ନୂଆଦିଲ୍ଲୀ,୨୫।୬ : ସମବାୟ ବ୍ୟାଙ୍କଗୁଡ଼ିକର ପରିଚାଳନାକୁ ନେଇ ବୁଧବାର କେନ୍ଦ୍ର କ୍ୟାବିନେଟ୍ ବୈଠକରେ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ଗ୍ରହଣ କରାଯାଇଛି। ଏହାଦ୍ୱାରା ଦେଶରେ ଥିବା ୧୪୮୨ ଅର୍ବାନ କୋ-ଅପରେଟିଭ ବ୍ୟାଙ୍କ ଏବଂ ୫୮ ମଲ୍ଟି ଷ୍ଟେଟ କୋ-ଅପରେଟିଭ ବ୍ୟାଙ୍କ ରିଜର୍ଭ ବ୍ୟାଙ୍କ ପରିସରକୁ ଆସିଛି। ସମବାୟ ବ୍ୟାଙ୍କଗୁଡ଼ିକ ଉପରେ ତତ୍ତ୍ୱାବଧାନ ରଖିବା ଲାଗି କେନ୍ଦ୍ର ସରକାର ରିଜର୍ଭ ବ୍ୟାଙ୍କକୁ ଅଧ୍ୟାଦେଶ ଦ୍ୱାରା ନୂଆ କ୍ଷମତା ପ୍ରଦାନ କରିଛନ୍ତି। ଘରୋଇ ବଜାରର ବାଣିଜି୍ୟକ ବ୍ୟାଙ୍କଗୁଡ଼ିକ କ୍ଷେତ୍ରରେ ଯେଉଁ ଭଳି ଭାବେ କେନ୍ଦ୍ରୀୟ ବ୍ୟାଙ୍କ ନିୟମ ଲାଗୁ ହେଉଛି ବର୍ତ୍ତମାନ ସମବାୟ ବ୍ୟାଙ୍କଗୁଡ଼ିକ ଲାଗି ମଧ୍ୟ ଉକ୍ତ ନିୟମ ପରିସରକୁ ଆସିବେ। ବୁଧବାର ଖବରଦାତା କାର୍ଯ୍ୟକ୍ରମରେ କେନ୍ଦ୍ର ମନ୍ତ୍ରୀ ପ୍ରକାଶ ଜାଭଡେକର ଏ ସମ୍ପର୍କରେ ସୂଚନା ଦେଇଛନ୍ତି।
ଜାଭଡେକର କହିଛନ୍ତି ଯେ, ଦେଶ ମଧ୍ୟରେ ସମବାୟ ବ୍ୟାଙ୍କଗୁଡ଼ିକର ପରିସର ବହୁତ ବଡ଼ ରହିଛି। ୧୫୪୦ ସମବାୟ ବ୍ୟାଙ୍କରେ ୮.୬ କୋଟି ଜମାକାରୀ ରହିଛନ୍ତି। ଏମାନଙ୍କର ମୋଟ ଜମାପୁଞ୍ଜି ୪.୮୪ ଲକ୍ଷ କୋଟି ଟଙ୍କା ରହିଛି। ସମବାୟ ବ୍ୟାଙ୍କଗୁଡ଼ିକୁ ରିଜର୍ଭ ବ୍ୟାଙ୍କ ଅଧୀନକୁ ଆସିବା ପରେ ବ୍ୟବସ୍ଥାରେ ସ୍ବଚ୍ଛତା ଏବଂ ଏହି ବ୍ୟାଙ୍କଗୁଡ଼ିକ ପ୍ରତି ଗ୍ରାହକଙ୍କର ବିଶ୍ୱସନୀୟତା ବଢ଼ିବ ବୋଲି ଜାଭଡେକର ମତ ପ୍ରକାଶ କରିଛନ୍ତି। ନୂଆ ନିୟମ ମୁତାବକ ରିଜର୍ଭ ବ୍ୟାଙ୍କ ଏହି ବ୍ୟାଙ୍କଗୁଡ଼ିକର ଅଡିଟିଂ ଏବଂ ପରିଚାଳନା କ୍ଷେତ୍ରରେ ଅଧିକ କ୍ଷମତା ଲାଭ କରିବ। ନିୟାମକ ଦୃଷ୍ଟିକୋଣରୁ ବ୍ୟାଙ୍କଗୁଡ଼ିକରେ ସର୍ବୋତ୍ତମ ପରିଚାଳନା ପ୍ରାକ୍ଟିସ ଆଣିବା ଲାଗି କେନ୍ଦ୍ର ସରକାର ପୂର୍ବରୁ କହିଥିଲେ। ସମବାୟ ବ୍ୟାଙ୍କଗୁଡ଼ିକର ପରିଚାଳନାରେ ବିଗତ ଦିନଗୁଡ଼ିକରେ ଉଠିଥିବା ପ୍ରଶ୍ନବାଚୀ ଆଧାରରେ ସରକାର ଏଭଳି ପଦକ୍ଷେପ ଗ୍ରହଣ କରିଥିବା ଜଣାପଡ଼ିଛି। ନୂଆ କ୍ଷମତା ଦ୍ୱାରା ରିଜର୍ଭ ବ୍ୟାଙ୍କ ସମବାୟ ବ୍ୟାଙ୍କଗୁଡ଼ିକର ବୋର୍ଡକୁ ପୁନର୍ଗଠନ ଦିଗରେ କାର୍ଯ୍ୟପନ୍ଥା ଗ୍ରହଣ କରିପାରିବ ବୋଲି ଜଣାପଡିଛି।
ଏହାବାଦ ଜାଭଡେକର କ୍ୟାବିନେଟ୍ର ଅନ୍ୟ ଏକ ନିଷ୍ପତ୍ତି ସମ୍ପର୍କରେ ସୂଚନା ଦେଇଛନ୍ତି। ମୁଦ୍ରା ଲୋନ୍କୁ ନେଇ ସେ କହିଛନ୍ତି ଯେ, ମୁଦ୍ରାର ଶିଶୁ ଋଣ ବର୍ଗରେ ହିତାଧିକାରୀଙ୍କୁ ୨% ସୁଧ ରିହାତି ମିଳିବ। ଶିଶୁ ଋଣ ଯୋଜନାରେ ୯.୩୫ କୋଟି ହିତାଧିକାରୀଙ୍କୁ ଏହି ନିଷ୍ପତ୍ତି ଦ୍ୱାରା ଲାଭ ମିଳିବ। ଚଳିତ ବର୍ଷ ଜୁନ୍ ପହିଲାରୁ ଏହା କାର୍ଯ୍ୟକାରୀ ହେବାକୁ ଥିବା ବେଳେ ୨୦୨୧ ମେ ମାସ ଯାଏ ଏହାର ଅବଧି ରହିବ।