ନୂଆଦିଲ୍ଲୀ, ୮ା୪ (ପି.ଟି.): ସୂଚନା ପ୍ରଯୁକ୍ତି (ଆଇଟି) ନିୟମାବଳୀରେ କରାଯାଇଥିବା କଠୋର ସଂଶୋଧନ ସରକାରଙ୍କୁ ମିଛ ଖବର ନିର୍ଦ୍ଧାରଣ କରିବା ପାଇଁ ନିରଙ୍କୁଶ କ୍ଷମତା ଦେବ। ଏଭଳି ସଂଶୋଧନ ଅତ୍ୟନ୍ତ ଚିନ୍ତାଜନକ ବୋଲି ଏଡିଟର୍ସ ଗିଲ୍ଡ ଶୁକ୍ରବାର କହିଛି। ସରକାର ସୂଚନା ପ୍ରଯୁକ୍ତି (ଇଣ୍ଟରମିଡgିଆରି ଗାଇଡ୍ଲାଇନ୍ସ ଆଣ୍ଡ ଡିଜିଟାଲ ମିଡିଆ ଏଥିକ୍ସ କୋଡ୍) ସଂଶୋଧନ ନିୟମାବଳୀକୁ ପ୍ରତ୍ୟାହାର କରିନିଅନ୍ତୁ। ଏଥିସହିତ ପୂର୍ବ ପ୍ରତିଶ୍ରୁତି ଅନୁଯାୟୀ ଗଣମାଧ୍ୟମ ସଂସ୍ଥାଗୁଡ଼ିକ ସହ ପରାମର୍ଶ କରିବାକୁ ଏଡିଟର୍ସ ଗାଇଡ ଏକ ବିବୃତିରେ କହିଛି।
ଗିଲ୍ଡ କହିବା ଅନୁଯାୟୀ, ସଂଶୋଧିତ ନିୟମାବଳୀରେ ‘ଫ୍ୟାକ୍ଟ ଚେକିଂ ୟୁନିଟ’ ସ୍ଥାପନ ଲାଗି ଆଇଟି ମନ୍ତ୍ରଣାଳୟ ନିଜକୁ କ୍ଷମତା ଦେଇଛି। କେଉଁ ଖବର ମିଛ, ଜାଲ୍ କିମ୍ବା ବିଭାନ୍ତିକର, ତାହା ଚୟନ କରିବାର ସମ୍ପୂର୍ଣ୍ଣ କ୍ଷମତା କେନ୍ଦ୍ର ସରକାରଙ୍କୁ ମିଳିଯିବ। ଏହା ବ୍ୟତୀତ ଆଇଟି ମନ୍ତ୍ରଣାଳୟ ସାମାଜିକ ଗଣମାଧ୍ୟମ ମଧ୍ୟସ୍ଥତାକାରୀ, ଇଣ୍ଟରନେଟ୍ ସେବା ପ୍ରଦାନକାରୀ ଏବଂ ଅନ୍ୟ ସେବା ପ୍ରଦାନକାରୀମାନଙ୍କୁ ଏଭଳି ବିଷୟବସ୍ତୁ ପ୍ରସାର ନ କରିବା ପାଇଁ ନିର୍ଦ୍ଦେଶ ଦେବାର କ୍ଷମତା ପାଇଛି।
ଏଭଳି ଫ୍ୟାକ୍ଟ ଚେକିଂ ୟୁନିଟ ପାଇଁ ଶାସନଗତ ବ୍ୟବସ୍ଥା, ନ୍ୟାୟିକ ଅନୁଧ୍ୟାନ, ଅପିଲ୍ କରିବାର ଅଧିକାର ସମ୍ପର୍କରେ ନିୟମାବଳୀରେ ଉଲ୍ଲେଖ କରାଯାଇ ନାହିଁ। ସେହିପରି ବିଷୟବସ୍ତୁ ହଟାଇବା କିମ୍ବା ସୋସିଆଲ ମିଡିଆ ହ୍ୟାଣ୍ଡଲକୁ ବ୍ଲକ୍ କରିବା ସମ୍ପର୍କରେ ଶ୍ରେୟା ସିଙ୍ଘାଲ ବନାମ କେନ୍ଦ୍ର ସରକାର ମାମଲାରେ ସୁପ୍ରିମକୋର୍ଟଙ୍କ ଗାଇଡ୍ଲାଇନ ଅନୁପାଳନ ପ୍ରସଙ୍ଗରେ ମଧ୍ୟରେ କୌଣସି ଉଲ୍ଲେଖ ନାହିଁ। ଏହା ବାସ୍ତବ ନ୍ୟାୟିକ ନିୟମାବଳୀ ବିରୋଧୀ ଏବଂ ସେନ୍ସରଶିପ୍ ସଦୃଶ ବୋଲି ଏଡିଟର୍ସ ଗିଲ୍ଡ କହିଛି।
୨୦୨୩ ଜାନୁୟାରୀରେ ମନ୍ତ୍ରଣାଳୟ ଚିଠା ସଂଶୋଧନ ପ୍ରସ୍ତାବ ଉପସ୍ଥାପନ କରିଥିଲା। ଏହାକୁ ପ୍ରତ୍ୟାହାର କରିନେବା ପରେ ଅର୍ଥମୂଳକ ପରାମର୍ଶ କରିବ ବୋଲି ମନ୍ତ୍ରଣାଳୟ ପ୍ରତିଶ୍ରୁତି ଦେଇଥିଲା। ତେବେ ବିନା ପରାମର୍ଶରେ ଏଭଳି ସଂଶୋଧନକୁ ନେଇ ଗୁରୁବାର ବିଜ୍ଞପ୍ତି ପ୍ରକାଶ ପାଇଥିବାରୁ ଗିଲ୍ଡ ବିସ୍ମୟ ପ୍ରକାଶ କରିଛି। ମନ୍ତ୍ରଣାଳୟ ଏଭଳି କଠୋର ନିୟମାବଳୀର ବିଜ୍ଞପ୍ତି ପ୍ରକାଶ କରିବା ଦୁଃଖଦାୟକ। ଉକ୍ତ ବିଜ୍ଞପ୍ତିକୁ ପ୍ରତ୍ୟାହାର କରିନେବା ସହ ଗଣମାଧ୍ୟମ ସଂଗଠନ ଓ ପ୍ରେସ୍ ସଂସ୍ଥାଗୁଡ଼ିକ ସହ ପରାମର୍ଶ କରିବା ଲାଗି ଏଡିଟର୍ସ ଗିଲ୍ଡ ମନ୍ତ୍ରଣାଳୟକୁ ନିବେଦନ କରିଛି।
