟୋକପି ଏବଂ ଯାତାୟାତ ଖର୍ଚ୍ଚ ସାମିଲ ଥାଏ। ଏଭଳି ପରିସ୍ଥିତିରେ ଯଦି ଆପଣ ଖର୍ଚ୍ଚ କମାଇବାକୁ ଚାହୁଁଛନ୍ତି, ତେବେ ନିଜେ ସରକାରୀ ଅଫିସକୁ ଯାଇ ନୋଟିସ ଫାଇଲ କରିପାରିବେ। ଏହାସହ ଓକିଲଙ୍କ ବଦଳରେ ସ୍ଥାନୀୟ ମାର୍କେଟରୁ ଆଫିଡେଭିଟ ବନାଇପାରିବେ ଏବଂ ନିଜର ୩ ଜଣ ବିଶ୍ୱସ୍ତ ସାକ୍ଷୀ ଯେପରିକି ସାଙ୍ଗ କିମ୍ୱା ସମ୍ପର୍କୀୟମାନଙ୍କୁ ନିଜ ସହିତ ନେଇଯାଇପାରିବେ।
ଆସନ୍ତୁ ଜାଣିବା ଏହି ସବୁ ଖର୍ଚ୍ଚ କେଉଁ କେଉଁ ବାବଦରେ ଯାଇଥାଏ:
ସରକାରୀ ରେଜିଷ୍ଟ୍ରେସନ ଫିସ: ୫୦୦ – ୩,୦୦୦ ଟଙ୍କା
ଆଫିଡେଭିଟ, ନୋଟାରୀ ଏବଂ ଷ୍ଟାମ୍ପ: ୫୦୦ – ୨,୦୦୦ ଟଙ୍କା
ଓକିଲ / ସର୍ଭିସ ପ୍ରୋଭାଇଡର ଫିସ: ୩,୦୦୦ – ୧୨,୦୦୦ ଟଙ୍କା
ସାକ୍ଷୀମାନଙ୍କ ସହ ଜଡ଼ିତ ଆନୁଷଙ୍ଗିକ ଖର୍ଚ୍ଚ: ୨,୦୦୦ – ୫,୦୦୦ ଟଙ୍କା
ଫଟୋ, ଫଟୋକପି ଓ ଯାତାୟାତ: ୫୦୦ – ୧,୫୦୦ ଟଙ୍କା