ବେଜିଂ, ୯।୨: କରୋନା ଭୂତାଣୁର ଉତ୍ସ ଖୋଜୁଥିବା ବୈଜ୍ଞାନିକମାନେ ଚାଇନାରେ ତଦନ୍ତ କରି କେତେକ ଗୁରୁତ୍ୱପୂର୍ଣ୍ଣ ସୂଚନା ପାଇଛନ୍ତି। ମହାମାରୀ ବ୍ୟାପିବାରେ ଉହାନ ସାମୁଦ୍ରିକ ଖାଦ୍ୟ ବଜାରର ଭୂମିକା ରହିଛି। ବିଶ୍ୱ ସ୍ବାସ୍ଥ୍ୟ ସଂଗଠନ (ଡବ୍ଲ୍ୟୁଏଚ୍ଓ) ପ୍ରାୟୋଜନରେ ଚାଲିଥିବା ମିଶନରେ ନ୍ୟୁୟର୍କର ଜୀବବିଜ୍ଞାନୀ ପିଟର ଡାସ୍ଜାକ୍ ସହଯୋଗ କରିଥିଲେ। ୧୪ ଜଣିଆ ଟିମ୍ ଚାଇନାରେ ବିଶେଷଜ୍ଞମାନଙ୍କ ସହ କାର୍ଯ୍ୟ କରୁଛନ୍ତି। ସେମାନେ ବିଭିନ୍ନ ହଟ୍ସ୍ପଟ ଓ ଗବେଷଣାକେନ୍ଦ୍ରକୁ ଯାଇ କେତେକ ବାସ୍ତବ ସୂଚନା ସଂଗ୍ରହ କରିଛନ୍ତି।
ବିଶେଷଜ୍ଞମାନଙ୍କ କହିବା ଅନୁଯାୟୀ ଉହାନଠାରୁ ୧୦୦୦ ମାଇଲ୍ ଦୂରରୁ କରୋନାର ନିକଟ ସମ୍ପର୍କୀୟ ଭୂତାଣୁ ବାଦୁଡ଼ିଠାରୁ ଆସିଥିଲା। ତେବେ ବାଦୁଡ଼ିଠାରୁ ସିଧାସଳଖ ମଣିଷ ଦେହକୁ ଉକ୍ତ ଭୂତାଣୁ ଆସିଥିବାର କୌଣସି ସ୍ପଷ୍ଟ ସୂଚନା ନାହିଁ। ତାହା କିପରି ଉହାନରେ ବ୍ୟାପିଲା ଜାଣିବାକୁ ସେମାନେ ଉଦ୍ୟମ ଚଳାଇଛନ୍ତି। କରୋନା ମହାମାରୀରେ ବର୍ତ୍ତମାନ ସୁଦ୍ଧା ୧୦.୫୭ କୋଟି ସଂକ୍ରମିତ ହୋଇଥିବାବେଳେ ୨୩ ଲକ୍ଷଙ୍କ ମୃତ୍ୟୁ ହେଲାଣି। ଭୂତାଣୁର ଉତ୍ସ ଖୋଜି ବାହାର କରିବାକୁ ଗତବର୍ଷ ମେ’ରେ ଡବ୍ଲ୍ୟୁଏଚ୍ଓକୁ କୁହାଯାଇଥିଲା। ଉହାନ ଭାଇରୋଲୋଜି ଇନ୍ଷ୍ଟିଚ୍ୟୁଟରୁ ଭୂତାଣୁ ଆସିଥିବା କଥାକୁ ବୈଜ୍ଞାନିକମାନେ ଅସ୍ବୀକାର କରିଛନ୍ତି। ସେମାନେ ଅଧିକରୁ ଅଧିକ ତଥ୍ୟ ସଂଗ୍ରହ କରି ତାହାର ଅନୁଧ୍ୟାନ କରୁଛନ୍ତି।
