ନୂଆଦିଲ୍ଲୀ, ୪ା୭ (ପି.ଟି.)-ଚଣ୍ଡିଗଡ଼ ନିକଟରେ ଏକ ଟି୨୦ ମ୍ୟାଚ ଖେଳାଯାଇଥିଲା। କିନ୍ତୁ ଅନ୍ଲାଇନ୍ ଷ୍ଟ୍ରିମ୍ରେ ଏହି ଖେଳ ଶ୍ରୀଲଙ୍କାରେ ହୋଇଥିବା ଦର୍ଶାଯାଇଛି, ଯାହାକି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)ର ଦୁର୍ନୀତି ନିବାରଣ ଶାଖା (ଏସିୟୁ), ପଞ୍ଜାବ ପୋଲିସ ଏବଂ ଶ୍ରୀଲଙ୍କା କ୍ରିକେଟ ବୋର୍ଡ (ଏସ୍ଏଲ୍ସି)ର ନଜରକୁ ଆସିଛି। ଏସ୍ଏଲସି କହିଛି ଏଥିରେ ଏହାର ସମ୍ପୃକ୍ତି ନାହିଁ। ଯଦି ଅଭିଯୋଗ ଆସେ ତେବେ ଆଇନଗତ ପଦକ୍ଷେପ ନେବାକୁ ପଛାଇବ ନାହିଁ। ଏଣେ ଏକ ଖବରକାଗଜରେ ପ୍ରକାଶିତ ରିପୋର୍ଟ ଅନୁସାରେ ଏହି ମ୍ୟାଚ ଜୁନ୍ ୨୯ ତାରିଖରେ ଚଣ୍ଡିଗଡ଼ଠାରୁ ୧୬ କିଲୋମିଟର ଦୂର ସାଓ୍ବାରା ଗ୍ରାମ୍ରେ ଖେଳାଯାଇଥିଲା। କିନ୍ତୁ ଅନ୍ଲାଇନ୍ ଷ୍ଟ୍ରିମ୍ରେ ଏହା ‘ୟୁଭା ଟି୨୦ ଲିଗ୍’ର ଏକ ମ୍ୟାଚ ବୋଲି ଦର୍ଶାଯାଇଥିଲା। ୟୁଭା ପ୍ରୋଭିନ୍ସ କ୍ରିକେଟ ଆସୋସିଏଶନର ନିଜ ସହର ତଥା ଶ୍ରୀଲଙ୍କାର ବଦୁଲା ସହରରେ ଅନୁଷ୍ଠିତ ହୋଇଥିଲା। ପଞ୍ଜାବ ପୋଲିସ ପକ୍ଷରୁ ଘଟଣାର ତଦନ୍ତ ଆରମ୍ଭ ହୋଇଛି। ମ୍ୟାଚ୍ ସହିତ କୌଣସି ବେଟିଂ ସିଣ୍ଡିକେଟ୍ ସମ୍ପୃକ୍ତ କି ନା ତାହାର ଅନୁସନ୍ଧାନ ଚାଲିଛି। ବିସିସିଆଇ ଏହି ମ୍ୟାଚ ସହିତ ଯେଉଁମାନେ ସମ୍ପୃକ୍ତ ସେମାନଙ୍କ ଖୋଜଖବର ନେଉଛି। ଅନ୍ୟପକ୍ଷରେ ମ୍ୟାଚ୍ଟିକୁ ନେଇ ଶ୍ରୀଲଙ୍କାରେ ଯୋଜନା ପ୍ରସ୍ତୁତ ହୋଇଥିବା ସମ୍ପର୍କରେ କୌଣସି ଖବର ନ ଥିବା ଏସ୍ଏଲ୍ସି କହିଛି। ବିସିସିଆଇ ଦୁର୍ନୀତି ନିବାରଣ ଶାଖା ମୁଖ୍ୟ ଅଜିତ୍ ସିଂ କହିଛନ୍ତି, ମ୍ୟାଚ୍ ସହିତ ସମ୍ପୃକ୍ତ ଲୋକମାନଙ୍କ ଖୋଜ ଖବର ନିଆଯାଉଛି। ଆମେ ଆମ ଡାଟାବେସ୍କୁ ଅପ୍ଡେଟ୍ କରିବାକୁ ଚାହୁଁଛୁ। ବିସିସିଆଇର ଏକ ଏନ୍ଫୋର୍ସମେଣ୍ଟ ଏଜେନ୍ସି ଭାବେ ଏହା ଆମ କର୍ତ୍ତୃତ୍ୱ ବାହାରେ। କେବଳ ପୋଲିସ ଯାହା କାର୍ଯ୍ୟାନୁଷ୍ଠାନ ଗ୍ରହଣ କରିବ। ସେ କହିଛନ୍ତି, ଯଦି ଏହା ବିସିସିଆଇର ସ୍ବୀକୃତିପ୍ରାପ୍ତ ଲିଗ୍ ହୋଇଥାନ୍ତା କିମ୍ବା ଆମର କୌଣସି ଖେଳାଳି ଏଥିରେ ଅଂଶଗ୍ରହଣ କରିଥାନ୍ତେ ତେବେ ଆମେ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିପାରିଥାନ୍ତୁ। ଯଦି ଏହା ବେଟିଂ ଉଦ୍ଦେଶ୍ୟରେ ଖେଳାଯାଇଥାଏ ତେବେ ଏହା ଏକ ଫୌଜଦାରି ଅପରାଧ। କେବଳ ପୋଲିସ ହିଁ ଏକ୍ଷେତ୍ରରେ ଯାହା ପଦକ୍ଷେପ ନେଇ ପାରିବ। ଆମର ଏଥିରେ କିଛି କରିବାର ନାହିଁ। ଶ୍ରୀଲଙ୍କା କ୍ରିକେଟ ତରଫରୁ ଏକ ବିବୃତିରେ କୁହାଯାଇଛି ଯେ, ଏକ ଅଜ୍ଞାତ ପାର୍ଟି ଦ୍ୱାରା ଆୟୋଜିତ ‘ୟୁଭା ପ୍ରିମିୟର ଲିଗ୍ ଟି୨୦’ ଶୀର୍ଷକ ଟୁର୍ନାମେଣ୍ଟରେ ଏସ୍ଏଲ୍ସି ସମ୍ପୃକ୍ତ ନାହିଁ କିମ୍ବା ଏହାକୁ ସ୍ବୀକୃତି ପ୍ରଦାନ କରି ନାହିଁ। ସୂଚନାଯୋଗ୍ୟ, ବାଦୁଲା ଷ୍ଟାଡିୟମରେ ଜୁନ୍ ୨୯ରେ ୟୁଭା ପ୍ରିମିୟର ଲିଗ୍ ଟି୨୦ର ଖେଳାଯାଇଥିବା ଏହି ମ୍ୟାଚରେ ବହୁ ଭାରତୀୟ ଓ୍ବେବ୍ସାଇଟ୍ର ବିଜ୍ଞାପନ ସ୍କୋର ବୋର୍ଡରେ ଦେଖିବାକୁ ମିଳିଥିଲା। କିନ୍ତୁ ଏଭଳି ଟୁର୍ନାମେଣ୍ଟ ଶ୍ରୀଲଙ୍କାରେ ଆୟୋଜିତ ହୋଇ ନାହିଁ କି ଭବିଷ୍ୟତରେ ହେବାର ନାହିଁ ବୋଲି ଏସ୍ଏଲ୍ସି ପକ୍ଷରୁ ଦୃଢଭାବେ କୁହାଯାଇଛି। ଏସ୍ଏଲ୍ସିର ସିଇଓ ଆଶଲେ ଡି’ ସିଲ୍ଭା କହିଛନ୍ତି, ଏହି ବିଷୟର ପ୍ରକୃତ ସତ୍ୟାସତ୍ୟ କ’ଣ ତାହା ଯାଞ୍ଚ କରି ଦେଖିବା ଲାଗି ସେ ଦୁର୍ନୀତି ନିବାରଣ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି।
