ନୂଆଦିଲ୍ଲୀ,୧୧ା୭: ଇଥାନଲ ମିଶ୍ରିତ ଇ୨୦ ପେଟ୍ରୋଲ ବ୍ୟବହାରକୁ ନେଇ ଖାଉଟି ସ୍ତରରେ ଚିନ୍ତା ବଢ଼ିବା ପରେ ଏବେ ଦିଲ୍ଲୀ ସମେତ ବିଭିନ୍ନ ସହରରେ ଗାଡ଼ି ମାଲିକମାନେ ବିକଳ୍ପ ଇନ୍ଧନ ଭାବେ ପ୍ରିମିୟମ ପେଟ୍ରୋଲ ଆଡ଼କୁ ମୁହଁାଉଛନ୍ତି। ଫଳରେ ରିଟେଲ ଆଉଟଲେଟ୍ଗୁଡ଼ିକରେ ହାଇ-ଅକ୍ଟେନ ଇନ୍ଧନର ଚାହିଦା ଯଥେଷ୍ଟ ବୃଦ୍ଧି ପାଇଥିବା ଏକ ବିଶେଷ ସର୍ଭେରୁ ଜଣାପଡ଼ିଛି। ଦିଲ୍ଲୀର ବିଭିନ୍ନ ପେଟ୍ରୋଲ ପମ୍ପରେ ସାଧାରଣ ପେଟ୍ରୋଲ ବଦଳରେ ଇଣ୍ଡିଆନ ଅଏଲର ଏକ୍ସପି୯୫ ଓ ଏକ୍ସପି୧୦୦, ଭାରତ ପେଟ୍ରୋଲିୟମର ସ୍ପିଡ୍ ୯୭ ଏବଂ ଅନ୍ୟାନ୍ୟ ହାଇ-ପରଫରମାନ୍ସ ପ୍ରିମିୟମ ଇନ୍ଧନ ପ୍ରତି ଲୋକଙ୍କ ଚାହିଦା ବଢୁଥିବା ଦେଖିବାକୁ ମିଳୁଛି। ଏଠାକାର କେତେକ ରିଟେଲ ଆଉଟଲେଟ୍ରେ ପ୍ରିମିୟମ ପେଟ୍ରୋଲର ଚାହିଦା ଦ୍ୱିଗୁଣିତ ହୋଇଥିବାବେଳେ ଅନ୍ୟ ଇଲାକାରେ ଏହି ଶ୍ରେଣୀର ପେଟ୍ରୋଲ ଚାହିଦା ୫ଗୁଣ ବୃଦ୍ଧିପାଇଛି। ଇ୨୦ ପେଟ୍ରୋଲକୁ ନେଇ ଚାଲିଥିବା ବିବାଦ ମଧ୍ୟରେ ଅନେକ ଗ୍ରାହକ ଅଧିକ ଅକ୍ଟେନଯୁକ୍ତ ଇନ୍ଧନକୁ ପସନ୍ଦ କରୁଥିବାରୁ ଏହି ଚାହିଦା ବୃଦ୍ଧି ପାଇଛି। ବହୁ ଅଟୋମୋବାଇଲ ନିର୍ମାତା ଏବଂ ତୈଳ ବିପଣନକାରୀ କମ୍ପାନୀଗୁଡ଼ିକ ପକ୍ଷରୁ ଇ୨୦-ଅନୁକୂଳ ଗାଡ଼ିଗୁଡ଼ିକ ଏହି ମିଶ୍ରିତ ଇନ୍ଧନରେ ଚାଲିବା ପାଇଁ ଡିଜାଇନ କରାଯାଇଥିବା ବିଷୟ କୁହାଯାଉଥିଲେ ମଧ୍ୟ ଅନେକ ଗାଡ଼ି ଚାଳକ ପ୍ରିମିୟମ ପେଟ୍ରୋଲକୁ ବିକଳ୍ପ କରିଛନ୍ତି। ବିଶେଷକରି ଦାମୀ ଏବଂ ହାଇ-ପର୍ଫରମାନ୍ସ ଗାଡ଼ିଗୁଡ଼ିକ ପାଇଁ ସେମାନେ ପ୍ରିମିୟମ ପେଟ୍ରୋଲ ବ୍ୟବହାରକୁ ଗୁରୁତ୍ୱ ଦେଉଛନ୍ତି। ଉଲ୍ଲେଖଯୋଗ୍ୟ, ଇ୨୦ ପେଟ୍ରୋଲ ବ୍ୟବହାର ଦ୍ୱାରା ଇଞ୍ଜିନ ଶୀଘ୍ର ଖରାପ ହେବା ଏବଂ ମାଇଲେଜ୍ କମିବା ବିଷୟକୁ ନେଇ ଏବେ ସାଧାରଣରେ ବିତର୍କ ବଢ଼ିଥିଲାବେଳେ ସାଧାରଣ ପେଟ୍ରୋଲ ତୁଳନାରେ ଇ୨୦ ପେଟ୍ରୋଲ ମୂଲ୍ୟ କାହିଁକି ଅଧିକ ରହୁଛି ବୋଲି ପ୍ରଶ୍ନ ଉଠିଛି। ତେବେ ପେଟ୍ରୋଲିୟମ ଏବଂ ପ୍ରାକୃତିକ ଗ୍ୟାସ୍ ମନ୍ତ୍ରଣାଳୟ ଶୁକ୍ରବାର କୁହାଯାଇଛି,ବର୍ତ୍ତମାନ ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ମୂଲ୍ୟ ବ୍ୟାରେଲ ପିଛା ପ୍ରାୟ ୭୦ ଡଲାର ଥିବା ବେଳେ ପାରମ୍ପରିକ ପେଟ୍ରୋଲ ତୁଳନାରେ ଇ୨୦ ପେଟ୍ରୋଲ ଉତ୍ପାଦନ ମୂଲ୍ୟ ସାମାନ୍ୟ ମହଙ୍ଗା ରହିଛି। ଇ୨୦ ପେଟ୍ରୋଲ କିଛି ଗାଡ଼ିରେ ଇନ୍ଧନ ଦକ୍ଷତା ୩-୫ ପ୍ରତିଶତ ପର୍ଯ୍ୟନ୍ତ କମାଇ ଦେଇପାରେ । କିନ୍ତୁ ଏହାର ପ୍ରଭାବ ତୁଳନାରେ ଖାଉଟିମାନଙ୍କୁ ଉଚ୍ଚ ଅକ୍ଟେନ ରେଟିଂ, ଉତ୍କୃଷ୍ଟ ଆଣ୍ଟି-ନକ୍ ବୈଶିଷ୍ଟ୍ୟ, ଦ୍ରୁତ ଦହନ, ଉତ୍ତମ ପିକ୍ଅପ୍, ସହଜ ଗତିଶୀଳତା(ଆକ୍ସିଲରେଶନ), ସ୍ବଚ୍ଛ ଇଞ୍ଜିନ କାର୍ଯ୍ୟକାରିତା ଏବଂ କମ୍ ଲାଇଫସାଇକେଲ କାର୍ବନ ନିର୍ଗମନଜନିତ ଲାଭ ମିଳିବ ବୋଲି ମନ୍ତ୍ରଣାଳୟ ପକ୍ଷରୁ କୁହାଯାଇଛି।