ବ୍ରହ୍ମପୁର,୧୩।୧୧(ସୁବାସ ଚନ୍ଦ୍ର ପାଢ଼ୀ): ଏମକେସିଜି ମେଡିକାଲରେ ପଜେଟିଭ ବଦଳରେ ନେଗେଟିଭ ଗ୍ରୁପର ରକ୍ତ ଦିଆଯିବା ସହ ଠିକ ସମୟରେ ଚିକିତ୍ସା କରା ନଯିବାରୁ ଜଣେ ପ୍ରସୂତିଙ୍କ ମୃତ୍ୟୁ ହୋଇଥିବା ପରିବାର ଲୋକେ ଅଭିଯୋଗ କରିଛନ୍ତି। ଏହାକୁ ନେଇ ଉତ୍ତେଜନା ଦେଖାଦେଇଛି। କିନ୍ତୁ ଏହି ଅଭିଯୋଗକୁ ଏମକେସିଜି ସ୍ତ୍ରୀ ଓ ପ୍ରସୂତି ବିଭାଗୀୟ ମୁଖ୍ୟ ଖଣ୍ଡନ କରିଛନ୍ତି। ପ୍ରସବ ପରବର୍ତ୍ତୀ ଜଟିଳତା ଯୋଗୁ ମହିଳାଙ୍କ ମୃତ୍ୟୁ ହୋଇଥିବା ସଫେଇ ଦିଆଯାଇଛି।
ଗଞ୍ଜାମ ବ୍ଲକ କରପଡା ଗ୍ରାମର ପ୍ରଶାନ୍ତ ନାୟକଙ୍କ ସ୍ତ୍ରୀ ସୁନେଲୀ (୨୪)ଙ୍କ ୨ ଦିନ ତଳେ ଗର୍ଭ ଯନ୍ତ୍ରଣା ହେବାରୁ ଛତ୍ରପୁର ଉପଖଣ୍ଡ ମେଡିକାଲରେ ଭର୍ତ୍ତି ହୋଇଥିଲେ। ସ୍ବାସ୍ଥ୍ୟାବସ୍ଥା ଗୁରୁତର ହେବାରୁ ରେଫର ହୋଇ ଏମକେସିଜି ମେଡିକାଲକୁ ଆସିଥିଲେ। ଏଠାରେ ପହଞ୍ଚିବା ପରେ ସୁନେଲୀଙ୍କୁ ଲେବର ରୁମରେ ଦିନସାରା ରଖାଯାଇଥିଲା। ମଙ୍ଗଳବାର ସକାଳେ ତାଙ୍କର ଏକ ପୁତ୍ର ସନ୍ତାନ ଜନ୍ମ ହୋଇଥିଲା। ପ୍ରସବର କିଛି ଘଣ୍ଟା ପରେ ସୁନେଲୀଙ୍କ ରକ୍ତସ୍ରାବ ବଢ଼ିବାରେ ଲାଗିଥିଲା। ତାଙ୍କୁ ତୁରନ୍ତ ପ୍ରସୂତି ପରବର୍ତ୍ତୀ ଜରୁରୀକାଳୀନ କକ୍ଷରେ ଭର୍ତ୍ତି କରାଯାଇଥିଲା। ଡାକ୍ତରମାନେ ସୁନେଲୀଙ୍କ ଚିକିତ୍ସା କରିବା ସହ ରକ୍ତ ଯୋଗାଡ କରିବାକୁ ପରିବାର ଲୋକଙ୍କୁ କହିଥିଲେ। ତେବେ ସୁନେଲୀଙ୍କ ରକ୍ତ ଗ୍ରୁପ ପୂର୍ବ ମେଡିକାଲ ରିପୋର୍ଟ ଓ ମମତା କାର୍ଡରେ ‘ଓ’ ପଜିଟିଭ ଦର୍ଶାଯାଇଥିବା ବେଳେ ଏମକେସିଜି ମେଡିକାଲରେ ପରୀକ୍ଷା ପରେ ତାଙ୍କ ରକ୍ତ ଗ୍ରୁପ ‘ଓ’ ନେଗେଟିଭ ବୋଲି ଜଣାପଡିଥିଲା । ଫଳରେ ପରିବାର ଲୋକେ ପ୍ରଥମେ ‘ଓ’ ପଜିଭିଟ ରକ୍ତ ଆଣିଥିବା ବେଳେ ପରେ ସେମାନଙ୍କୁ ‘ଓ’ ନେଗେଟିଭ ରକ୍ତ ଆଣିବାକୁ କୁହାଯାଇଥିଲ। ଚିକିତ୍ସାଧୀନ ଅବସ୍ଥାରେ ସୁନେଲୀଙ୍କୁ ଡାକ୍ତରମାନେ ମୃତ ଘୋଷଣା କରିଥିଲେ। ତେବେ ଭୁଲ ରକ୍ତ ଦିଆଯିବା ସହ ପ୍ରସବ ପରେ ଠିକ ଭାବେ ଚିକିତ୍ସା କରାନଯିବାରୁ ମୃତ୍ୟୁ ହୋଇଥିବା ପରିବାର ଲୋକେ ଅଭିଯୋଗ କରିଥିଲେ। ରକ୍ତ ଗ୍ରୁପ କ୍ରସ ମ୍ୟାଚିଂ ରିପୋର୍ଟରେ ଲେଖାଗୁଡ଼ିକ ସଂଶୋଧନ କରାଯାଇଛି। ସୋମବାର ରାତିରେ ଭୁଲ ରକ୍ତ ଦିଆଯିବା ସମ୍ପର୍କରେ ସୁନେଲୀଙ୍କ ପରିବାର ପକ୍ଷରୁ ଏମକେସିଜିର ଅଧୀକ୍ଷକ ଓ ରେଜିଷ୍ଟା୍ରରଙ୍କୁ ଜଣାଇବାକୁ ଫୋନ ଦ୍ବାରା ଯୋଗାଯୋଗ କରିବାକୁ ଚେଷ୍ଟା କରିଥିଲେ ମଧ୍ୟ ସନ୍ତୋଷଜନକ ଉତ୍ତର ମିଳି ନଥିବା ସେମାନେ ଅଭିଯୋଗ କରିଛନ୍ତି । ତେଣୁ ଏହି ଘଟଣାର ତଦନ୍ତ କରାଯିବା ସହ ଆବଶ୍ୟକ କାର୍ଯ୍ୟାନୁଷ୍ଠାନ ନିଆଯିବାକୁ ପରିବାର ଲୋକେ ଦାବି କରିଛନ୍ତି । ଭାଜପା କୃଷକ ମୋର୍ଚ୍ଚା ଗଞ୍ଜାମ ବ୍ଲକ ପୂର୍ବତନ ସଭାପତି ତଥା ମୃତାଙ୍କ କକା ହେମନ୍ତ ନାହାକ କହିଛନ୍ତି, ସୁନେଲୀଙ୍କ ମମତା କାର୍ଡ ଓ ଛତ୍ରପୁର ମେଡିକାଲର ରିପୋର୍ଟରେ ତାଙ୍କର ରକ୍ତ ଗ୍ରୁପ ‘ଓ’ ପଜେଟିଭ ଥିବା ସତ୍ତ୍ୱେ ଏମକେସିଜି ଡାକ୍ତର ତାଙ୍କୁ ‘ଓ’ ନେଗେଟିଭ ରକ୍ତ ଦେଇଥିଲେ। ଡାକ୍ତରଙ୍କ ଏହି ତ୍ରୁଟି ଯୋଗୁଁ ମୋ ଝିଆରିର ମୃତ୍ୟୁ ଘଟିଛି। ଘଟଣାର ଠିକ ତଦନ୍ତ କରି ଦୋଷୀ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନେବା ପାଇଁ ସେ ସ୍ଥାନୀୟ ବିଧାୟକଙ୍କ ସହାୟତାରେ ସ୍ବାସ୍ଥ୍ୟମନ୍ତ୍ରୀ ଓ ମୁଖ୍ୟମନ୍ତ୍ରୀଙ୍କ ନିକଟରେ ଅଭିଯୋଗ କରିବେ ବୋଲି କହିଛନ୍ତି। ଘଟଣାକୁ ନେଇ ଏମକେସିଜିର ଡିନ ତଥା ଅଧୀକ୍ଷକ ପ୍ରଫେସର ଡା. ସୁଚିତ୍ରା ଦାସଙ୍କୁ ପଚାରିବାରେ ସେ କହିଛନ୍ତି ଚିକିତ୍ସା ଅବହେଳା ନୁହଁ ବରଂ ରକ୍ତହୀନତା ଓ ପ୍ରସବ ପରବର୍ତ୍ତୀ ଜଟିଳତା ଯୋଗୁ ସୁନେଲୀଙ୍କ ମୃତ୍ୟୁ ହୋଇଛି । ସେହିପରି ସୁନେଲୀଙ୍କ ରକ୍ତ ଗ୍ରୁପ ପରୀକ୍ଷା ପରେ ‘ଓ’ନେଗେଟେିଭ ଜଣାପଡିବା ପରେ ତାଙ୍କୁ ସେହି ଗ୍ରୁୃପର ୩ ୟୁନିଟ ରକ୍ତ ଦିଆଯାଇଥିଲା ବୋଲି ରକ୍ତଭଣ୍ଡାର ମୁଖ୍ୟ ପ୍ରଫେସର ଡା. ସବିତା ପଲେଇ କହିଛନ୍ତି । ‘ଓ’ନେଗେଟେିଭ ରକ୍ତ ନେବା ପରେ କାହାର ମୃତ୍ୟୁ ହୁଏନାହିଁ ବୋଲି ମଧ୍ୟ ସେ କହିଛନ୍ତି । ସେହିପରି ପ୍ରସବର କିଛି ସମୟ ପରେ ସୁନେଲୀଙ୍କ ପୋଷ୍ଟ ପୋର୍ଟନ ହେମେରେଜ(ପିପିଏଚ) ସମସ୍ୟା ଦେଖାଦେଇଥିଲା। ତାଙ୍କୁ ଅସ୍ତ୍ରୋପଚାର ଗୃହକୁ ନେଇ ଆବଶ୍ୟକ ଚିକିତ୍ସା କରାଯାଇଥିଲା । ସମସ୍ତ ଚେଷ୍ଟା ପରେ ମଧ୍ୟ ତାଙ୍କର ମୃତ୍ୟୁ ହୋଇଥିଲା ବୋଲି ସ୍ତ୍ରୀ ଓ ପ୍ରସୂତି ବିଭାଗ ମୁଖ୍ୟ ପ୍ରଫେସର ଡା. ସଂଘମିତ୍ରା ମହାପାତ୍ର କହିଛନ୍ତି ।
