ଭୁବନେଶ୍ୱର, ୨୭।୭(ବ୍ୟୁରୋ): ବାଡ଼ ଖାଉଛି ଫସଲ। ରାଜ୍ୟରେ ତଳସ୍ତରରୁ ଉପରଯାଏ ଦୁର୍ନୀତି ଭରି ରହିଛି। ପର୍ସେଣ୍ଟେଜ୍(ପିସି) କାରବାର ବୃଦ୍ଧି ପାଇଛି। ସରକାରଙ୍କ ସମସ୍ତ ବିଭାଗରେ ପୁଳାପୁଳା ଦୁର୍ନୀତି। ଏଥିରେ ତଳଶ୍ରେଣୀର କର୍ମଚାରୀଠାରୁ ଆରମ୍ଭ କରି ଉପର ଅଫିସର ପର୍ଯ୍ୟନ୍ତ ଏକ ର଼୍ୟାକେଟ କାମ କରୁଛି। ଭିଜିଲାନ୍ସ କେବଳ ତଳିଆ କର୍ମଚାରୀଙ୍କୁ ଧରୁଥିବା ବେଳେ ବଡ଼ବଡ଼ ମାଛ ଖସି ଯାଉଛନ୍ତି। ମୁଖ୍ୟମନ୍ତ୍ରୀ ଦୁର୍ନୀତିକୁ ନେଇ ଶୂନ୍ୟ ସହନଶୀଳତା(ଜିରୋ ଟଲରାନ୍ସ) କହୁଥିବା ବେଳେ ବ୍ଲକସ୍ତରରୁ ଆରମ୍ଭ କରି ପଞ୍ଚାୟତ ଓ ଜିଲା ସବୁଆଡେ ଦୁର୍ନୀତି ହୋଇଛି। ଏପରିକି ପୋଲିସ କର୍ମଚାରୀ ମଧ୍ୟ ଦୁର୍ନୀତିରେ ଲିପ୍ତ ରହୁଛନ୍ତି। ରାଜ୍ୟରେ ପିସି କାରବାରକୁ ନେଇ ବିରୋଧୀ ଦଳ ସରକାରଙ୍କୁ ଜୋରଦାର ଆକ୍ରମଣ କରିଛନ୍ତି।
ବୁଧବାର ବିଜେଡି ସଭ୍ୟ ଅମର ଶତପଥୀ ବିରୋଧୀଙ୍କ ମୁଲତବୀ ପ୍ରସ୍ତାବକୁ ବିରୋଧ କରି କହିଲେ ଯେ, ରାଜ୍ୟ ସରକାର ସର୍ବଦା ଦୁର୍ନୀତି ଉପରେ ଶୂନ୍ୟ ସହନଶୀଳତା ନୀତି ଅବଲମ୍ବନ କରିଆସିଛନ୍ତି। ଯେଉଁଠି ଦୁର୍ନୀତି ହେଉଛି ସେଠାରେ ତଦନ୍ତ କରାଯାଇ ପଦକ୍ଷେପ ନିଆଯାଉଛି। ଦୁର୍ନୀତିକୁ କୌଣସି କ୍ଷେତ୍ରରେ ଚପାଇ ଦିଆଯାଉନାହିଁ। ସେହିଭଳି ମୁଲତବୀ ଆଲୋଚନା ଶେଷରେ ଅର୍ଥମନ୍ତ୍ରୀ ନିରଞ୍ଜନ ପୂଜାରୀ କହିଥିଲେ ଯେ, ବିରୋଧୀଙ୍କ ପାଖରେ କୌଣସି ନିର୍ଦ୍ଦିଷ୍ଟ ଅଭିଯୋଗ ନାହିଁ। ଭିଜିଲାନ୍ସ କାମକୁ କଦର୍ଥ କରି କହୁଛନ୍ତି। ଦୁର୍ନୀତି ବିରୋଧରେ କଡ଼ା କାର୍ଯ୍ୟାନୁଷ୍ଠାନ ହେଉଥିବାରୁ ୨୨ ବର୍ଷ ଧରି ଜନସାଧାରଣ ବିଜେଡିକୁ ଶାସନ କରିବାକୁ ସୁଯୋଗ ଦେଇଛନ୍ତି। ଭିଜିଲାନ୍ସ ବିପକ୍ଷରେ ବହୁ ଦକ୍ଷ ଅଫିସରଙ୍କୁ ନିଯୁକ୍ତି ଦିଆଯାଇଛି। ୨୦୧୮ରେ ଭିଜିଲାନ୍ସ ଏକାଡେମୀ ପ୍ରତିଷ୍ଠା ହୋଇଛି। ସେଥିଲାଗି ଅଧିକ ୯୧ ପଦବୀ ସୃଷ୍ଟି କରାଯାଇଛି । ରାଉରକେଲାରେ ଭିଜିଲାନ୍ସ ଡିଭିଜନ ପ୍ରତିଷ୍ଠା ହୋଇଛି। ସରକାର କେବଳ ତଳିଆ କର୍ମଚାରୀ ନୁହେଁ ବରଂ ଜିଲାପାଳଙ୍କୁ ମଧ୍ୟ ଜେଲ ପଠାଇଛନ୍ତି। ଦୁର୍ନୀତିମୁକ୍ତ ସ୍ବଚ୍ଛ ଶାସନ ଦେବାଲାଗି ସରକାର ପ୍ରତିଶ୍ରୁତିବଦ୍ଧ। ଏତିକି କହିବା ବେଳେ ବିରୋଧୀ ସଦସ୍ୟମାନେ ହୋ-ହଲ୍ଲା କରି ବିଧାନସଭା କକ୍ଷଛାଡ଼ି ବାହାରକୁ ପଳାଇ ଯାଇଥିବା ଦେଖାଯାଇଛି।
